თბილისში, უზნაძის ქუჩაზე ახალი რესტორანი „ნინიას ბაღი იხსნება.

როგორც რესტორნის დამფუძნებელი, ცნობილი შეფმზარეული მერიკო გუბელაძე „კომერსანტს“ უცხადებს, რესტორანი სტუმრების მიღებას ოქტომბრის დასაწყისში შეძლებს.

„თავდაპირველად, სივრცის გახსნის იდეა ადგილის ნახვის შემდეგ გაგვიჩნდა. უზნაძეზე არის ძველებური, თბილისური სახლი ულამაზესი ბაღით, რომელიც წინა საუკუნის დასაწყისში აშენდა. რა თქმა უნდა, დიზაინიც ამ მოცემულობას მოეგრება და უფრო ქალაქური და სადა იქნება. რესტორანს კი ოქტომბრის დასაწყისში გავხსნით.“ - განმარტავს მერიკო გუბელაძე.

რესტორანი, რომლის საინვესტიციო ბიუჯეტი 200 000 აშშ. დოლარია, მისულ სტუმრებს შუა აღმოსავლური ელემენტებით გაჯერებული ქართული კერძებით გაუმასპინძლდება.

„იმ შუა აღმოსავლურ კერძებს, რაც ქართულ სამზარეულოს აქვს, ჩვენს რესტორანში აუცილებლად შემოვიტანთ. შესაბამისად, გვექნება ქართული კერძები შუა აღმოსავლური დატვირთვით.

რაც შეეხება საფასო სეგმენტს, ყველაფერი შედარებითია, თუმცა ვთვლი, რომ ხელმისაწვდომი იქნება.“ - აღნიშნავს მერიკო გუბელაძე

„შავი ლომის“, „ლეილასა“ და „ლისი რესტის“ შემდეგ „ნინიას ბაღი“ შეფ-მზარეულისა და რესტორატორის მერიკო გუბელაძის მიერ დაფუძნებული მეოთხე რესტორანია.

ანი ცარციძე