ოკუპირებულ ცხინვალის რეგიონში განთავსებული რუსეთის საოკუპაციო მე-4 ბაზის სამხედრო-სამედიცინო პერსონალმა საველე პირობებში სამხედრო წვრთნა დაიწყო.

რუსეთის ფედერაციის სამხრეთის სამხედრო ოლქის პრესსამსახურის ცნობით, ძარწემის პოლიგონზე სამხედრო სამედიცინო პერსონალი დაჭრილი სამხედრო მოსამსახურეების გამოყვანაში ვარჯიშობს და ამას თანამედროვე ტექნოლოგიების გამოყენებით აკეთებს. საკომუნიკაციო აპარატურის გამოყენებით ჯერ პირობითად დაჭრილი ჯარისკაცების ძებნა და შემდეგ მათი ბრძოლის ველიდან გაყვანა ხდება, - აცხადებენ რუსეთის ფედერაციის თავდაცვის სამინისტროს სამხრეთ სამხედრო ოლქის პრესსამსახურში.

წვრთნაში სულ სამხრეთის სამხედრო ოლქის 300-მდე სამხედრო სამედიცინო მოსამსახურე მონაწილეობს, ჩართულია 20-ზე მეტი სამხედრო ტექნიკა.

წინა პრაქტიკიდან გამომდინარე, ცხინვალში ვარაუდობენ, რომ ამ სწავლების შემდეგ, სამხედრო ექიმებსაც უკრაინისკენ გადაისვრიან - ორი კვირის წინ სამხრეთის სამხედრო ოლქის პოლიგონებზე სატანკო და სარაკეტო დანაყოფების წვრთნები ჩატარდა, მოგვიანებით კი ისინი უკრაინის მიმართულებით გადაისროლეს.

რუსეთის მიერ ოკუპირებული ცხინვალის რეგიონის მცხოვრებლები, რომლებიც მე-4 რუსულ სამხედრო ბაზაზე კონტრაქტით მსახურობენ, უკრაინაში გაემგზავრნენ.

რადიო თავისუფლების პროექტ „ეხო კავკაზა“-ს ცნობით, სოციალური ქსელებით გავრცელდა კადრები, რომელთა თანახმად, სამხედრო ტექნიკა ტოვებს ცხინვალს და შემდეგ მთლიანად რეგიონს როკის გვირაბის გავლით. რუსულ სამხედრო ბაზაზე კონტრაქტით მომსახურე პირების უკრაინაში გაგზავნის გამო, სოციალური ქსელების მომხმარებლები აკრიტიკებენ ოკუპირებული ცხინვალის რეგიონის ე.წ. პრეზიდენტს, ანატოლი ბიბილოვს. თავის დროზე, სწორედ მისი გადაწყვეტილებით შემცირდა ადგილობრივი „არმიის“ რიცხოვნობა და სამხედროთა ნაწილი კონტრაქტით დასაქმდა რუსეთის მე-4 ბაზაზე. ამასთან, ბიბილოვი აცხადებდა, რომ ეს კონტინგენტი „სამხრეთ ოსეთში“ რუსული ბაზის ტერიტორიაზე დარჩებოდა.

radiotavisupleba.ge