აშშ–ის სენატის საბიუჯეტო კომიტეტმა ანგარიშის მიხედვით შვეიცარიული ბანკი Credit Suisse ნაცისტებს და მათთან დაკავშირებულ პირებს 2020 წლამდე ემსახურებოდა.
Cnn წერს, რომ საკითხის გამოძიების საფუძველი, სიმონ ვიზენტალის ცენტრის მიერ გამოქვეყნებული მონაცემები გახდა, ეს ორგანიზაცია ადამიანის უფლებების დაცვით, ტერორიზმთან და ანტისემიტიზმთან ბრძოლით და ჰოლოკოსტის შესწავლით არის დაკავებული.
სენატის ბიუჯეტის კომიტეტის მიერ გავრცელებული პრესრელიზის თანახმად, Credit Suisse-მა გაათავისუფლა დამოუკიდებელი ომბუდსმენი და შეზღუდა მისი შიდა გამოძიების ფარგლები. სენატის კომიტეტის ინფორმაციით ამან მნიშვნელოვანი ხარვეზები დატოვა ნაცისტებთან დაკავშირებული ჩანაწერების სასამართლო ექსპერტიზაში.
2020 წელს ცენტრმა არგენტინაში გაქცეული 12 000 ნაცისტის მონაცემები მოიპოვა. მკვლევრების თქმით, ბევრ მათგანს ანგარიში შვეიცარიულ ბანკში ჰქონდა გახსნილი, სადაც ებრაელებისთვის წართმეულ ფულს ინახავდნენ.
სენატის კომიტეტის საიტზე გამოქვეყნებული დოკუმენტის თანახმად, Credit Suisse გასაიდუმლოებულ ანგარიშებს ემსახურებოდა. მაგალითად დაჯგუფებაში შედიოდა 99 ადამიანის ანგარიშები, ეს ადამიანები მაღალი რანგის ნაცისტური ჩინოსნები იყვნენ და არგენტინაში მოქმედებდნენ. მათგან 70 ადამიანის ანგარიში 1945 წლის შემდეგ არის გახსნილი. აქედან 14 მათგანს ბანკი XXI საუკუნეში 2020 წელსაც კი ემსახურებოდა.
სამშაბათს გავრცელებულ განცხადებაში, Credit Suisse-მა აღნიშნა, რომ ორწლიანი გამოძიების შედეგად არ დასტურდება ის ფაქტი, რომ მათ ანგარიშებზე ჰოლოკოსტის მსხვერპლთა ფული ინახებოდა.
ბანკში აცხადებენ, რომ დამოუკიდებელი საკონსულტაციო კომპანიის AlixPartners-ის 50-მდე თანამშრომელმა 50 000 საათზე მეტი დახარჯა არქივების და მონაცემთა ბაზების კვლევაზე.
სენატის ახალი გამოძიება ემყარება 2021 წლის ივნისში დაქირავებული Jenner & Block-ის ადვოკატის ნილ ბაროფსკის ბრალდებებს, ბანკის ნაცისტებთან პოტენციური კავშირის შესახებ.
ბრალდების მხარე ამტკიცებს, რომ ბანკმა ნაცისტების მხარდამჭერებთან კავშირები სრულად არ გამოიკვლია. სენატის საბიუჯეტო კომიტეტის თავმჯდომარემ, სენატორმა შელდონ უაითჰაუსმა და სენატორმა ჩაკ გრასლიმ ბაროფსკის მოხსენება მარტში გამოაქვეყნეს.
„მიუხედავად იმისა, რომ Credit Suisse თავდაპირველად დათანხმდა გამოიძიოს მტკიცებულებები უცნობი, ნაცისტებთან დაკავშირებული ანგარიშების შესახებ, ჩვენს მიერ მოპოვებული ინფორმაცია აჩვენებს, რომ ბანკმა დაადგინა ზედმეტად მკაცრი და ვიწრო ფარგლები და უარი თქვა მის შესრულებაზე. მიმოხილვის მსვლელობისას გამოვლინდა ახალი ფაქტები.“ - თქვა გრასლიმ.
Credit Suisse აქტივების მიხედვით შვეიცარიის სიდიდით მეორე ბანკია და ბოლო წელს გახმაურებული სკანდალებით და დიდი ზარალით გამოირჩევა.
Credit Suisse შვეიცარიის ერთ–ერთი უძველესი ბანკია, რომელიც 1856 წელს დაფუძნდა. აქტივების მოცულობით კი ქვეყანაში მეორე ადგილს იკავებდა. ბანკის ისტორიაში აქციების უდიდესი ვარდნის შემდეგ, რასაც მარტში ჰქონდა ადგილი, საფინანსო ინსტიტუტი მისმა კონკურენტმა UBS-მა შეისყიდა.