„2022 წელს წინა წლებთან შედარებით ავტომობილებზე მოთხოვნა მზარდი იყო და ვფიქრობთ, რომ ეს ტენდენცია 2023 წელსაც გაგრძელდება“ -  ამის შესახებ რადიო „კომერსანტის“ გადაცემაში, „კომერსანტის დილა“ ავტოიმპორტიორთა ასოციაციის  თავმჯდომარემ ლაშა დარბაისელმა ისაუბრა.

მისი თქმით სექტორს რეექსპორტის ძალიან კარგი მაჩვენებელი ჰქონდა 2019 წელს, თუმცა შემდეგ წლებში ჩაიკეტა სომხეთის ბაზარი, დაიწყო პანდემია, ამას მოჰყვა რუსეთის შეჭრა უკრაინაში, რის შედეგადაც გართულდა და გახანგრძლივდა ავტომობილების შემოყვანა და გაძვირდა ლოგისტიკაც.

„ავტოიმპორტიორები ვცდილობთ, რომ პანდემიამდელ მაჩვენებელს დავუბრუნდეთ, ნელ-ნელა ხდება სექტორის აღდგენა. ჩვენი პარტნიორები იყვნენ აზერბაიჯანი, ყაზახეთი, უკრაინა. მიუხედავად იმისა, რომ დღეს უკრაინაში ომია,ამ ქვეყანაში რეექსპორტის მაჩვენებელი მაინც მაღალია, ასევე რეექსპორტი მაღალია შუა აზიის  ქვეყნებშიც. შუა აზიის  ბაზარი არც პანდემიამდელ პერიოდში დაგვიკარგავს, 2022 წელს ამ მიმართულებით რეექსპორტი გაიზარდა. ზოგადად შუა აზიის  ქვეყნები ჩვენი გამოსავალია.

ჩვენ ჩვენი  ქვეყნის გეოპოლიტიკური მდგომარეობა უნდა ავითვისოთ, ჩვენ ვართ  დასავლეთსა და აღმოსავლეთს შორის ხიდი, ჩვენ შეგვიძლია შემოვიტანოთ ავტომობილები დასავლეთიდან და გავიტანოთ შუა აზიაში“, - აღნიშნა ლაშა დარბაისელმა.

ლაშა დარბაისელმა აღნიშნა, რომ სომხეთის ბაზრის სრულად ჩანაცვლება ვერ მოხერხდა, 2018 წელს სექტორმა სომხეთის ბაზრიდან 700-დან 800 მილიონამდე შემოსავალი მიიღო.

„დღეს სექტორს ყოველ შემდეგ თვეში წინა თვესთან შედარებით უკეთესი მდგომარეობა აქვს, თუმცა ეს არ ნიშნავს იმას, რომ ყველაფერი კარგად არის და ახალ ბაზრებზე არ უნდა ვიმუშავოთ, ან არსებულ ბაზრებთან საქმიანი ურთიერთობა არ უნდა გავიღრმავოთ.

რაც შეეხება ავტომობილის ფასებს, ვფიქრობ, რომ მიმდინარე წელს მცირე ზრდა გვექნება, რადგან გართულებული და გახანგრძლივებულია ლოგისტიკის ჯაჭვი, ასევე გაძვირებულია ტრანსპორტირებაც“, - აღნიშნა ლაშა დარბაისელმა.

დარბაისელის თქმით საქართველო ავტომობილების იმპორტის მხრივ, დამოკიდებულია აშშ-ზე, ევროპის ქვეყნებზე, კანადაზე და იაპონიაზე.

 თაკო კვაჭანტირაძე