კომპანია „ვისოლის“ პრეზიდენტის, სოსო ფხაკაძის განცხადებით, როგორც კი საერთაშორისო ბაზრებზე საწვავის ფასის კლება დაიწყება, ეს ავტომატურ რეჟიმში საქართველოს ბაზარზეც აისახება. თუმცა, როგორც ფხაკაძემ ჟურნალისტებს განუცხადა, რუსეთ-უკრაინის ომის დასრულებამდე როგორც მოხდება საერთაშორისო ბაზრებზე ნავთობის ფასის კლება, არ იცის.

„ჩვენ ყოველთვის მივყვებით საერთაშორისო ფასს, გაიაფდება საწვავი? - ეს აისახება ავტოგასამართ სადგურებზე. სამწუხაროდ, იმასთან შედარებით, რა ფასიც იყო რუსეთ-უკრაინის ომამდე, მნიშვნელოვნად არის გაზრდილი პლატცები, მნიშვნელოვნად არის გაზრდილი ნავთობის ფასი და ამან ძალიან ნეგატიური გავლენა მოახდინა როგორც კომპანიებზე, ასევე მოსახლეობაზე. ჩვენ ორნახევარჯერ მეტი საბრუნავი სახსრები გვჭირდება, ვიდრე ომამდე გვჭირდებოდა და აქ საუბარია მილიონებზე. ომის დასრულებამდე რამდენად შეიძლება მნიშვნელოვანი გაუმჯობესება მოხდეს ამ ბაზარზე, არ ვიცი. თუ ერთი, ორი კვირა ნარჩუნდება დაბალი ფასები საერთაშორისო ბაზარზე, ამას აუცილებლად აქვს ადეკვატური ასახვა ჩვენ ქსელში.

ომის დაწყების შემდეგ გარკვეული პერიოდი იყო სამშვიდობო მოლაპარაკებები ორ ქვეყანას შორის, ამავდროულად, ამერიკამ გამოუშვა თავისი რეზერვები იმისთვის, რომ ფასები შემცირებულიყო და ბაზარზე სტაბილიზაცია მიეღო, მაგრამ ეს ძალიან მოკლე პერიოდი იყო. სამშვიდობო მოლაპარაკებები ჩავარდა და ისევ 120 დოლარს დაუბრუნდა ბარელის ფასი. ძალიან გვინდა, რომ საწვავის ფასი ნაკლები იყოს, უფრო მეტი გაიყიდება. მიუხედავად იმისა, რომ ხელისუფლება ელოდა ფასების შემცირებას და ჩვენც ველოდით ამას, მაინც ყველაფერი ცუდი მხარისკენ შემოტრიალდა. ჩვენ ვცდილობთ დღემდე რომ ვიპოვოთ საწვავის ისეთი წყარო, რომელიც უფრო იაფი იქნება. ვნახოთ, არ ვიცი იქნება თუ არა ეს რუსეთი“,- განაცხადა ფხაკაძემ.

მისი თქმით, მნიშვნელოვანი ზრდაა გაყიდვებში და ამ მიმართულებით კარგი მოლოდინები არსებობს.

„როდესაც რუსეთი უკრაინაში შეიჭრა, ძალიან ბევრი ადამიანი ამბობდა, რომ ეს პრობლემა ჩვენი ქვეყნის ეკონომიკაზე ძალიან ნეგატიურად აისახებოდა. სადღაც ალბათ მართლებიც იყვნენ, მაგრამ, ჩვენ ყოველგვარი გადაჭარბების გარეშე შეგვიძლია ვთქვათ, რომ ისეთი ნეგატიური სცენარი არ გვაქვს, როგორიც პროგნოზირებული იყო გარკვეული ადამიანების მიერ. საბოლოო შედეგია, რომ მაკროეკონომიკური გარემო მნიშვნელოვნად გაუმჯობესებულია. ამას რამდენიმე ახსნა აქვს. პირველი, ეკონომიკის გახსნის შემდეგ აუცილებლად მოხდებოდა დადებითი ტენდენციები. მეორე, ძალიან მნიშვნელოვნადაა გაზრდილი სავალუტო შემოდინებები ტრანსფერების გზით, გაზრდილია ექსპორტი. ჩვენს ქვეყანაში ჩამოვიდა და ცხოვრობს ათეულობით ათასი ახალი ადამიანი, რომელთა მსყიდველობითი უნარი საკმაოდ მაღალია. საბოლოო ჯამში ორნიშნა ეკონომიკური ზრდა გვაქვს. გარკვეული ჩამორჩენით, მაგრამ ეს აისახა ბიზნესზე. ჩვენ ჩავატარეთ კვლევა, რომელსაც ყოველკვარტალურად ვაკეთებთ. არსებობს BAG ინდექსი. ჩვენი წევრების უმეტესობა ამბობს, რომ გაყიდვები გაიზარდა. ეს არის მაღალი ზრდა. ფინანსური და სხვა პარამეტრები გაუმჯობესებულია. ეს არის იმის საწინდარი, რომ ქვეყნის ეკონომიკა განვითარდეს. კარგი მოლოდინები გვაქვს. ამ ყველაფერს ასევე ძალიან შეუწყო ხელი ლარის კურსის გამყარებამ. ეს ერთ-ერთი ყველაზე მთავარი პრობლემა იყო ყოველთვის“, - აღნიშნა სოსო ფხაკაძემ.