აზერბაიჯანმა და საქართველომ ფოთისა და ბათუმის პორტებიდან ბაქოს პორტ ალათში საკონტეინერო ბლოკ-მატარებლის გაშვება, განრიგის კოორდინაცია და ტარიფების გაერთიანება განიხილეს, — ამის შესახებ აზერბაიჯანის ციფრული განვითარებისა და ტრანსპორტის სამინისტროში განაცხადეს.
გავრცელებული ინფორმაციით, საკითხი აზერბაიჯანის ტრანსპორტის მინისტრის რაშად ნაბიევის საქართველოს ვიცე-პრემიერთან, ეკონომიკისა და მდგრადი განვითარების მინისტრ ლევან დავითაშვილთან საქართველოში შეხვედრაზე განიხილეს.
„მსოფლიოში არსებული მკაცრი გეოპოლიტიკური სიტუაციიდან გამომდინარე, იზრდება მოთხოვნა და ინტერესი შუა დერეფნის მიმართ. ჩვენი ქვეყნები - აზერბაიჯანი, თურქეთი და საქართველო, ამ დერეფნის მნიშვნელოვანი ნაწილია. დღეს ჩვენ შევიკრიბეთ ამ დერეფნის ერთ-ერთი მნიშვნელოვანი პროექტის - ბაქო-თბილისი-ყარსის სარკინიგზო ხაზის განსახილველად. ჩვენი მიზანია გავზარდოთ ამ დერეფნის ეფექტურობა ისეთი საკითხების გადახედვით, როგორიცაა ტარიფების რეგულირება, ბლოკ-მატარებლების გაერთიანება და საზღვრების გასწვრივ რეგულაციებისა და აქტივობების სინქრონიზაცია“, - განაცხადა აზერბაიჯანის ციფრული განვითარებისა და ტრანსპორტის მინისტრმა რაშად ნაბიევმა საქართველოში გამართული სამმხრივი შეხვედრის შემდეგ, რომლის მთავარი თემაც საქართველოს, აზერბაიჯანისა და თურქეთის სატრანსპორტო დერეფნის განვითარება და კონკურენტუნარიანობის ზრდა იყო.
როგორც „კომერსანტს“ „საქართველოს რკინიგზაში“ განუცხადეს, სარკინიგზო გადაზიდვებში საკონტეინერო გადაზიდვები, არის და იქნება პრიორიტეტული მიმართულება.
„ბოლო წლებში მიდგომები ტვირთების კონტეინერიზაციის მიმართულებით მნიშვნელოვნად იცვლება, შესაბამისად იზრდება გამართული მულტიმოდალური (ერთობლივად სარკინიგზო, საზღვაო, საავტომობილო) გადაზიდვების საჭიროება.
„საქართველოს რკინიგზა“ ამ მიმართულებით, აზერბაიჯანის, შუა აზიის ქვეყნების რკინიგზებთან და პორტებთან ერთად რამოდენიმე წელია მუშაობს და საკმაოდ კარგი მაჩვენებლები გვაქვს გადაზიდული კონტეინერების მოცულობებში“, - განმარტავენ „საქართველოს რკინიგზაში“.
სტატისტიკა ასე გამოიყურება. კონტეინერების გადაზიდვები ბაქოს პორტიდან და პირიქით:
გადაზიდვის მიმართულება |
კონტეინერების რაოდენობა, ტეუ |
||||
2021 Y |
2021 6M |
2022 6M |
ზრდა 6M |
% |
|
გარდაბნიდან მიღებული |
18,758 |
8,822 |
12,359 |
3,537 |
40% |
გარდაბნიდან გასული |
13,264 |
6,150 |
6,767 |
617 |
10% |
სულ |
32,022 |
14,972 |
19,126 |
4,154 |
28% |
კომპანიის განმარტებით, დღეისთვის უკვე შეთანხებულია საკონტეინერო ბლოკმატარებლის გრაფიკი და იგი იმოძრავებს ყოველდღიურად. ხოლო სატარიფო პირობები გაწერილია ორმხრივი შეთანხმებით „აზერბაიჯანის რკინიგზასთან“ ერთად.
„არსებული გეოპოლიტიკური და მაკროეკონომიკური სიტუაციის გათვალისწინებით, ჩვენს დერეფანში ახალი ტვირთნაკადების გატარების პერსპექტივები მნიშვნელოვნად იმატებს. დერეფნის სრულად დატვირთვის და მეტი ტვირთის გატარების მიზნით კი საჭიროა სარკინიგზო გადაზიდვების და მთლიანი ლოგისტიკის ვადების შემცირება. ამ მიზნებისთვის საკონტეინერო ბლოკმატარებლის ფუნქციონირება, მკაცრად გაწერილი გრაფიკით და პირობებით მეტად მნიშვნელოვანია, როგორც საკონტეინერო ისე სავაგონო გადაზიდვების მატების კუთხით. საბოლოო ჯამში კი ზემოაღნიშნული ჩვენი დერეფნის გამტანუნარიანობის გაზრდას შეუწყობს ხელს“, - აცხადებენ „საქართველოს რკინიგზაში“.
შეგახსენებთ, რომ თბილისში გამართულ სამხრივი (საქართველო, თურქეთი, აზერბაიჯანი) შეხვედრის მონაწილეებმა აღნიშნეს, ბოლო პერიოდში განვითარებული პოლიტიკურ-ეკონომიკური მოვლენების ფონზე სულ უფრო იზრდება აზიისა და ევროპის დამაკავშირებელი სატრანზიტო-სატრანსპორტო დერეფნის მნიშვნელობა და მისი განვითარების საკითხი, ის აღმოსავლეთისა და დასავლეთის დამაკავშირებელი ერთ-ერთ ყველაზე მიმზიდველი მარშრუტი ხდება.
„თურქეთის, საქართველოსა და აზერბაიჯანის თანამშრომლობა სატრანზიტო, სატრანსპორტო, ლოგისტიკური მიმართულებით არის უმნიშვნელოვანესი. შეხვედრაზე კონკრეტული გადაწყვეტილებები იქნა მიღებული, რომლებიც, რა თქმა უნდა, ხელს შეუწყობს დერეფნის კონკურენტუნარიანობას საშუალო და გრძელვადიან პერსპექტივაშიც. ჩვენ განვიხილეთ არსებული მიმდინარე, კონკრეტული პრობლემები და გადაჭრის გზებიც დაისახა იმისთვის, რომ ტვირთბრუნვა დაჩქარდეს, რაც საშუალებას მოგვცემს, რომ კიდევ უფრო მეტი ტვირთი გადავზიდოთ საქართველოს, აზერბაიჯანისა და თურქეთის ინფრასტრუქტურის გამოყენებით და საბოლოოდ, შევქმნათ არსებული სატრანზიტო-სატრანსპორტო მარშრუტების რეალური ალტერნატივა“, - განაცხადა საქართველოს ვიცე-პრემიერმა ლევან დავითაშვილმა.
მინისტრებმა შეხვედრაზე განიხილეს არსებული მდგომარეობა, შემდგომი განვითარების პერსპექტივები და მიმართულებები და მიიღეს გადაწყვეტილებები, რომლებიც გულისხმობს აზერბაიჯანის, საქართველოს და თურქეთს შორის სარკინიგზო მაგისტრალით გადაზიდვების გაზრდას და ბაქო-თბილისი-ყარსის ახალი სარკინიგზო მაგისტრალის პროექტის მშენებლობის დროულ დასრულებას.