Credit Suisse Group მართავდა კლიენტების ანგარიშებს, რომლებიც ჩართული იყვნენ ადამიანის უფლებების დარღვევაში, კორუფციასა და ნარკომანიაში. ამის შესახებ ინფორმაციას მედია 18 000-ზე მეტ ანგარიშზე დაყრდნობით ავრცელებს. ანგარიშებზე არსებული თანხა ჯამში $100 მილიარდს აღემატება.

ანონიმურმა მამხილებელმა ინფორმაცია მიაწოდა გერმანულ გაზეთ Sueddeutsche Zeitung-ს, რომელმაც ეს მონაცემები გაუზიარა არაკომერციულ ჟურნალისტურ ჯგუფს და მსოფლიოში ათობით სხვა საინფორმაციო ორგანიზაციას.

New York Times-ის ინფორმაციით, მონაცემები მოიცავს 1940-იანი წლებიდან გასულ ათწლეულამდე გახსნილ ანგარიშებს. Guardian-ის განცხადებით, ზოგიერთი ანგარიში კვლავ აქტიურია.

Credit Suisse მედიაში გავრცელებულ ინფორმაციას მალევე გამოეხმაურა. განცხადების მიხედვით, ის „კატეგორიულად უარყოფს ბრალდებებს და ინსინუაციებს ბანკის მიმართ მიზანმიმართული ბიზნეს პრაქტიკის შესახებ.“

გავრცელებულ განცხადებაში ასევე ნათქვამია, რომ ინფორმაცია „ეფუძნება ნაწილობრივ, არაზუსტ ან შერჩევით ინფორმაციას, რომელიც ამოღებულია კონტექსტიდან, რაც იწვევს ბანკის ბიზნეს ქცევის ტენდენციურ ინტერპრეტაციას“.

Credit Suisse-მა განაცხადა, მან განიხილა ანგარიშში შესული ანგარიშების ისტორიები, რის შემდეგაც აღმოჩნდა, რომ ანგარიშების დაახლოებით 90% დახურულია ან უკვე დახურვის პროცესში იყო. აქედან 60%-ზე მეტი 2015 წლამდე დაიხურა.

ბანკი აღნიშნავს, რომ აქტიური ანგარიშების მოკვლევას განაგრძობს.

25 ანგარიში, სადაც დაახლოებით $270 მილიონი იყო განთავსებული, ეკუთვნოდა პირებს, რომლებიც ვენესუელას სახელმწიფო ნავთობკომპანიის, Petroleos de Venezuela-ს გარშემო შეთქმულებაში მონაწილეობაში არიან ბრალდებული.

კიდევ ერთი ანგარიში ეკუთვნოდა ზიმბაბველ ბიზნესმენს, რომელზეც აშშ-ისა და ევროპის ხელისუფლების სანქციები მოქმედებს ყოფილი პრეზიდენტის, რობერტ მუგაბეს მთავრობასთან კავშირების გამო.

Guardian-ის მიხედვით, ანგარიშის მფლობელები იყვნენ ფილიპინებში ადამიანით მოვაჭრე პირი, ჰონგ-კონგის საფონდო ბირჟის წარმომადგენელი, რომელიც ქრთამის აღების ბრალდებით დააპატიმრეს, ასევე კორუმპირებული პირები სხვადასხვა ქვეყნებიდან მათ შორის ეგვიპტესა და უკრაინიდან.

წყარო: Bloomberg, „ბიზნეს ფორმულა“