ეკონომიკური პრობლემებისა და საკვების დეფიციტის მოსაგვარებლად, ჩრდილოეთ კორეა იძულებულია მიმართოს ისეთ ინოვაციებს, როგორიცაა ნაღდი ფულის კუპონებით ჩანაცვლება, ან დეკორატიული შავი გედების საჭმელად მოშენება. ამის შესახებ სააგენტო Reuters-ი წერს.
საერთაშორისო დამკვირვებლები ამბობენ, რომ ჩრდილოეთ კორეის საკვები და ეკონომიკური მდგომარეობა საშიშია რესურსების ამოწურვის შემდეგ.
გუშინ, დახურულ საპარლამენტო მოსმენაზე სამხრეთ კორეის სადაზვერვო სააგენტომ განაცხადა, რომ ჩრდილოეთ კორეის ლიდერმა კიმ ჩენ ინმა გასცა ბრძანება, რომლის მიხედვითაც "ხალხი ბრინჯის ყველა მარცვალს უნდა გაუფრთხილდეს და მთელი ძალისხმევა ჩადოს სოფლის მეურნეობაში".
ჩრდილოეთ კორეა დიდი ხანია განიცდის სასურსათო დეფიციტს. ამ ფონზე უახლოეს მომავალში ჩრდილოეთ კორეამ შეიძლება გადადგას ნაბიჯები ჩინეთთან და რუსეთთან საზღვრის გასახსნელად.
დამკვირვებლების თქმით, ეკონომიკის არასწორ მართვას ემატება საერთაშორისო სანქციები ბირთვული იარაღის, ბუნებრივი კატასტროფებისა და ახლა უკვე COVID-19 პანდემიის გამო, რის გამოც საზღვრები უპრეცედენტოდ ჩაიკეტა.
კიმ ჩენ ინმა აღიარა საკვების დეფიციტი და ბოდიში მოიხადა იმ მსხვერპლისთვის, რომლის გაღებაც მოქალაქეებს მოუწიათ კორონავირუსის გავრცელების თავიდან ასაცილებლად. თუმცა, კიმ ჩენ ინის თქმით, წელს ეკონომიკა გაუმჯობესდა და მან უარყო გაეროს გამომძიებლების მოხსენება, სადაც ნათქვამია, რომ ათასობით ყველაზე მოწყვლადი ჯგუფის ადამიანს შიმშილი ემუქრება.
ჩრდილოეთ კორეაში ოფიციალურად კორონავირუსის შემთხვევა არ დაფიქსირებულა.
გაეროს სააგენტოებმა განაცხადეს, რომ ჩრდილოეთ კორეამ ახლახან დაიწყო ჰუმანიტარული დახმარების მიღება, ხოლო ჩინეთის მიერ გამოქვეყნებული მონაცემები აჩვენებს ვაჭრობის ნელ ზრდას.
წყარო: "ბიზნეს ფორმულა"
ეკონომიკური პრობლემები
