„უკრაინაში განვითარებულმა მდგომარეობამ გამოიწვია ის, რომ ჯავშნების 60% პირველივე კვირაში გაგვიუქმდა”, -  ამის შესახებ რადიო “კომერსანტის” გადაცემაში “კომერსანტის დილა” „დაიცავი მთის კურორტების” დამფუძნებელმა გიორგი სალუქვაძემ ისაუბრა. მისი თქმით, დღეის მდგომარეობით გუდაურში ძირითადად თბილისიდან ჩასული ტურისტები არიან, რომლებიც კურორტზე ფონს ვერ  ქმნიან. 

„ჩვენ არაერთხელ გვისაუბრია პანდემიით გამოწვეულ პრობლემებზე, პლუს ამას ჩვენ ამინდზეც დამოკიდებულები ვართ. დღეს გუდაურის სტუმრები ძირითადად თბილისიდან ჩამოსული ძალიან მცირე ნაკადია, რომელიც ზოგად ფონს ვერ ქმნის. ჩვენ გვჭირდება მეტი  უცხოელი ტურისტი. წელს ვერ  დასრულდა სეზონი პრობლემის გარეშე და რა თქმა უნდა  ამ  უბედურებამ, რაც  უკრაინაში  ხდება,  გამოიწვია ის, რომ პირველივე  ეტაპზე  ჯავშნების 60% გაუქმდა, როგორც მოგეხსენებათ  უკრაინიდან და  რუსეთიდან  ძალიან დიდი  ნაკადი  შემოდის  გუდაურში და  რა თქმა უნდა ამ ომმა თავისი კვალი დაგვამჩნია.  

დღეს მთავარი პრობლემა, რამაც თავი იჩინა, არის ის, რომ შეიძლება უკრაინის და რუსეთის სეგმენტი საერთოდ დავკარგოთ,  ამიტომ აღმოსავლეთ  ევროპიდან  შემოდინება  უნდა  გაძლიერდეს. არსებობს კიდევ ერთი ძალიან საინტერესო სეგმენტი, ეს არის  ემირატებში დასაქმებული ინგლისელები და დასავლეთ ევროპელი ტურისტები, რომელიც  საკმაოდ  მაღალ ანაზღაურებადი არიან და აი ეს  ნაკადი თუ ჩამოვა ჩვენთან, ძალიან კარგი იქნება.  დუბაისთან ყველაზე ახლო  სათხილამურო  წერტილი არის  საქართველო და ისინი გვსტუმრობენ”, - აღნიშნა გიორგი სალუქვაძემ.

გუდაურში არსებულ ერთ-ერთ ყველაზე მწვავე პრობლემად სალუქვაძემ პარკინგი დაასახელა და აღნიშნა, რომ მანქანების დასაყენებელი ადგილების არარსებობა დამსვენებლებს დიდი დისკომფორტს უქმნის.

„წელს საკმაოდ  ბევრი პრობლემა  იყო, პარკინგი კვლავ პრობლემად რჩება. როცა თბილისიდან მოდის ადამიანი თუნდაც ერთი დღით სასრიალოდ, არ შეიძლება რომ მან  ნახევარი დღე  საპარკინგე ადგილის ძებნაში გაატაროს მაშინ, როცა  საბაგირო ათზე იხსნება, ის ათზე უკვე საბაგიროზე უნდა იჯდეს. 

ეს არის  ძალიან  სერიოზული გამოწვევა. თავის დროზე  იყო  “ეკო საინის”  მიერ  გაკეთებული გეგმა, თუ სად უნდა  მოწყობილიყო  საპარკინგე  ადგილი, თუ როგორ უნდა ამოსულიყო მანქანა მთავარ საბაგირო ტრასამდე, ახლა ჩვენც კვლევის  პროცესში ვართ, თუ რატომ  შეჩერდა ეს  ყველაფერი”, -  აღნიშნა გიორგი სალუქვაძემ. 

მიუხედავად იმისა, რომ ფასებთან დაკავშირებით ყოველთვის ვნებათაღელვაა, გიორგი სალუქვაძე ამბობს, რომ საქართველოში ზამთრის კურორტები ყველაზე იაფია. 

„ძალიან კარგი  იქნება,  თუ  მთის  განვითარების  სააგენტო ამ ფასებს  შეინარჩუნებს,  რა  თქმა  უნდა, საქართველოს  საშუალო სტატისტიკური მოქალაქისთვის  ეს ძალიან  ძვირია, მაგრამ  რეალობას უნდა გავუსწოროთ თვალი და აღვიქვათ,  რომ თუნდაც 1–კილომეტრიანი  სასრიალო  ტრასის  მოწესრიგებისთვის ძალიან  დიდი  ტექნიკა მუშაობს და  დიდი რესურსი  იდება, თუ ეს  ფასები შენარჩუნდება კარგი იქნება.  მე  მაგალითად იმასაც  ვუშვებ რომ უცხოელი სტუმრებისთვის ფასი ოდნავ გაიზარდოს, საქართველოს მოქალაქისთვის ფასის  ზრდა დამღუპველი იქნება, ჩვენი ქვეყნის მოქალაქეებს პირიქით, ხელი უნდა  შევუწყოთ“, -  აღნიშნა  გიორგი  სალუქვაძემ.

სალუქვაძე საქართველოში  რუსი და ბელარუსი ვიზიტორების შემოდინებასაც შეეხო და აღნიშნა, რომ ეს ადამიანები მთაში ნაკლებად შეინიშნებიან. მისივე თქმით, ისინი დასვენებაში  თავისი რესურსის  დახარვჯას  თავს  არიდებენ და საქართველოი  ფეხის მოკიდებას და  თავის  დამკვიდრებას ცდილობენ. სალუქვაძემ ასევე  მუნიციპალიტეტში არსებულ  სხვა  პრობლემებზეც  ისაუბრა და  აღნიშნა, რომ სეზონის  განმავლობაში დიდი პრობლემები იყო  გზების  წმენდის მიმართულებით, ასევე ქაოსი იყო ტრასებზე. 

„მაგალითად რედკო, კომპლექსი საიდანაც გესაუბრებით, აქ  30%  უკრაინელი, ბელარუსი და რუსი  სტუმრები არიან,  ძალიან  მრავალფეროვანია,  მიხარია  რომ დასავლეთ  ევროპიდანაც ჩამოდიან. აქ სკანდინავიიდანაც  ჩამოსახლდა რამდენიმე ოჯახი, ასევე პოლონეთიდან  არიან დამსვენებლები, თუმცა იმედგაცრუებული არიან იმ ფაქტით, რაც ხდება. წელს  კატასტროფული მდგომარეობა გვქონდა გზის  წმენდის მიმართულებით. კომპანია რედკოს  ეს ტერიტორია  მთელი რიგი  ვალდებულებებით  აქვს  აღებული, როცა  ჩვენ  ვსვამთ  ამ საკითხებს, კომპანია მუნიციპალიტეტისკენ იშვერს  ხელს, მუნიციპალიტეტი — მთის კურორტისკენ,  კურორტები  — კომპანიისკენ და ა.შ. 

როცა ევროპელი ტურისტი თხილამურით სრიალებს და შენ მას ბურანით ჩაუქროლებ, ის ამას არ მოითმენს, უკიდურესი მდგომარეობაა კურორტზე ვისაც სად უნდა,  იქ  სრიალებს  ბურანებით და ეს საკითხი არ კონტროლდება ისე, როგორც უნდა  კონტროლდებოდეს.

იყო შემთხვევები, რომ საბაგიროს  გახსნა  გვიანდებოდა, რადგან  სტანდარტის მიხედვით  თუ სასწრაფო მობილიზებული არ არის,  საბაგიროს ჩართვა  არ  შეიძლება და  გზების  გამო სასწრაფო  ვერ  ადიდოდა საბაგიროებამდე. როცა თუნდაც   20  წუთი  საბაგიროს  ჩართვა  იგვიანებს, ეს  ტურისტისთვის უკევ  პრობლემაა და  კურორტს  რეიტინგი  ეკარგება და  დღეს  სოც  ქსელების  საშუალებით აზრის  გავრცელება  ძლაიან  მარტივია. 

რეალურად ჩვენ  ძალიან ბევრი   კონკურენტი  გვყავს  რეგიონში,  აი მაგალითად  ყირგიზეთმა  რომ  დაიწყოს  ტიანშანის  განვითარება,  ან რუსეთმა  იალბუზის  განვთარება, გაგვასწრებენ. ამიტომ უნდა ვისარგებლოთ ამ დროით და განვვითარდეთ და როცა  ეს ქვეყნები  დაიწყებენ  განვთარებას, ჩვენ ლიდერები ვიყოთ“, -  აღნიშნა გიორგი  სალუქვაძემ.