საქსტატის ინფორმაციით 2023 წლის იანვარში საქართველოს უმსხვილესი სავაჭრო პარტნიორი რუსეთი იყო. სავაჭრო ბრუნვა რუსეთთან 18%-ით გაიზარდა, იმპორტის და ექსპორტი მაჩვენებელი კი 100%-ს აჭარბებს.

ეკონომისტმა ვახტანგ ჭარაიამ რადიო „კომერსანტის“ დილის ეთერში განაცხადა, რომ ამ ეტაპზე, რუსეთისთვის სანქციების დაწესება რუსეთს არა თუ რაიმე ზიანს მოუტანს, ქართულ ეკონომიკას ჩამოშლის.

„როცა რუსეთთან დამოკიდებულებაზე საუბრობენ, ეს ყველაფერი იქითკენ მიჰყავთ, რომ რუსეთის წინააღმდეგ სანქციები უნდა დაწესდეს და საქართველომ ოპერაციები შეზღუდოს. ამ ეტაპზე, რუსეთისთვის სანქციების დაწესება რუსეთს არა თუ რაიმე ზიანს მოუტანს, ქართულ ეკონომიკას ჩამოშლის.

წლების განმავლობაში ჩვენთვის ხორბლის ძირითადი მომწოდებელი რუსეთი იყო და მას უკრაინიდან ვაბალანსებდით. ასე იყო ბრინჯის, წიწიბურას, ზეთის შემთხვევაშიც. დღეს, ომის გამო, უკრაინის ბაზარი ჩაკეტილია და იქიდან ბევრ პროდუქციას ვერ ვიღებთ. თუ რუსეთიდან ამ პროდუქციას არ შემოვიტანთ, სხვაგან უფრო ძვირი ღირს“, - აცხადებს ჭარაია.

მას ბალტიისპირეთის ქვეყნების მაგალითი მოჰყავს, სადაც რუსეთის მიმართ უფრო მკაცრი მიდგომები განახორციელეს - გარკვეული პროდუქციის შემოტანა აკრძალეს და საზღვარი ჩაკეტეს. გასულ წელს სამივე ქვეყანაში ინფლაციის მაჩვენებელი 20-დან 25%-მდე იყო.

„ჩვენც რომ შეგვეზღუდა რუსული პროდუქტის შემოტანა, ინფლაცია ბალტიისპირეთზე მეტი - 30-35% გვექნებოდა იმიტომ, რომ ბალტიისპირეთი არ არის შედარებით იაფიანი რუსული პროდუქციის მომხმარებელი, მაგრამ გავლენა მაინც მოახდინა ინფლაციაზე.

იმ გამოუვალ მდგომარეობაში, როცა უკრაინის ბაზარი ჩაკეტილია, გლობალურად სირთულეებია მიწოდების და სხვა მიმართულებით, რუსეთთან დამოკიდებულების შემცირება მოსახლეობას სურსათის ფასების 3-4-ჯერ გაძვირებას ნიშნავს. ეს ყველაფერი რომ გავიაზროთ, ისეთი კატასტროფული მდგომარეობა არ არის, როგორც ჩანს“, - აცხადებს ვახტანგ ჭარაია.

მისი თქმით, გასულ წელს რუსეთზე მეტად ვაჭრობა სხვა მეზობელ ქვეყნებში გაიზარდა. არსებული შედეგები ეკონომიკური ზრდის შედეგია და არა რუსეთის წილის ზრდის.

„რაც შეეხება ფულადი გზავნილების ზრდას, მისი თქმით, 2022 წელს ფული საქართველოში არა იმდენად რუსებმა გადმორიცხეს, არამედ იქ მცხოვრებმა ქართველებმა, რომლებიც საქართველოში დაბრუნდნენ ან გადმოიტანეს თავისი ბიზნესები, ან რუსების გადმორიცხული თანხები გარკვეული საშუამავლო ოპერაცია იყო რომელიც, ხშირ შემთხვევაში, მესამე ქვეყანაში გავიდა. მისი თქმით, ის ფული ქართულ ეკონომიკაში არ ჩადებულა“, - აცხადეს ჭარაია.

ეკონომისტი შექმნილი მდგომარეობიდან გამოსავალს იმპორტზე დამოკიდებულების შემცირებაში ხედავს.

„ამ შემთხვევაში გამოსავალს ვხედავ მთელი რიგი პროდუქციის ადგილობრივი წარმოებით ჩანაცვლებაში. მაგალითად, ხორბლის კუთხით ჩვენი ადგილობრივი წარმოება მოხმარების 10%-ია. ეს 10% უნდა გახდეს 50-60 და შემდეგ უკვე რუსეთზე დამოკიდებულება იქნება უმნიშვნელო და რომც დაიკარგოს ეს ბაზარი, მისი სხვა ბაზრით ჩანაცვლება რთული არ იქნება და არც ფასებს დაეტყობა ძალია. იგივე შეიძლება ითქვას ზეთის და რძის პროდუქტებზეც“, - აცხადებს ვახტანგ ჭარაია.