ფინანსისტები ფიქრობენ, რომ ფულის გაციფრულების პროცესი საქართველოში დაახლოებით 10 წელიწადში დასრულდება.  როგორც ეროვნულ ბანკში სულ ცოტა ხნის წინ განაცხადეს, ციფრული ლარი საპილოტე რეჟიმში ბრუნვაში 2022 წლიდან ჩაეშვება. ფინანსური ბაზრის მკვლევარი ნიკა შენგელია ფიქრობს, რომ ეს პროცესი წარმატებული იქნება საქართველოსთვის, რამდენადაც ნაღდი ფულის მიმართ ინტერესი იკარგება მთელ მსოფლიოში და  ახალი ეპოქის ტენდენციას ვერც ჩვენი ქვეყანა ჩამორჩება.  

„ახალი მოძრაობა დაიწყო ელექტრონულ ფულთან დაკავშირებით და სიახლის მისაღებად მზად ჩვენც აღმოვჩნდით. ეროვნულმა ბანკმა თქვა კიდეც, რომ 2022 წელს შემოვა ელექტრონული ფული, ეს პროცესი სავარაუდოდ 2030 წელს დასრულდება. მსოფლიოს წამყვანმა ქვეყნებმა ამოცანად დაისახეს, რომ ნაღდი ფული გაქრეს და ამის შემდეგ მთელი ოპერაცია ელექტრონულ ფულზე გადავა. მიმაჩნია, რომ მას  დიდი მომავალი აქვს. მომდევნო რამდენიმე წელიწადში შეიძლება კომერციულმა ბანკებმა პოზიციებიც დაკარგონ, თუ ელექტრონული ფული შემოვა ბაზარზე“, - ამბობს ,,კომერსანტთან  ნიკა შენგელია.

საპირისპირო მოსაზრებისაა საბანკო სფეროს სპეციალისტი გოჩა თუთბერიძე, რომელიც ფიქრობს, რომ ნაღდი ფულის მიმოქცევის არეალი ძირითადად რეგიონები იქნებიან. ქალაქში მისი მოხმარება შემცირდება, თუმცა სრულად ვერ გაქრება, თუნდაც იმ მიზეზის გამო, რომ პლასტიკურ ბარათებზე დაწესებული საკომისიოები მომხმარებლების გარკვეული კატეგორიისთვის მიუღებელია.

,,შესაძლებელია, რომ ნაღდი ფულის გამოყენება შემცირდეს, მაგრამ ის, რომ საქართველოში უნაღდო ანგარიშსწორების სისტემა დამკვიდრდება, ეს წარმოუდგენელია. შემცირება კი შორეულ პერსპექტივაში ისედაც მოსალოდნელია, ტექნოლოგიების განვითარების შესაბამისად. მოსახლეობას დიდ დისკომფორტს უქმნის პლასტიკური ბარათების გამოყენება საკომისიოების გამო, თუმცა ციფრული ვალუტის მისაღებად  მოქალაქეების გარკვეული ნაწილი მაინც არ აღმოჩნდება მზად. ნაღდი ფულის ჩანაცვლება დედაქალაქში, ასევე დიდი ქალაქების შემთხვევაშიც, სავსებით შესაძლებელია. ვფიქრობ, ელექტრონული ფულის მასიურად გამოყენება მხოლოდ თეორიულად არის დასაშვები, პრაქტიკაში ამის განხორციელება მარტივად ვერ მოხდება“, - აცხადებს თუთბერიძე.

მისი განმარტებით, ციფრული ფული – ეს არის ვირტუალური ფულის ერთეული, გადახდის საშუალება, რომელიც არსებობს მხოლოდ ციფრულად სპეციალურ ელექტრონულ სისტემაში ჩანაწერის სახით. იგი დღეისთვის ძირითადად გამოიყენება ინტერნეტის ქსელში, რომლის მეშვეობითაც შეიძლება განხორციელდეს ნებისმიერი სახის ანგარიშსწორება, თუმცა შეიძლება მისი არსებობა ინტერნეტის გარეშეც.

ცნობისთვის, ამჟამად სებ-ი ციფრული ლარის დეტალური მახასიათებლების მზადების პროცესშია.

ციფრულდება დოლარიც. აშშ-ში შემდეგი 12 თვის განმავლობაში ციფრული დოლარის 5 საპილოტე პროგრამა ჩაეშვება. ამით აშშ-ში ციფრული ვალუტის პოტენციურ გამოყენებას შეამოწმებენ. პირველ ეტაპზე საპილოტე პროგრამებს გლობალური ტექნოლოგიური კომპანია Accenture დააფინანსებს და მასში ჩაერთვებიან ფინანსური ფირმები, საცალო ვაჭრობის კომპანიები და არასამთავრობო ორგანიზაციები. მიღებულ მონაცემებს აშშ-ს ხელისუფლებაში ციფრული დოლარის განვითარებისთვის გამოიყენებენ.

მარი ჩიტაია