საქართველოს ეროვნული ბანკი (სებ) ციფრული ლარის საპილოტე პროგრამის ჩაშვებას მომავალი წლიდან გეგმავს. ციფრული ლარის გამოყენება საწყის ეტაპზე მხოლოდ საქართველოს ფარგლებში, საცალო ვაჭრობის ბაზარზე იქნება შესაძლებელი. სებ-ის ინფორმაციით, მისი მანდატი ფასებისა და ფინანსური სტაბილურობის უზრუნველყოფაა, ხოლო ციფრული ტექნოლოგიების განვითარებამ ცენტრალური ბანკის ფულის განვითარებისა და ლარის ციფრული ვერსიის შექმნის აუცილებლობა გამოკვეთა, რათა ის უკეთ მოერგოს ციფრულ ეკონომიკას და ეკონომიკური პოლიტიკის ეფექტიანობა გაზარდოს. ეროვნული ბანკში ასევე აღნიშნავენ, რომ CBDC-ს (ცენტრალური ბანკის ციფრული ვალუტა, Central Bank Digital Currency) გადახდის საშუალების სტატუსი ექნება.

მიიღე ინფორმაცია უფრო სწრაფად „კომერსანტის“  Telegram-ზე.

ციფრული ლარის პროექტთან დაკავშირებით სებ-ი ათობით სხვადასხვა ტექნოლოგიურ კომპანიას უკვე შეხვდა და შესაძლო ტექნიკური სისტემები განიხილა. ეროვნული ბანკის ინფორმაციით, ახლა მიმდინარეობს შიდა სამუშაოები, რომ ჩამოყალიბდნენ კონკრეტულ ფორმატზე, მასშტაბზე და მომავალი წლის განმავლობაში უკვე საპილოტე პროექტის ამუშავება დაიწყოს.

„ციფრული ტექნოლოგიების განვითარებამ ცენტრალური ბანკის ფულის განვითარების და ლარის ციფრული ვერსიის შექმნის აუცილებლობა გამოკვეთა, რათა ის უკეთ მოერგოს ციფრულ ეკონომიკას და გაზარდოს ეკონომიკური პოლიტიკის ეფექტიანობა. ციფრული ლარით გვინდა ახალი, კომფორტული, თანამედროვე ტექნოლოგიებზე მორგებული გადახდის საშუალება შევქმნათ. საწყის ეტაპზე, ვაკეთებთ საპილოტე ვერსიას, რადგან სარგებელი, რომელზეც ციფრული ლარის შემთხვევაში ვსაუბრობთ, პოტენციურია. ჩვენ გვინდა, რომ რეალურად შევისწავლოთ ეს მოდელი პრაქტიკაშიც იმუშავებს თუ არა. მომავალი წლიდან ციფრული ლარის საპილოტე ვერსიას გამოვუშვებთ, რომლის შედეგებსაც დეტალურად შევისწავლით და გადავწყვეტთ ღირს თუ არა საბოლოოდ ამ ციფრული ვალუტის მასშტაბურად დანერგვა“, - განაცხადა სებ-ის ვიცე-პრეზიდენტმა პაპუნა ლეჟავამ.

ფინტეკ ასოციაციის ხელმძღვანელი დავით კიკვიძის თქმით, ციფრული ლარი ბანკებს კონკურენციას რამდენიმე მიმართულებით გაუწევს, თუმცა მათ ფინანსურ სექტორში მაინც მთავარი ადგილი ექნებათ.

„ციფრული ლარი ეროვნული ბანკისთვის გარკვეული ბერკეტი იქნება მონეტარული პოლიტიკის განხორციელების თვალსაზრისით და მას აღარ დასჭირდება ბანკები იმისთვის, რომ ფულის ერთობლივ მოთხოვნაზე გარკვეული ზემოქმედება მოახდინოს. გარკვეულწილად ციფრული ლარი ბანკებს კონკურენციას გაუწევს, იმ მხრივ რომ ციფრული ვალუტის შემთხვევაში საბანკო სექტორი შუამავლად აღარ მოგვევლინება და მას რაღაცეების დათმობა მოუწევს. ეს შესაძლოა ბანკების შევიწროებას გავდეს, თუმცა საბანკო სექტორს განსაკუთრებული ადგილი უკავია ფინანსურ სექტორში და როგორც არ უნდა განვითარდეს ციფრული ვალუტა, ბოლომდე ჩვეულებრივი ვალუტის ჩანაცვლება ვერ მოხდება, რადგან ნაღდი ფულის მოძრაობა ძალიან მაღალია და წლების განმავლობაში ეს მაინც შენარჩუნდება. მეორე ვარიანტია თუ ბანკებიც გადმოერთვებიან ციფრულ ვალუტაზე და ჩაერთვებიან ამ ზოგად მიმოქცევაში. შესაძლოა რაღაც ეტაპზე საბანკო სექტორი ცოტა შევიწროვდეს, თუმცა მათი ჩანაცვლება ასე მარტივად ვერ მოხდება“, - ამბობს დავით კიკვიძე.

დღეისათვის ჩინეთს, კარიბის ზღვის აუზის ქვეყნებს, იაპონიას და ევროპის წამყვან ქვეყნებს აქვთ გამოშვებული ციფრული ვალუტა და ის სატესტო რეჟიმშია. აღსანიშნავია, რომ ამ ეტაპზე მსოფლიოში ცენტრალური ბანკების 85% უკვე მუშაობს ციფრულ ვალუტაზე, ზოგიერთი კი კვლევით ეტაპზეა.