პურზე ფასის ცვლილება მოსალოდნელი არ არის - ამის შესახებ პურ-პროდუქტების მწარმოებელთა ასოციაციის ხელმძღვანელმა განაცხადა.
მალხაზ დოლიძე ამბობს, რომ ფქვილის იმპორტის მკვეთრმა ზრდამ, ბაზარზე კონკურენტული გარემო შექმნა, რაც მისასალმებელია.
„პურ-პროდუქტებში დღეს მდგომარეობა ისეთია, როგორიც არასოდეს ყოფილა. ვგულისხმობ ფქვილის მომარაგების კუთხით. მეწარმეებს გვაქვს არჩევანის საშუალება როგორც ხარისხში, ასევე ფასში. ასეთი რამ, აქამდე არ ყოფილა. რაც შეეხება პურის ფასს, ის სტაბილურია. ამ მოცემულობით, პურზე ფასის ზრდა არ იგეგმება. მე არ ვიცი, რამდენხანს გასტანს ფქვილის ამ სახის ექსპორტი, მაგრამ ეს მოცემულობა ჩვენთვის მისაღებია.
როგორც მეწარმეს მესმის, რომ ღირებულებათა ჯაჭვს ადგილობრივი წარმოება მეტად ქმნის. მათ შორის, ფქვილის მწარმოებლები აწარმოებენ ქატოსაც. მე, როგორც ინფორმაცია მაქვს, სულ რამდენიმე დღეში უნდა შემოვიდეს გემი, რომელმაც უნდა შემოიტანოს აშშ-დან კომბინირებული საკვებისთვის არსებული მასალა, რომელსაც წისქვილ-კომბინატები გადაამუშავებენ“, - განაცხადა მალხაზ დოლიძემ მედიაცენტრ „მთავარში“ გამართულ პრესკონფერენციაზე.
კითხვაზე, არის თუ არა კმაყოფილი ბაზარზე არსებული რეალობით, დოლიძე პასუხობს, რომ კი.
,,ბაზარზე კონკურენტული ფასებისა და ამით, რა თქმა უნდა, როგორც პურის მცხობელი, კმაყოფილი ვარ. ყველას გასაგონად მინდა ვთქვა, საქართველოში, მთელს რეგიონში საუკეთესო ფასებია პურზე“, - თქვა დოლიძემ.
შეგახსენებთ, 15 დეკემბრიდან რუსეთში ხორბლის საექსპორტო გადასახადი 84.9 დოლარიდან 91 დოლარამდე გაიზრდება. ინფორმაციას რუსული გამოცემები რუსეთის სოფლის მეურნეობის სამინისტროზე დაყრდნობით ავრცელებენ. ფქვილზე კი მსგავსი საბაჟო გადასახადი არ არსებობს.
bpn.ge