„სადაზღვევო ბაზრის ზრდა 18% -ია, რაც ბაზარს შეუძლია აკეთებს“ - ამის შესახებ, რადიო „კომერსანტის“ ეთერში სადაზღვევო ასოციაციის  ხელმძღვანელმა დევი ხეჩინაშვილმა განაცხადა. მისი თქმით ჯანმრთელობის დაზღვევის სექტორში მოცვა 7-8%-ით არის გაზრდილი, ასევე გაზრდილია ავტომობილების დაზღვევაც.

„ჩვენი საზოგადოება და ეკონომიკა განვითარებული ქვეყნების ეკონომიკებთან შედარებით 3-4-ჯერ ნაკლებად არის დაცული. ჩვენ 1.7 მილიონამდე მანქანა გვყავს რეგისტრირებული და აქედან მხოლოდ 140 000-ია დაზღვეული, ანალოგიური მდგომარეობაა ქონების დაზღვევის მიმართულებითაც. ჩვენ ქვეყანაში მოსახლეობის დიდ ნაწილს თავისი სახლ-კარი  დაზღვეული არ აქვს,  არადა  ძალიან სახიფათო ზონაში ვცხოვრობთ.

თურქეთ-სირიაში მომხდარმა მიწისძვრამ ყაზახეთში ქონების დაზღვევის მიმართ ინტერესის ზრდა გამოიწვია, საქართველოში არა.  სირთულეები არსებობს, თუმცა  ვიზრდებით, მაგრამ ნელი ტემპით და არა ისე, რომ ეკონომიკა და ხალხი დაცული იყოს.  ამისთვის  ველოდებით სხვადასხვა  ღონისძიებებს, რაც მთელმა მსოფლიომ  50-70 წლის  წინ  გაიარა. სადაზღვევო კულტურა საქართველოში ძალიან დაბალია.“ - აღნიშნა დევი ხეჩინაშვილმა.

ხეჩინაშვილმა მძღოლის პასუხისმგებლობის სავალდებულო დაზღვევაზეც ისაუბრა და განმარტა, რომ წლიურად საქართველოში 200 000 საავტომობილო შემთხვევა ხდება და სავალდებულო დაზღვევის შემთხვევაში ეს ადამიანები  ფინანსური ზარალისგან დაზღვეულები იქნებიან.

რაც შეეხება თავად სადაზღვევო ბაზარს, დევი ხეჩინაშვილი  აღნიშნავს, რომ 18 კომპანიიდან ბაზრის ძირითადი წილი 6-7 კომპანიაზეა გადანაწილებული, თუმცა ბაზარზე კონკურენციაა.

ხეჩინაშვილის თქმით, მას შემდეგ, რაც საქართველოში დაზღვევის მოცვა გაიზრდება ბაზარზე უცხოური  კომპანიებიც შემოვლენ. მისი განმარტებით, უცხოური კომპანიების შემოსვლის ძირითადი მეთოდი არსებული კომპანიების  შეძენაა და არა ახლის გახსნა.

„მე მოველი იმას, რომ ბაზარზე უცხოელები შემოვლენ, მათი შემოსვლის ძირითადი მეთოდი ადგილობრივი კომპანიების შეძენაა, ეს არის სერიოზული ინსტიტუციური  ინვესტორების სტილი. ცვლილებებს ველოდებით, მაგრამ ეს ცვლილებები მომხმარებლისთვის დადებითი იქნება და მათ კიდევ უფრო მეტ და კარგ პროდუქტს შესთავაზებს.

ჩვენი ბაზრის სისუსტე არის ის, რომ საცალო გაყიდვები ძალიან მცირეა, რომ შეხედო ჯანმრთელობის დაზღვევას ნახავ, რომ საცალო დაზღვევაში სულ 45 000 ადამიანია  ჩართული, ბაზარზე  ძირითადად  კორპორაციული დაზღვევა ჭარბობს.

წლების განმავლობაში ჩვენ ბაზარს მსხვილი მოთამაშეები აკვირდებიან და როდესაც იგივე პროცესს გავივლით, რაც გაიარა აღმოსავლეთ ევროპამ, ეს მსხვილი მოთამაშეები ჩვენ ბაზარზეც შემოვლენ და ბევრ სიკეთეს მოიტანენ“ -  აღნიშნა დევი ხეჩინაშვილმა.