იმ ფაქტმა, რომ Coca-Cola გაეროს კლიმატის ცვლილების კონფერენციის (COP27) სპონსორია, კლიმატის დამცველი აქტივისტების წინააღმდეგობა გამოიწვია. Financial Times-ის ინფორმაციით Coca-Cola პლასტმასით გარემოს ერთ-ერთი უდიდესი დამბინძურებელია.

Coca-Cola COP27-ის მხარდაჭერას ეკოლოგიური მიზნებით ხსნის. კომპანიის წარმომადგენლები განმარტავენ, რომ 2030 წლამდე სურთ, რომ ნახშირბადის აბსოლუტური ემისიები 25%-მდე შეამცირონ და მათი ამბიციაა, რომ 2050 წლისთვის ეს მაჩვენებელი განულდეს.

2019-2021 წლებში Coca-Cola-მ პლასტმასის მოხმარება 8,1 %-ით 3,2 მილიონ ტონამდე გაზარდა. ახალი მონაცემები აჩვენებს, რომ სასმელების კომპანიები, მათ შორის PepsiCo, უფრო მეტ არარეციკლირებად პლასტმასას იყენებენ. ეს კი ეჭვქვეშ აყენებს პლასტმასის მოხმარების შემცირების ვალდებულების აუცილებლობას, წერს Financial Times-ი.

ელენ მაკარტურის ფონდის მონაცემებით 2021 წელს, Coca-Cola, PepsiCo და Walmart-ი გარემოს პლასტმასით ყველაზე დიდ დამბინძურებლებს შორის იყვნენ. PepsiCo-მ 2021 წელს წინა წელთან შედარებით პლასტმასის გამოყენება 4,5%, Walmart-მა - 3,4 %-ით გაზარდა. კომპანიები Unilever, Danone და Nestlé კი პლასტმასის გამოყენებას ამცირებენ.

შეგახსენებთ, რომ გაეროს კლიმატის ცვლილების კონფერენცია (COP27) შარმ-ელ-შეიხში (ეგვიპტე) დღეს გაიხსნა და 18 ნოემბერს დაიხურება.

მოამზადა მაკა ბიბილაშვილმა