რუსეთში დღეს გაზის გათხევადების გიგანტური ტერმინალი შენდება. მისი ღირებულება 17 მლრდ. ევროს შეადგენს და სავარაუდოდ, ამ პროექტში გერმანიის სახელმწიფო მონაწილეობს.
პროეცესი ძალიან აქტიურად მიმდინარეობს და სავარაუდოდ, ტერმინალი მუშაობს უკვე 2023 წელს დაიწყებს. ამისთვის გიდანის ნახევარ კუნძულზე კონცერნ „ნოვატეკის“ შეკვეთით ხორციელდება მეგაპროექტი, რომელიც თავისი მასშტაბებით სკანდალურ „ჩრდილოეთ ნაკად-2“-საც კი აღემატება.
მაშინ, როდესაც მილსადენის პროექტი მწვავე დისკუსიების და მაღალი პოლიტიკის სუბიექტი გახდა, ტერმინალის ირგვლივ საერთაშორისო არენაზე სრული დუმილია, ისე, თითქოს ეს პროექტი არც არსებობს.
ამის ახსნა მარტივია - ამ საწარმოდან თხევადი გაზი არა ევროპაში, არამედ აზიაში, ძირითადად ჩინეთში წავა.
შესაძლოა ეს გერმანიის მთავრობის დახმარებით მოხდეს. ჯერ კიდევ გასული წლის შემოდგომაზე მედიაში გავრცელდა ინფორმაცია იმის თაობაზე, რომ საფრანგეთის საექსპორტო-საკრედიტო სააგენტო BPI პროექტის 700 მლნ. დოლარის გარანტიას აძლევს. მასში ასევე ფრანგული ნავთობგიგანტი Total-ია ჩართული.
ტერმინალის მშენებლობას 1 მლრდ.დოლარის გარანტიას ასევე იტალია აძლევს.
პროექტში ბერლინის კვალიც ჩანს - მასში მონაწილეობს გერმანული კონცერნი Linde, რომელიც გაზის შეთხელების აღჭურვილობას აწარმოებს. გერმანიის მთავრობა მას სესხის მიღებაში დაეხმარა და 300 მლნ-ის გარანტია სესხების დამზღვევ კომპანია Euler Hermes-ს გადაურიცხა - ამით ოფიციალური ბერლინი ამ მეგაპროექტში პირდაპირ თუ ირიბად ჩაერთო.
გერმანიის მთავრობის პოზიციას მწვავე კრიტიკაც მოჰყვა - ამ დღეებში კანცლერმა ანგელა მერკელმა და ეკონომიკის მინისტრმა პეტერ ალტმაიერმა ამ საკითხზე წერილი ბრიუსელიდან მიიღეს - არა ევროკომისიის, არამედ გერმანიის, საფრანგეთის და იტალიის 40 „მწვანე“ ევრო დეპუტატისგან.
მიმართვა ასევე რომში და პარიზში გაიგზავნა და მისი ავტორები რუსული პროექტის მხარდაჭერას სერიოზულ პრობლემად მიიჩნევენ - მათი აზრით, ეს მხარდაჭერა სერიოზულ შეშფოთებას იწვევს მის მიერ ბუნებისთვის ზიანის მიყენების გამო.
„პროექტი არც ევროპულ კლიმატურ პოლიტიკას და არც კლიმატის საკითხებში პარიზის შეთანხმების პირობებს არ შეესაბამება. ევროპის ქვეყნებმა ნავთობისა და გაზის სექტორში ახალი პროექტების ხელშეწყობისგან თავი უნდა შეიკავონ“ - მიიჩნევენ დეპუტატები.
გერმანიის ფედერალური მთავრობაში ამ საკითხზე ყოველგვარი კომენტარებისგან თავს იკავებენ - ეკონომიკის სამინისტროს ინფორმაციით კი, საკითხი განხილვის სტადიაზეა, და არანაირი გადაწყვეტილება ჯერ მიღებული არაა.
„ამ გარანტიის გაცემაზე მხოლოდ ერთი გადაწყვეტილების მიღებაა შესაძლებელი - ფედერალურმა მთავრობამ ამ მავნე პროექტში ყოველგვარ მონაწილეობაზე უარი უნდა თქვას“ - მიიჩნევს არასამთავრობო ორგანიზაციის Urgewald-ის ხელმძღვანელი რეგინა რიხტერი.