ახალი ტიპის კორონავირუსის შესახებ მსოფლიომ იანვარში ჩინეთისგან შეიტყო. მას შემდეგ ის 216 სახელმწიფოსა თუ დამოკიდებულ ტერიტორიაზე გავრცელდა, 38 მლნ-ზე მეტი ადამიანი დააინფიცირა, 1 მლნ-ზე მეტი შეიწირა, შეზღუდვების შედეგად დამდგარმა ეკონომიკურმა ზარალმა  5 ტრლნ-ს გადააჭარბა, რომელიც შესაძლოა საშუალოვადიან პერიოდში უფრო მეტი ადამიანის გარდაცვალების მიზეზი გახდეს ვიდრე უშუალოდ COVID 19.

მარტამდე ვირუსით ინფიცირების შემთხვევათა 90%-ზე მეტი ჩინეთში ფიქსირდებოდა. შეთქმულების თეორიაც კი გაჩნდა, რომლის მიხედვით კოვიდი ისე იყო გამოყვანილი ლაბორატორიაში, რომ მხოლოდ ჩინელს აავადებდა და სხვა ეროვნების ადამიანს რომც შეხვედროდა არ მოკლავდა.

რეალურად 27 მარტს დაინფიცირებულების რაოდენობით ჩინეთს პირველად იტალიამ გაუსწრო, შემდეგ ესპანეთმა, საფრანგეთმა და კიდევ 47-მა სახელმწიფომ. ამჟამად 85 622 დადასტურებული შემთხვევით ჩინეთი 51-ე ადგილზეა და მისი წილი მსოფლიო სტატისტიკაში 0.22%-ს შეადგენს. მას მოსახლობით საქართველოზე პატარა ყატარიც კი უსწრებს. ბოლო 7 თვეში ჩინეთში კოვიდით 5000-ზე ნაკლები ადამიანი დაავადდა, რაც ერთ-ერთი საუკეთესო მაჩვენებელია მსოფლიოში.

ინფიცირების შემთხვევათა რაოდენობა 15 ოქტომბრის მდგომარეობით 1 მლნ-ს 4 სახელმწიფოში აჭარბებს: აშშ - 8.15 მლნ, ინდოეთი - 7.31 მლნ, ბრაზილია - 5.14 მლნ და რუსეთი - 1.35 მლნ. ამ უკანასკნელში მას შემდეგ რაც მსოფლიოს ვაქცინის გამოგონების შესახება ამცნეს დღიური შემთხვევათა რაოდენობა 175%-ით გაიზარდა. პლანეტის ინფიცირებულთა 56.6% სწორედ ამ ოთხ ქვეყანაშია აღრიცხული. მათ გარდა COVID 19 ლაბორატორიულად 100 ათასზე მეტ ადამიანს კიდევ 40 ქვეყანაში დაუდასტურდა.

განსხვავებულ სურათს მივიღებთ, თუ ინფიცირებულთა რაოდენობას მოსახლეობის რაოდენობის გათვალისწინებით დავითვლით. ამ მოცემულობით 1-ელ ადგილს ყატარი დაიკავებს. 2.8 მლნ-იან ქვეყანაში კორონავირუსი 128 600 ადამიანს დაუდასტურდა, რაც 1 მლნ-დან 45 800-ს ნიშნავს, ანუ პრაქტიკულად ყოველ 22-ე ადამიანს. ყატარი სხვა მხრივაც გამორჩეულია, გარდაცვლილთა რაოდენობა 220-ს შეადგენს, სიკვდილიანობის კოეფიციენტი - 0.17%-ს. მსოფლიოს რომ სიკვდილიაონობის ყატარის დონე შეენარჩუნებინა ახლა კოვიდით გარდაცვლილთა რაოდენობა 1.1 მლნ-ს მაგივრად 16.7-ჯერ ნაკლები - 66 ათასი იქნებოდა.

მიუხედავად იმისა, რომ ინდოეთი ინფიცირებულთა საერთო რაოდენობის მხრივ მეორე ადგილზეა და მალე შეერთებულ შტატებსაც გადაასწრებს, მოსახლეობის რაოდენობის გათვალისწინებით 1 მლნ-დან 5282 დაავადებულით 82-ე ადგილს იკავებს. რაც შეეხება ჩინეთს 59 ინფიცირებულით ის 202-ე ადგილზეა.

1 მლნ-დან 20 ათასი და მეტი ინფიცირებული კიდევ 19 ქვეყანაშია, მათ შორის:ბაჰრეინში, ანდორაში, ისრაელში, პანამაში, აშშ-ში, ესპანეთსა და სომხეთში. საქართელო 1 მლნ-დან 3622 ინფიცირებულით 108-ე ადგილზე იმყოფება. მსოფლიო საშუალო 4978-ს შეადგენს.

გარდაცვლილთა რაოდენობა აბსოლუტური მაჩვენებლის გარდა შესაძლოა დამატებით 2 მეთოდით დაითვალოს: ინფიცირებულთა რაოდენობის მიხედვით და მოსახლეობის საერთო რაოდენობის მიხედვით. ინფიცირებულთა რაოდენობის მიმართებაში მსოფლიოში სიტუაცია გაზაფხულის შემდეგ მკვეთრად გაუმჯობესდა. თუ 6 თვის აპრილის ბოლო 3.365 მლნ ინფიცირებულიდან 244 ათასი გარდაცვლილი იყო და სიკვდილიანობის კოეფიციენტი 7.2%-ს აღემატებოდა, დღეს ის 2.8%-ს შეადგენს. სიკვდილიანობის აპრილის დონის შენარჩუნების შემთხვევაში გარდაცვლილთა საერთო რაოდენობა 2.8 მლნ-ს გადააჭარბებდა. საქართველოში ეს მაჩვენებელი, მსოფლიო საშუალოზე 3.6-ჯერ დაბალია და 0.78%-ს უდრის. ბელგიაში, იტალიასა და ბრიტანეთში სიკვდილიანობის კოეფიციენტი 5%-ს აღემატება, შემთხვევათა რაოდენობის ზრდამდე ის 10%-საც აჭარბებდა.

მოსახლეობის საერთო რაოდენობის გათვალისწინებით ყველაზე მეტი ადამიანი ჯუჯა სან-მარინოში დაიღუპა - 1237 პირი 1 მლნ-დან, 1012 გარდაცვლილით მეორე ადგილზე პერუა.1 მლნ-დან 500-ზე მეტი ადამიანი კიდევ 17 ქვეყანაში გარდაიცვალა, მათ შორის: ბელგიაში, ესპანეთში, ჩილეში, აშშ-ში, მექსიკასა და იტალიაში. მსოფლიო საშუალო 141-ს უდრის, საქართველოში 28-ს.

აბსოლუტურ გამოხატულებაში გარდაცვლილთა რაოდენობა 1000-ს 57 სახელმწიფოში აჭარბებს, 10 ათასს 19-ში, ხოლო 100 ათასს სამში : აშშ - 222 ათასი, ბრაზილია - 152 ათასი და ინდოეთი - 111 ათასი.

საქართელოში ინფიცირების პირველი შემთხვევა 26 თებერვალას დაფიქსირდა, გარდაცვალების პირველი ფაქტი - 4 აპრილს. 15 ოქტომბრის მდგომარეობით ლაბორატორიულად დადასტურებულია სულ 14 440 შემთხვევა, საიდანაც ნახევარზე მეტი - 7367 გამოჯანმრთელდა, 113 პირი გარდაიცვალა, 6960 პაციენტი კი მკურნალობის კურსს ამჟამადაც განაგრძობს.

ბოლო 1.5 თვის განმავლობაში ინფიცირების შემთხვევების მკვეთრი ზრდის მიუხედავად, რაც ნაწილობრივ ტესტირების რაოდენობის ზრდითაც არის გამოწვეული, საქართველო რეგიონში ვირუსთან ბრძოლის ლიდერის პოზიციას ინარჩუნებს. ინფიცირებულთა რაოდენობა 1 მლნ-დან თურქეთში 4024-ს უდრის, აზერბაიჯანში - 4205-ს, რუსეთში - 9278-ს, სომხეთში - 20 235-ს, საქართველოში კი 3622-ს. რაც შეეხება გარდაცვალებულთა რაოდენობას აზერბაიჯანში ის 1 მლნ-დან 61-ს შეადგენს, თურქეთში - 107-ს, რუსეთში - 161-ს, სომხეთში - 353-ს, ხოლო საქართველოში 28-ს.