რა ღირს საქართველოში საახალწლო სუფრის ერთ-ერთი მთავარი ნუგბარი ჩურჩხელა და როგორია მოთხოვნა დღესასწაულის წინა დღეებში. „კომერსანტი“ წინასაახალწლოდ ქართული ნუგბარის მწარმოებელ კომპანიებს ესაუბრა. როგორც აღმოჩნდა, საახალწლოდ ჩურჩხელის ფასი 2,50 ლარიდან 9 ლარამდეა.
კომპანია „ხურჯინის“ ერთ-ერთი დამფუძნებლის, სანდრო ხაჯალიას თქმით, მათთან ჩურჩხელის ფასი 2,50 - 5 ლარის ფარგლებშია.
„ჩვენ ბაზრის პრინციპით არ ვმუშაობთ და საახალწლოდ ფასებს არ ვცვლით. სტანდარტულად, რაც მთელი წლის განმავლობაში გვაქვს, იმ ფასებს ვინარჩუნებთ, გვაქვს დასავლეთის ჯანჯუხები, აღმოსავლეთის კახური ჩურჩხელა, ასევე ჩვენ ასორტიმენტშია თხილიანი, თაფლიანი და ნიგვზიანი ჩურჩხელები.
საახალწლოდ მომხმარებელს ვთავაზობთ საახალწლო „ბოქსებსაც“, რომლის ფასი 20 ლარიდან იწყება და შიგთავსის მიხედვით იზრდება, ყველა ბიუჯეტზე მორგებული „ბოქსი“ გვაქვს.
რაც შეეხება მოთხოვნას, როგორც ახალ წელს შეეფერება, მაღალია. გვყავს როგორც ინდივიდუალური, ასევე კორპორატიული მომხმარებელიც“, - აღნიშნა სანდრო ხაჯალიამ.
„ჩირიფრუტს“ ჩურჩხელის საკმაოდ ფართო ასორტიმენტი აქვს, მათ შორისაა მარწყვის და ალუბლის ჩურჩხელები. როგორც კომპანიის დირექტორმა სოფო ჯიქიამ „კომერსანტს“ უთხრა, მათთან ჩურჩხელის ფასი 5,50 ლარიდან იწყება და 8,50 ლარამდე ადის.
„ჩვენ ჩურჩხელის საკმაოდ ფართო ასორტიმენტი გვაქვს, დაწყებული ალუბლის და მარწყვის ჩურჩხელით, ასევე ტრადიციული თხილის, ნიგვზის ჩურჩხელებით დასრულებული, ძალიან ბევრი სახეობა გვაქვს და ფასებიც მრავალფეროვანია, მაგალითად რქაწითელზე დამზადებული თხილის ჩურჩხელა 5,50 ლარი ღირს, ალუბლის და მარწყვის ჩურჩხელა 8,50 ლარი, ხოლო რქაწითელზე დამზადებული ნიგვზის ჩურჩხელა 6,50 ლარი ღირს.
წელს მოგვიწია ფასების დაკორექტირება, გამორიცხულია რომ ფასების ზრდა არ ყოფილიყო, თუმცა საკმაოდ ადეკვატური ფასები გვქონდა. საახალწლო პერიოდში ერთიანად იცის ხოლმე მოძალება, მიუხედავად იმისა, რომ ორი თვით ადრე ვიწყებთ მზადებას და შეთავაზებებს, ბოლო დღეებში ხდება შეკვეთა, შესაბამისად , ფასები შრომასთან და შეთავაზებასთან მიმართებაში ადეკვატურია.
რაც შეეხება შეთავაზებებს, იცით, რომ როგორც ჩურჩხელის მიმართულებით, ასევე სასაჩუქრე შეფუთვების მიმართულებითაც ფართო არჩევანი გვაქვს, მომხმარებელს ვთავაზობთ როგორც მსუყე, ასევე საკმაოდ ბიუჯეტურ სასაჩუქრე ყუთებსაც“, - აღნიშნა სოფო ჯიქიამ.
„ბადაგში“ ტრადიციული ჩურჩხელის ფასი 3,90 ლარიდან იწყება და 4,90 ლარამდე ადის, ბადაგი მომხმარებელს ასევე მინი ჩურჩხელასაც სთავაზობს. რომლის ფასი 1,50 ლარია.
თაკო კვაჭანტირაძე