„ჩვენთვის მთავარი ხარისხია და  სწორედ ამის გამო ხდება, რომ დიდი რაოდენობით ყურძენს არ ვაწარმოებთ“ - ამის შესახებ , რადიო „კომერსანტის“ გადაცემაში, „კომერსანტის დილა“ მეღვინეობის „ქიზიყური ტრადიციული“ დამფუძნებელმა მარი ღვედაშვილმა ისაუბრა. მისი თქმით, ღვინის ხარისხი ყურძნის მოვლიდან იწყება, შესაბამისად თუ  ყურძენი ხარისხიანია, ღვინოც ხარისხიანი იქნება.

„მე ვიცი ჩემი შესაძლებლობები, თუ რამდენი ხარისხიანი ღვინის წარმოება შემიძლია. შესაბამისად, მცირე მარანი მაქვს და მცირე რაოდენობით ვაწარმოებ და ამას ტურისტებიც ხედავენ.  თავიდან ფიქრობენ, რომ ქვევრის  ღვინო მძიმე დასალევი უნდა იყოს, მაგრამ როდესაც სინჯავენ ამბობენ, რომ არის ძალიან სასიამოვნო დასალევი და კარგი არომატები აქვს.

ჩვენი ძირითადი ვიზიტორები არიან აშშ-დან, იყვნენ იტალიიდან, საფრანგეთიდან. ახლა აშშ-სთან კონტრაქტზე ვმუშაობ და ძალიან მალე დაახლოებით 6 თვეში რეგისტრაცია იქნება დასრულებული, რათა ჩვენი ღვინის რეალიზაცია აშშ-ში მოხდეს“, - აღნიშნა მარი ღვედაშვილმა.

ღვედაშვილის  თქმით, მეღვინეობას  „ქიზიყური ტრადიციული“ არაერთ  ფესტივალში აქვს მონაწილეობა მიღებული და არაერთი ჯილდოს  მფლობელია. მისივე თქმით, სწორედ ეს  ჯილდოები  გახდა სტიმული იმისა, რომ უფრო ხარისხიანი ღვინო ეწარმოებინა და პროდუქტი რაც  შეიძლება  მეტი ადამიანისთვის  ყოფილიყო მოსაწონი.

„ზოგადად ფესტივალებზე  ხდება ახალი პარტნიორების ძიებაც, სწორედ ერთ-ერთი ასეთია გურჯაანის  ღვინის ფესტივალი, სადაც გერმანელი მეღვინეები გავიცანი. მათ დააგემოვნეს ჩვენი ღვინო და სამომავლო კონტრაქტზეც ვისაუბრეთ. როგორც მივხვდი თანამშრომლობას  გეგმავენ. ძალიან ბევრი ინფორმაცია წაიღეს ჩემგან და ძალიან მალე, დაახლოებით ერთ თვეში კონტაქტზე გამოვლენ, რომ ჩვენი თანამშრომლობა შედგეს“, - აღნიშნა მარი ღვედაშვილმა.

ღვედაშვილმა ინფლაციაზეც ისაუბრა და განმარტა, რომ მიუხედავად  იმისა, რომ ყველაფერი, მათ შორის  ბოთლები, ეტიკეტები, საცობები და ა.შ. გაძვირებულია, მეღვინეობა „ქიზიყური ტრადიციული“ ცდილობს რომ ფასები დაიჭიროს და ღვინო არ გააძვიროს.

„ღვინის  საბოლოო ფასზე ბიოპრეპარატებმა და ზოგადად  ყველაფრის გაძვირებამ იმოქმედა, ბოთლის, ეტიკეტის და სხვა ყველაფრის ღირებულება გაძვირებულია. პირველი  ჩამოსხმა 2018 წელს გვქონოდა და იმის მერე რასაც  ვაკვირდები ფასები საკმაოდ გაზრდილია და მე მაქსიმალურად ვცდილობ, რომ 2018 წელსა და  წლევანდელ ჩამოსხმულ ღვინოებს შორის ბალანსი დავიჭირო, მაგრამ როდემდე გამომივა ვერ გეტყვით“, - აღნიშნა მარი ღვედაშვილმა.

მეღვინეობაა „ქიზიყური ტრადიციული“ ღვინის  წარმოება დედოფლისწყაროში მარი ღვედაშვილის საოჯახო ვენახებიდან დაიწყო.  თავდაპირველად ოჯახს ბიო წარმოება ჰქონდა. თუმცა 2 ჰექტარ ვენახი საოჯახო სარგებლობისთვის ძალიან დიდი აღმოჩნდა და გადაწყვიტეს, რომ ბიზნესის სახე მიეცათ. როგორც მარი ღვედაშვილი აღნიშნავს, ოჯახის გადაწყვეტილება იყო ის, რომ ბიზნესს სათავეში მარიამი ჩადგომოდა და ამით ის სტერეოტიპი დაემსხვრია, რომ ღვინოს მხოლოდ კაცები აწარმოებენ.