Christie's-იმ, ჰონგ კონგში დაგეგმილ აუქციონზე, ტირანოზავრ რექსის ჩონჩხის გაყიდვა გააუქმა. ამის მიზეზი გახდა ეჭვები იმის შესახებ, რომ ტირანოზავრის რამდენიმე ძვალი რეპლიკა იყო. ინფორმაციას Artnews-ი ავრცელებს.

ტირანოზავრ რექსის, მეტსახელად „შენის“, აუქციონი, რომელიც 15-დან 20 მილიონ დოლარამდე იყო შეფასებული, 30 ნოემბერს იყო დაგეგმილი. ლოტი აუქციონიდან მას შემდეგ ამოიღეს, რაც Christie's-ს Black Hills-ის გეოლოგიური კვლევის ნამარხების ინსტიტუტმა გაუგზავნა კითხვები „შენის“ ძვლებსა და იმ ტირანოზავრების ჩონჩხის ძვლებს შორის მსგავსებაზე, რომელიც აუქციონის სახლმა 2020 წელს გაყიდა.

2020 წელს, Christie's-იმ ტირანოზავრი „სტენი“ რეკორდულ 31,8 მილიონ დოლარად გაყიდა. მაშინ Black Hills-მა ტირანოზავრის ჩონჩხზე ინტელექტუალური საკუთრების უფლება შეინარჩუნა. იურიდიული შეთანხმება Christie's შესაძლებლობას აძლევდა, რომ გაეგრძელებინა ჩონჩხის დაახლოებით 100 მოხატული ასლის გაყიდვა 120 000 დოლარად, მათ შორის სმიტსონის ბუნების ისტორიის ეროვნულ მუზეუმში.

Black Hills-ის პრეზიდენტმა, პიტერ ლარსონმა New York Times Sunday-ს განუცხადა, რომ „შენის“ თავის ქალა სტენის თავის ქალას ჰგავდა, მათ შორის მსგავსება იყო ისეთ უნიკალურ დეტალებში, როგორიცაა ხვრელები ქვედა მარცხენა ყბაში.

„ისინი „სტენს“ იმ დინოზავრის გასაყიდად იყენებენ, რომელიც სტენი არ არის,“ განაცხადა პიტერ ლარსონმა კრისტის აუქციონის გაუქმებამდე ცოტა ხნით ადრე.“

მიმდინარე წლის მაისში, Christie's-იმ 12,4 მილიონ დოლარად გაყიდა დეინონიქსის ნაშთები, რომელიც პოპულარული გახდა ფილმში „იურული პერიოდი“. პალეონტოლოგები ამ ტენდენციასთან დაკავშირებით შეშფოთებას გამოხატავენ. თუ ასე გაგრძელდა მეცნიერებისთვის მნიშვნელოვანი ბუნებრივი ისტორიის ნიმუშები შესაძლოა კერძო საკუთრებაში გადავიდეს და ისინი მკვლევრებისთვის მიუწვდომელი გახდეს.

მოამზადა მაკა ბიბილაშვილმა