„დააპაუზე უფასოდ“ - ამ სახელით ინტერნეტსივრცეში შექმნილი სამართლებრივი სივრცე მიზნად ისახავს კორონავირუსის პანდემიით გამოწვეული პრობლემების სამართლებრივი გზით მოგვარებას. იდეის ავტორი, ადვოკატი მარიკა არევაძე „კომერსანტთან“ აღნიშნავს, რომ რამდენიმე ათეული სხვადასხვა პრობლემის შესახებ იღებენ შეტყობინებას და მათი მხრიდან ხდება ხალხის დაკვალიანება იურიდიული კუთხით, თუ როგორ უნდა მოიქცეს მოქალაქე ფორსმაჟორულ სიტუაციაში იჯარის, სესხების თუ კომუნალურებთან დაკავშირებული გართულებების დროს.

„ეს არის სამართლებრივი ერთიანი სივრცე სადაც პანდემიით გამოწვეული არსებითი პრობლემების სამართლებრივ მოგვარებაზე ვფიქრობთ. ადამიანები გვიკავშირდებიან თავიანთი პრობლემებით და ჩვენ  მაქსიმალურად ვცდილობთ მათ დახმარებას.  გარდა ამისა, სხვადასხვა პრობლემურ საკითხებზე წერილობით მივმართავთ სხვადასხვა სამთავრობო უწყებასა თუ კერძო კომპანიას. ეს შეიძლება იყოს,  სესხებთან დაკავშირებით, კომუნალურებთან დაკავშირებით, იჯარის პრობლემა საკმაოდ აქტუალურია. მაგალითად,  მივმართეთ ინტერნეტ-კომპანიებს, რომ  დისტანციური სწავლების რეჟიმში შეუზღუდავად მიწოდოს მოსწავლესა თუ სტუდენტს ინტერნეტი.   კერძო კომპანიები საიჯარო თანხებს ვეღარ იხდიან იმიტომ, რომ შემოსავალი აღარ აქვთ, მაგრამ მეიჯარეები სთხოვენ.

ყველა ამ პრობლემაზე ვაკვალიანებთ ადამიანებს, ვაძლევთ რჩევებს როგორ მოიქცნენ. დღეში 30 ამდე შეტყობინება მოგვდის.  მიკროსაფინანსო ორგანიზაციებს მივწერეთ და  რამდენიმემ  საშეღავათო პირობები გამოაცხადა. კომუნალური გადასახადების შეღავათებზე კი მუშაობა დაწყებულია. ფაქტია, რომ ვცდილობთ ვიაქტიუროთ და იმედია რაღაც შედეგები მოყვება.“- აცხადებს ადვოკატი მარიკა არევაძე.  

უკანასკნელი მონაცემებით, მიკროსაფინანსო ორგანიზაციებმა „გირო კრედიტმა“, „ბერმელმა“ „ემ ბი სიმ“ და „კრისტალმა“  დააწესეს საშეღავათო პერიოდი, თუმცა ეს არ ითვალისწინებს სესხზე პროცენტის დარიცხვის გაუქმებას.

მარიამ მორგოშია