კორონავირუსის გავრცელების პრევენციის მიზნით დაწესებული შეზღუდვების უმეტესობა მოხსნილია, თუმცა შეზღუდვების მოხსნა და შემსუბუქება არ შეხებია ღონისძიებების ორგანიზატორ კომპანიებს. როგორია ქორწილებისა და სხვა ხალხმრავალი ღონისძიებების ორგანიზატორი კომპანიების მდგომარეობა რადიო „კომერსანტის“ გადაცემაში „კომერსანტის დილა“ კომპანია Malibu Flowers-ის თანადამფუძნებელმა ლიკა ჯიღაურმა ისაუბრა.
მისი თქმით, კომპანიის მდგომარეობა 2020 წელთან შედარებით ფაქტობრივად არ შეცვლილა, რადგან ინფიცირებულთა რაოდენობა წელსაც მაღალია და ქვეყანაში არსებული რეგულაციები ივენთების ჩატარების საშუალებას არ იძლევა.
„მოლოდინი იმისა, რომ ამდენი ხნის შემდეგ მდგომარეობა დასტაბილურდებოდა ნამდვილად გვქონდა, თუმცა შეზღუდვების შემსუბუქება ჩვენ გარდა ყველას შეეხო. სიტუაცია ისევ ისეთია, როგორც გასულ წელს. ამ ეტაპზე სახელმწიფომ ღია ცის ქვეშ ათ პერსონამდე შეკრება დაუშვა, თუმცა რაც შეეხება ვაქცინირებულ მოსახლეობაზე ღონისძიებებზე დასწრების შესაძლებლობას, ამ საკითხზე ჩვენც ვფიქრობთ და თუ ამაზე შეჯერება მოხდება, ძალიან კარგი იქნება, რადგან ჩვენ სფეროში მომუშავე ადამიანების ძალიან დიდი რაოდენობა ფაქტობრივად გაჩერებულია, ჩვენ აღარ გვაქვს იმ ტემპში მუშაობის შესაძლებლობა, რაც პანდემიამდე გვქონდა“, - აღნიშნა ლიკა ჯიღაურმა.
ლიკა ჯიღაურმა წყვილების მიმართვიანობაზეც ისაუბრა და აღნიშნა, რომ წყვილების რაოდენობა, რომლებსაც ქორწილის გადახდა სურთ, პანდემიამდელ პერიოდთან შედარებით გაცილებით მაღალია, რადგან ეს ადამიანები რეგულაციების მოხსნას ელოდებიან. რაც შეეხება სხვა ქვეყნებიდან მომართვიანობას, ლიკა ჯიღაური ამბობს, რომ მაშინ, როდესაც უცხო ქვეყნიდან შემოსულ მოქალაქეს კარანტინს სთხოვდნენ, პროცესი შეფერხებით მიმდინარეობდა, თუმცა ორი ადამიანისგან შემდგარ ქორწილზე მოთხოვნა უცხოელების მხრიდან არის.
„შეიძლება ითქვას რომ მომართვიანობა გაზრდილიც არის, რადგან იმ წყვილების რაოდენობა, რომლებიც რეგულაციების შემსუბუქებას ელოდებიან, იზრდება, შესაბამისად პანდემიამდელ პერიოდზე მაღალი გამოდის. რაც შეეხება უცხოელი წყვილებისგან მომართვიანობას, იმ პერიოდში როდესაც რამდენიმე ქვეყანამ ჩვენსა და მათ შორის მიმოსვლა დაუშვა წყვილები შემოდიოდნენ თუმცა მათი რაოდენობა არ იყო იმ მასშტაბების რაც პანდემიამდე გვქონდა, რადგან როგორც წესი უცხოელ წყვილებს სტუმრების გარკვეული რაოდენობა მოჰყვება, აქედან გამომდინარე სიტუაცია ცოტა რთლად იყო. დღევანდელი მდგომარეობის გათვალისწინებით მხოლოდ ტესტების ჩაბარებაა საჭირო. აქამდე კარანტინი აფერხებდა პროცესს. რაც შეეხება ორი ადამიანისგან შემდგარ ქორწილს ამ მიმართულებით წყვილებისგან მოთხოვნა გვქონდა თუმცა არა ისეთი როგორსაც ველოდით“, - აღნიშნა ლიკა ჯიმღაურმა.
დღეს მოქმედი შეზღუდვებით საქართველოში რესტორნებში ერთ მაგიდასთან 6 ადამიანი დაიშვება, მაგიდებს შორის დაშორება უნდა იყოს 2 მეტრი. გარე სივრცეში კი მხოლოდ 12 ადამიანის შეკრებაა შესაძლებელი.
თაკო კვაჭანტირაძე