კომბუჩა ფერმენტირებული, მსუბუქად შუშხუნა, ტკბილი, შავი ან მწვანე ჩაის სასმელია, რომელსაც ხშირად, როგორც ჯანმრთელობის გაუმჯობესების მიზნით, ასევე გამაგრილებელ სასმელადაც მოიხმარენ. სწორედ ჯანსაღი პროდუქტის პოპულარიზაციისთვის ქეთევან კიღურაძემ კომბუჩას წარმოება დაიწყო.
“მე და ჩემი ოჯახი ვეგეტარიანელები ვართ და ჯანსაღი ცხოვრების წესს მივსდევთ, დაახლოებით 4 წლის წინ კომბუჩას ე.წ. დედა გამოვიწერე, პირველი დედა, რომ გამეღვიძებინა დაახლოებით 6 თვე დამჭირდა, თავიდან მხოლოდ ოჯახის წევრებისთვის და ახლობლებისთვის ვამზადებდი, თუმცა ძალიან კარგი შედეგი გამოიღო და ყველა კმაყოფილი დარჩა. უკვე გაცოცხლებული დედიდან სასმელის დამზადებას დაახლოებით 7 დღე სჭირდება. პირველად ჩაი ყენდება, კეთდება როგორც მწვანე, ასევე კლასიკური შავი ჩაი, ორივე საკმაოდ გემრიელია, არომატის მისაცემად შესაძლებელია ხილის დამატებაც, თუმცა მე მხოლოდ ზაფხულში, სეზონორ ხილს ვიყენებ, ზამთარში არასეზონური ხილით არ ვამზადებ, რადგან მინდა, რომ სასმელი სრულიად ჯანსაღი იყოს.” - აღნიშნავს ქეთევან კიღურაძე.
როგორც ქეთევანი ამბობს, მისი მიზანი მხოლოდ ჯანსაღი სასმელის პოპულარიზაცია და გაზიან სასმელზე უარის თქმა იყო და დიდი ბიზნეს გეგმები არ ჰქონია. სტრატაპის დასაწყებად კი სულ რამდენიმე ათასიანი ინვესტიცია დასჭირდა, რაც საკუთარი სახსრებით ოჯახთან ერთად განახორციელა.
“კომბუჩას განსაკუთრებული ინვესტიცია არ სჭირდება, თავის შეფუთვიანად სულ რამდენიმე ათასი ლარი იყო საჭირო. შემოსული თანხა ყოფნის მომზადებას, როდესაც პირველი დედა გავაცოცხლეთ, შემდეგ თვითონ გამრავლდა და სხვა დედები გააჩინა. დაახლოებით ისეთია, როგორიც ძმრის დედაა, უბრალოდ ამას სოკოს ფორმა აქვს და ჩაის სითხეში იზრდება, სწორედ ეს სოკო იწვევს დუღილის პროცესს. ზოგს თავიდანვე ძალიან მოსწონს, ზოგს მიჩვევა სჭირდება, მსუბუქი დასალევია, თავისი შუშხუნი ანუ ბუნებრივი გაზიც აქვს.
ჩემი ძირითადი პროფესია პოლიგრაფია და გამომცემლობაა, შესაბამისად დიზაინზეც მე ვიზრუნე, ეტიკეტიც მე თვითონ შევქმენი და პოპულარიზაციის მიზნით სოციალურ ქსელში გვერდიც გავაკეთე. დიდი ბიზნეს გეგმები არ გვაქვს, შეიძლება, რომ მცირე საოჯახო საწარმო დავარქვათ, გაყიდვებიც მეტნაკლებად არის.” - აღნიშნავს ქეთევან კიღურაძე.
რაც შეეხება დაინტერესებას და პროდუქტის რეალიზაციას, კიღურაძე ამბობს, რომ ძირითადად შეკვეთები ერთი და იმავე ჯანსაღი ცხოვრების წესის მიმდევარი ადამიანებისგან აქვთ, გარდა ამისა კომბუჩას უკვეთავენ იოგა რუმებიდან. კომბუჩა „ოკტოპუს ფიტნეს“ ცეტრის ჯანსაღი კვების სივრცესთანაც თანამშრომლობს.
„მომხარებელს პროდუქტი თვითღირებულების ფასად შევთავაზეთ. „კომბუჩა“ რამდენიმე ჯანმრთელ კვებასთან დაკავშირებულ მაღაზიაშიც შევიტანეთ, გარდა ამისა „ოკტოპუს ფიტნეს“ ცენტრში არსებულ ჯანსაღი კვების სივრციდან იყო დაინტერესება. ჩემი მიზანი ჯანაღი პროდუქტის პოპულარიზაციაა, თუმცა დაინტერესება და გაყიდვებიც გვაქვს, 1 ლიტრის ღირებულება ათ ლარია და ამაში მიტანის ფასიც შედის. ჩემი მიზანია, რომ ბავშვებმა და უფროსებმა არაჯანსაღ მავნე სასმელზე უარი თქვან.” აღნიშნა ქეთევან კიღურაძემ.
თაკო კვაჭანტირაძე