Covid 19-ის გამო ღონისძიებების, თეატრების, კინოსეანსებისა და ფესტივალების გაუქმებას და შემოსავლის ერთადერთი წყაროს დაკარგვას Biletebi.ge-ს ადმინისტრაციაც თავისებურად მოერგო და ახალი პლატფორმა Eqimtan.ge დააფუძნა. ამის შესახებ რამდენიმე თვის წინ Biletebi.ge-ს თანადამფუძნებელმა გიორგი ჩხიკვიშვილმა „კომერსანტთან“ ექსკლუზიურად განაცხადა. თუმცა პლატფორმა ჯერ არ გააქტიურებულა და ამჟამად ბოლო ეტაპებს გადის.
საქართველოს ბაზარზე სამედიცინო მომსახურების მაღალი მოთხოვნის გამო არაერთი მსგავსი პლატფორმა უკვე შექმნილია როგორებიცაა Redmed, eqimo.ge და ა.შ. საინტერესოა რა განსხვავებულ და გამარტივებულ სერვისს სთავაზობს biletebi.ge-ს ახალი წამოწყება მომხმარებელს და როგორ გაუწევს კონკურენციას უკვე არსებულ ონლაინ პლატფორმებს? როგორც გიორგი ჩხიკვიშვილი ამბობს, კონკურენტების პლატფორმები განცხადებების დაფასავითაა, ხოლო ახალი პლატფორმა იძლევა იმის გარანტიას, რომ Eqimtan.ge-ზე შეძენილ კონკრეტულ ადგილს პაციენტი არ დაკარგავს და მისი დრო და ადგილი დაკავებული არ იქნება.
„არ ვიცით რა როგორ წარიმართება, მაგრამ ჩვენ დავიწყებთ ამ სერვისს. წესით, Eqimtan.ge-მ ბილეთების გაჩერებით მიღებული ზარალის კომპენსირება რაღაც დოზით უნდა მოახდინოს. მაგრამ ბუნებრივია, ის ბრუნვა და ის მასშტაბი, რაც ბილეთების გაყიდვიდან გვქონდა, დასაწყისშივე არ იქნება.
რაც შეეხება კონკურენციას, საკმაოდ მარტივი პასუხი მაქვს - ჩვენი სისტემა მუშაობს კომპანიის შიგნითაც. ანუ, რეალურად ჩვენს სისტემაზე მუშაობს ტატიშვილის ისნის ფილიალი. ანუ როცა პლატფორმაზე შეიძენ კონკრეტულ ადგილს, გაქვს გარანტია, რომ ის ადგილი ან დრო დაკავებული არ იქნება როცა ადგილზე მიხვალ. როგორც კი შეკვეთას განათავსებ, სისტემაში შეკვეთა განთავსებულია და უკვე იმ დროს აღარავინ ჩაწერს.
ჩვენს სხვა კონკურენტებს საიტებზე უდევთ ეს განრიგი, რომელიც შიდა სისტემასთან სინქრონიზირებული არ არის, ანუ ისინი მხოლოდ და მხოლოდ რაღაც განცხადებების დაფასავით არის.
ჩვენ დიდი დრო დავკარგეთ კლინიკების შიგნით მუშაობაში, ამიტომაც ეს არ არის მხოლოდ განცხადებების დაფა ონლაინში, ეს არის შიდა სისტემაზე მიბმული ინტეგრირებული სისტმა.“ - ამბობს გიორგი ჩხიკვიშვილი.
რაც შეეხება biletebi.ge-ს თავდაპირველ ფუნქციას, ჩხიკვიშვილი აღნიშნავს, რომ აქტივობა 0 ამდეა დასული მიუხედავად იმისა, რომ ახლა საიტზე ერთადერთი პროდუქტი საქართველოს რკინიგზის ბილეთებია.
„Biletebi.ge-ს ზარალი უზრმაზარი იყო, ფაქტობრვად შემოსავლები 0- ზე დავიდა. თავითან 10-ჯერ იყო შემცირებული და ახლა საერთოდ არაფერი. ჩვენ ვფიქრობთ, რომ გაზაფხულამდე არაფერი არ იქნება. ახლა რკინიგზა მუშაობს, მაგრამ ეგეც შემცირებულია. საერთოდ რკინიგზის პიკი ზაფხულის თვეებია და ზამთარში ყოველთვის ნაკლებია.
აუზებისა და gym -ების სფეროშიც შესული ვართ, მაგრამ ეგეც სულს ღაფავს,“ - განმარტავს ბიზნესმენი.
Eqimtan.ge კიდევ ერთი სამედიცინო პლატფორმაა, რომელიც პაციენტს საშუალებას აძლევს მიიღოს კონსულტაცია, ჩაეწეროს ექიმთან ვიზიტზე და მიიღოს ანალიზების პასუხები ონლაინ რეჟიმში.
მარიამ მორგოშია
გიორგი ჩხიკვიშვილი
