გარემოს დაცვისა და სოფლის მეურნეობის მინისტრი ოთარ შამუგიამ საერთაშორისო ორგანიზაციის „სოფლის მეურნეობაში ახალი საზღვრების დადგენა“ (CNFA) პრეზიდენტ სილვან როის აქტიური მხარდაჭერისთვის მადლობა გადაუხადა და ქვეყანაში სოფლის მეურნეობის განვითარების ხელშემწყობ პროგრამებზე ისაუბრა. მინისტრმა CNFA-ის ახალ პროგრამაზე „ამერიკის შეერთებული შტატების საერთაშორისო განვითარების სააგენტოს (USAID) ძლიერი სოფლის პროგრამა“ გაამახვილა ყურადღება, რომელიც საოკუპაციო ხაზთან მდებარე სოფლების განვითარებას და ადგილობრივი მოსახლეობისთვის სოციალური კეთილდღეობის გაუმჯობესებას ისახავს მიზნად.
ოთარ შამუგიამ შეხვედრაზე ხარისხიანი ხორბლის წარმოების და ქართული ღვინის ამერიკულ ბაზარზე პოპულარიზაციის პრიორიტეტულობას გაუსვა ხაზი. როგორც მინისტრმა აღნიშნა, ქვეყანაში ხარისხიანი და კონკურენტუნარიანი პროდუქციის წარმოებისთვის, განსაკუთრებით მნიშვნელოვანია ცოდნის გაზიარება და თანამედროვე ტექნოლოგიების დანერგვა.
სილვან როიმ შეხვედრაზე განაცხადა, რომ CNFA მხარს დაუჭერს საქართველოს ღვინის ამერიკის ბაზარზე დივერსიფიკაციის კუთხით. ასევე, კვლავ გაგრძელდება წარმოებაში საერთაშორისო სერტიფიცირების მიმართულებით მხარდაჭერა, ხელი შეეწყობა ქვეყანაში წარმოების შესაძლებლობების ზრდას, ეფექტიანობას და საერთაშორისო სტანდარტების ხარისხს. USAID-ის მხარდაჭერა შესაძლებლობას მისცემს მწარმოებლებსა და გადამმუშავებლებს თანამედროვე წარმოების, გადამუშავების, დასაწყობების და სადისტრიბუციო ტექნიკის საშუალებით, გაზარდონ დამატებითი ღირებულება და დაამყარონ ადგილობრივი და საერთაშორისო საბაზრო კავშირები.