რუსეთში Coca-Cola-ს პროდუქცია შესაძლოა, პარალელური იმპორტით შეიტანონ. ამის შესახებ რუსეთის ბიზნესომბუდსმენმა, ბორის ტიტოვმა TASS-ს განუცხადა.

„Coca-Cola-ს პროდუქციის მშვიდად შემოტანას პარალელური იმპორტით, ხოლო შეძენას თუნდაც Alibaba-ს მეშვეობით შევძლებთ,“ - აცხადებს ტიტოვი.

9 მარტს Coca-Cola-მ გამოაცხადა, რომ უკრაინის ომის გამო რუსეთში ბიზნესს აჩერებს. კომპანიის კონკურენტმა, PepsiCo-მ, ასევე, გადაწყვიტა ქვეყანაში სასმელების რეკლამირება და გაყიდვები შეწყვიტოს. რუსეთსა და უკრაინაში 2021 წელს Coca-Cola-ს სუფთა საოპერაციო შემოსავალმა მთლიანი შემოსავლის 1%-დან 2%-მდე შეადგინა. 2018 წელს ქვეყნის მშპ-ში კომპანიის წვლილმა 0,2%, 195 მლრდ რუბლზე (3 451 316 316 დოლარზე) მეტი შეადგინა. Coca-Cola-ს რუსეთში 7000 ადამიანი ჰყავს დასაქმებული.

16 ივნისს Coca-Cola-მ რუსეთში სასმელისა და სხვა პროდუქტების წარმოება-რეალიზაცია შეწყვიტა. ამჟამად Coca-Cola-ს დისტრიბუტორი, HBC და მისი მომხმარებლები პროდუქციის მარაგს ყიდიან. მისი ამოწურვის შემდეგ Coca-Cola HBC რუსეთის ბაზარზე წარმოდგენილი აღარ იქნება.

McDonald’s-ის შემსყიდველი, სწრაფი კვების ქსელ „ვკუსნო ი ტოჩკას“ მფლობელი, ალექსანდრე გოვორი ამბობს, რომ მარაგში Coca-Cola ჯერ დარჩენილი აქვთ, ხოლო შემდეგ შემცვლელს ტენდერით შეარჩევენ. რუსეთში Coca-Cola-სა და Fanta-ს ანალოგები შესაძლოა, Funky Monkey Cola და Orange გახდეს.

ბორის ტიტოვი ამბობს, რომ Coca-Cola-ს პროდუქციისგან განსხვავებით, ტექნოლოგიური მოწყობილობების პარალელური იმპორტით რუსეთში შეტანა გაცილებით რთული მექანიზმია. მას მიაჩნია, რომ ამ გზით ქვეყანაში სათადარიგო ნაწილების თვითმფრინავებისთვის შეტანა შეუძლებელი, ხოლო ავტომანქანებისთვის შესაძლებელია.

წყარო: bpn.ge