„რეგიონში მიმდინარე ომის გამო ტვირთნაკადები  გაზრდილია. აქამდე ვამბობდით, რომ საქართველო სატრანზიტო ქვეყანაა, მაგრამ აღმოჩნდა, რომ არანაირი სატრანზიტო ქვეყანა ჩვენ არ ვართ“ -  ამის შესახებ საერთაშორისო კვლევებისა და პროგნოზირების ცენტრის ვიცე-პრეზიდენტმა ნიკა შენგელიამ რადიო „კომერსანტის“ გადაცემაში “პროფესიონალები“ ისაუბრა.

მისი თქმით, კარწახის გამშვები პუნქტი ტვირთნაკადებს ვერ აუდის, 10 და 15 კილომეტრიანი რიგებია და მალფუჭებადი საქონელი ფუჭდება. იგივე მდგომარეობაა ლარსზეც. კოლაფსს საქართველომ თავი ვერ გაართვა, საჭიროა დამატებითი მუშა-ხელი, ვინც ამ  ტვირთებს გაატარებს და აღრიცხავს.

„საჭიროა, რომ თუნდაც გამშვები პუნქტების მიმართულებით ინფრასტრუქტურაში ინვესტიციები ჩაიდოს, ასევე გააკეთონ ის ინფრასტრუქტურული პროექტები, რომელიც საქართველომ რიკოთის მიმართულებით დაიწყო და 2023 წელს უნდა დასრულებულიყო და ერთი წლით გადაწიეს. ეს პროექტები, რომ არ იყოს, საქართველოში ეკონომიკური ზრდა არ იქნებოდა. საქართველოში ეკონომიკა ვალის ხარჯზე იზრდება, ეს ვალი მიდის ინფრასტრუქტურაში და შემდეგ ეს ჩვენ შვილებს და  შვილიშვილებს დააწვება კისერზე. მოსახლეობას, რომ გონია მთავრობა  ბიუჯეტიდან აკეთებს ამ ყველაფერს ეს ასე არ არის, ვალით კეთდება.

აღმოჩნდა, რომ ანაკლიის პორტთან  დაკავშირებით მთავრობამ დაუშვა ძალიან დიდი შეცდომა. ისე  ვითარდება მდგომარეობა, რომ რუსეთს მინიმუმ ორი-სამი წელიწადი სანქციებს არავინ არ მოუხსნის. თუ აქამდე გვქონდა იმედი, რომ გაზაფხულზე ომი  დამთავრდებოდა, ამ მობილიზაციის გამოცხადებით ამის ნიშანწყალი აღარ ჩანს. სანქციები კი არ მოეხსნება რუსეთს კიდევ გაეზრდება და შეიძლება დაუბრუნდეს იმ დროს, როდესაც რკინის ფარდა იყო ჩამოფარებული. ამიტომ ჩვენი შესაძლებლობა იყო ეს პორტი, რაც  ჩვენ ხელიდან გავუშვით.  ჩვენ  ვხედავთ, რომ საქართველო  სატრანზიტო ქვეყნის  ფუნქციას  კარგავს. ვხედავთ, რომ  ეკონომიკური ცენტრი შესაძლოა სამ  წერტილში  გადანაწილდეს,  ესენია: ჩინეთი  ინდოეთი და აზიის რომელიმე ქვეყანა. დიდი  ცვლილების  წინაშე დავდექით და 2027 წლამდე ალბათ ეს ყველაფერი დამთავრდება და დავინახავთ თუ საით ვართ ჩვენ და სად იქნება ჩვენი განვითარების  ვექტორი“, -  აღნიშნა ნიკა შენგელიამ

თაკო კვაჭანტირაძე