„ჩვენი სატრანსპორტო პოლიტიკა ფეხით, ველოსიპედით და სხვა ალტერნატიული ტრანსპორტით მოსიარულე ადამიანზეა ორიენტირებული“, - ამის შესახებ, რადიო „კომერსანტის“ გადაცემაში, „კომერსანტის დილა“ თბილისის მერიის ტრანსპორტისა და ურბანული განვითარების სამსახურის ხელმძღვანელმა ვიქტორ წილოსანმა ისაუბრა. მისი თქმით, დღეს არსებული მდგომარეობა და საცობები დღემდე არსებული პოლიტიკის შედეგია, რომელიც ავტომობილზე იყო ორიენტირებული და ქალაქის განვითარებაც სწორედ ამ მიმართულებით ხდებოდა.
„სატრანსპორტო პოლიტიკა არის პირველ რიგში ადამიანზე, როგორც ფეხით მოსიარულეზე ორიენტირებული, შემდეგ ველოსიპედით ან ალტერნატიული ტრანსპორტით მოსარგებლე, შემდეგ საზოგადოებრივი ტრანსპორტზე, შემდეგ ტვირთის გადაზიდვაზე და ბოლოს კერძო ავტომობილით გადაადგილებაზე.
შესაბამისად 1000 ერთეული მიკროავტობუსი, 860 ერთეული ავტობუსი შემოვიყვანეთ. მოლაპარაკებები მიმდინარეობს და 200 ერთეული 18 მეტრიანი ავტობუსიც შემოვა. მიმდინარეობს ავტობუსისთვის გამოყოფილი ზოლების შექმნა და აქედან გამომდინარე ჩვენ გვაქვს 13 კვანძი, რომელთა მოწესრიგება 2023 წლის ბოლომდეა დაგეგმილი. მანამდე იცით, რომ საზოგადოებრივი ტრანსპორტისთვის გამოყოფილი ბევრი ზოლი შეიქმნა და 2023 წლის ბოლოსთვის პროცესი სრულად დასრულდება“, - აღნიშნა ვიქტორ წილოსანმა.
წილოსანის თქმით, სატრანსპორტო რეფორმის მიზანი არ არის, რომ ადამიანები კერძო ავტომობილებიდან რომელიმე ტრანსპორტზე გადასვას. მათი მიზანია უსაფრთხო გადაადგილების და საგზაო ინფრასტრუქტურის შექმნა, იმისათვის, რომ საგზაო მოძრაობის ყველა მონაწილეს მიეცეს გადაადგილების თანაბარი შესაძლებლობა და ურბანული სივრცე გადანაწილდეს თანაბრად, რის შემდეგაც ადამიანმა თვითონ უნდა გადაწყვიტოს როგორ გადაადგილდეს, იქნება ეს ფეხით, ველოსიპედი თუ საზოგადოებრივი ტრანსპორტი.
წილოსანის თქმით, რა თქმა უნდა დაგვიანებული ავტობუსები არის პრობლემა და ეს ხდება იმიტომ, რომ დედაქალაქში დღეის მდგომარეობით 20 პრობლემური კვანძია, თუმცა აქედან 7 მიმდინარე ინფრასტრუქტურულ პროექტებზე მოდის, ხოლო დარჩენილ 13 პრობლემურ კვანძე ხდება ავტობუსების შეფერხდება.
„როდესაც ჭავჭავაძის გამზირზე პროექტთან დაკავშირებით ძალიან დიდი ვნებათაღელვა იყო, ზუსტად ამ დერეფნიდან გამომდინარე მგზავრთნაკადი 70%-ით გაიზარდა. როდესაც ავტობუსს გადაადგილებისთვის 25 წუთი სჭირდებოდა, დღეს ამ მანძილის დაფარვას 8 წუთი ჰყოფნის, რაც იმას ნიშნავს, რომ გადაადგილების დრო სამჯერ შემცირდა.
მნიშვნელოვანი პროცესია და როდესაც ეს პრობლემური 13 კვანძი მოწესრიგდება ავტობუსებს და მიკრო ავტობუსებს დაგვიანებები აღარ ექნებათ და შესაბამისად ავტობუსები სწრაფად იმოძრავებენ იმ ინფრასტრუქტურით რაც დღეის მდგომარეობით გაგვაჩნია, თუმცა ჩვენ ამაზე არ ვჩერდებით და რეფორმა მიმდინარე პროცესშია და როდესაც 200 ერთეული 18 მეტრიანი ავტობუსები შემოვა მგზავრთა გადაადგილებას 80%-ით გაზრდის. რაც შეეხება მოცდის დროს, დღეის მდგომარეობით მოცდის + მაქსიმალური დრო 5-7 წუთია, თუმცა ამ 13 კვანძზე ხდება შეფერხება“, - აღნიშნა ვიქტორ წილოსანმა.
რაც შეეხება საცობებს, წილოსანი ამბობს, რომ რეფორმის მიზანია, რომ ადამიანებმა ავტომობილებით სარგებლობა შეამცირონ, რადგან დღეს საქართველოში საზოგადოებრივი ტრანსპორტი დასახლებული პუნქტების 92% ფარავს, თუმცა ადამიანები 700 მეტრიან მანძილსაც კი საკუთარი ავტომობილებით ფარავენ.
„ჩვენზე განვითარებულ ქვეყნებში, მაგალითად ევროპის ქვეყნებში მოსახლეობის 70% ჰყავს ავტომობილი, მაგრამ მისი გამოყენების კოეფიციენტი არის დაბალი, ჩვენთან ავტომობილი მოქალაქეების ჰყავს მაგრამ გამოიყენებს 35%, ჩვენ უნდა შევამციროთ ავტომობილის გამოყენება და მივმართოთ ალტერნატიულ შესაძლებლობას.
დაახლოებით 100 000 ავტომობილი, ყოველდღიურად 1,5 კმ-ს ფარავს და 750 მეტრზე ნაკლები მანძილის დასაფარად ადამიანები ავტომობილს იყენებენ“, - აღნიშნა ვიქტორ წილოსანმა.
თაკო კვაჭანტირაძე