,,შენი იდეა ბათუმს“ - პროექტის ფარგლებში ხმის მიცემა დასრულდა. როგორც ბათუმის მერიაში განმარტავენ, მონაწილეობითი ბიუჯეტის საბჭოს სხდომაზე პროექტის ფარგლებში გამარჯვებული იდეები უკვე დამტკიცდა. ხმის მიცემის ეტაპზე გადასული 6 იდეიდან გამარჯვებულად 2 პროექტი გამოვლინდა:
• ჩვენი ბათუმელი ცუგუნები - ბიუჯეტი: 170900 ლარი,
• ადაპტირებული ბათუმი - ბიუჯეტი: 28050 ლარი.
გამარჯვებული იდეები ბათუმის მერიის 2023 წლის ბიუჯეტიდან დაფინანსდება.
რას ითვალისწინებს პროექტი „ჩვენი ბათუმელი ცუგუნები“?
პროექტის მიზანია ბათუმში მიუსაფარი ცხოველებისთვის მინიმალური პირობები შექმნა, რაც ქალაქში მიუსაფარი ცხოველებისთვის სხვა და სხვა ლოკაციებზე სახლუკების ჩადგმას ითვალისწინებს, რომელიც მიბარებული იქნება მიმკედლებლებზე, რომლებიც ყოველ დღე ნახულობენ და კვებავენ მიუსაფარ ცხოველებს. პროექტის ფარგლებში ქუჩებში სპეციალური ბოქსები პაკეტებით (ეს იმისთვის, როდესაც ცხოველი მოისაქმეს მიხედოს პატრონმა ქუჩაში სისუფთავეს და თავიდან ავიცილოთ ქუჩების ფეკალიებით დაბინძურება) დამონტაჟდეს.
პროექტის აღწერაში აღნიშნულია, რომ „ასევე სასიცოცხლოდ მნიშვნელოვანია მიუსაფარი ცხოველების 1 დოზა კომპლექსური ვაქცინით აცრა, რათა თავიდან ავაცილოთ მიუსაფარ ცხოველებს ისეთი გამავრცელებელი და გადამდები მათთვის სასიკვდილო დაავადებები, როგორიც არის ჭირი და ენტერიტი. ცხოველის ვაქცინირება დამატებით დაევალოს 2023 წლის ტენდერში გამარჯვებულ კომპანიას,რომელთანაც მერიის მხრიდან გაფორმებული იქნება ხელშეკრულება მიუსაფარი ცხოველების სტერილიზაცია/კასტრაცია/ცოფის აცრა/რევაქცინაციაზე“.
რაც შეეხება მეორე პროექტს „ადაპტირებული ბათუმი“, ის გულისხმობს ხელი შეეწყოს შშმ პირებს კომუნიკაციის დამყარებაში სპეციალური ინფრასტრუქტურის საშუალებით, ამ შემთხვევაში სპეციალური დიზაინის მქონე სკამებით. სკამს ექნება მრავალფუნქციური დატვირთვა, ასაკეცი მოწყობილობის საშუალებით, რაც ნიშნავს იმას, რომ თუ შშმ პირი არ იყენებს მოწყობილობას, მისი გამოყენება ნებისმიერ მოქალაქეს შეუძლია.
აღნიშნული სკამები, ქალაქის მასშტაბით განთავსდება შშმ პირებისათვის ხელმისაწვდომ ადგილზე, ესენია: უნივერსიტეტის მიმდებარე ტერიტორია, ბულვარის მიმდებარე ტერიტორია, პარკის მიმდებარე ტერიტორია და სკვერებთან.
„იქიდან გამომდინარე რომ აჭარა არის ტურისტული რეგიონი, პროექტის განხორციელება დადებით გამოხმაურებას პოვებს საერთაშორისო ასპარეზზე და რეგიონი კიდევ უფრო მეტად მიმზიდველი გახდება უცხოელებისათვის“, - აღნიშნულია პროექტის აღწერაში.
„შენი იდეა ბათუმს“ მონაწილეობითი ბიუჯეტის პროექტია, რომელიც საშუალებას აძლევს მოქალაქეებს განკარგონ ბათუმის მერიის ბიუჯეტიდან გამოყოფილი თანხები.