ბიუჯეტური მოგზაურობის დასასრული და კორონავირუსის შემდგომი რეალობა -ამერიკული გამოცემა CNN-ი პანდემიის დასრულებისა და ქვეყნებს შორის მიმოსვლის აღდგენის შემდგომ სატრანსპორტო კომპანიების სრულიად ახალი მოდელის შესახებ რეპორტაჟს აქვეყნებს.
საჰაერო გადაადგილება ახალი კორონავირუსის პირობებში ყველაზე სარისკო ნაბიჯია. აშკარაა, რომ ჩვენი ფრენის სისტემა სრულად უნდა შეიცვალოს, რათა მგზავრებმა საჰაერო სივრცეში დაბრუნებისას თავი კომფორტულად იგრძნონ. კრიზისამდე ფრენისას არა თუ დისტანციის დაცვა, არამედ ბორტზე ადგილების მაქსიმალური რაოდენობის მიღებას ცდილობდნენ, გადატვირთული რეისები და შემაწუხებელი სივიწროვე, ეს კორონავირუსამდე ჩვეულებრივი სურათი იყო. ახლა კი ავიახაზებმა სრულიად უნდა შეცვალონ დამოკიდებულება საქმისადმი.
სავარაუდოდ, მომავლის ფრენებისთვის ბორტზე სამადგილიან რიგებში გადანაწილება ისე შეიცვლება, რომ დისტანცირება მგზავრებს შორის შუა ადგილების დაცარიელებით იქნას მიღებული. ასეთი სურათი ავიახაზებისთვის ფულის გამომუშავებას შეუძლებელს ხდის. საერთაშორისო საჰაერო გადაადგილების ასოციაციის ხელმძღვანელის ალექსანდ დე ჟუნიაკის თქმით, ავიაკომპანიებს ბილეთების გაძვირება მოუწევთ.
„ამ პირობებში არ არსებობს ავიაკომპანია რომელიც შეძლებს იფრინოს და თან მოგება მიიღოს ბიზნესიდან. ორი გამოსავალია - ან არ უნდა ვიფრინოთ, ან უნდა გავზარდოთ ბილეთების ფასები 50-დან და 100 პროცენტამდე. ეს არის ბიუჯეტური მოგზაურობის დასასრული ყველასთვის.“ - ამბობს დე ჟუნიაკი.
Jetblue, Air Canada, Korean და Lufthansa-ს ავია გადაადგილებისას ნიღბების გამოყენება აუცილებელი ხდება მთელი ფრენის მანძილზე. Emirates-ი კი ტვირთის რაოდენობას მხოლოდ აუცილებელ ნივთებამდე დაიყვანს. ბორტებიდან ამოღებულია ჟურნალებიც კი ვირუსის გავრცელების რისკის გამო.
ასევე, უნდა ველოდოთ ბორტზე ეკიპაჟის წევრებს, რომლებიც სრული ეკიპირებით მოემსახურებიან მგზავრებს, ეს ფრენის ყოველდღიურობა გახდება. Qatar Airways-ში აცხადებენ, რომ ეკიპაჟის წევრებისთვის თერმული სკრინინგი ხორციელდება. ამ ყველაფრის მიუხედავად Expedia-ს ხელმძღვანელი ბარი დილერი მიიჩნევს, რომ ფრენა და სოციალური დისტანცირება ერთად, გამორიცხულია.
„იდეა, რომ შეიძლება თვირთმფრინავიდან შუა ადგილები გამოაცარიელონ და ხალხს სოციალური დისტანციის დაცვისკენ მოუწოდო, სრული აბსურდია. სოციალური იზოლაცია ასეთ პირობებში ნამდვილი მითია.“ - ამბობს ბარი დილერი
მგზავრებს შორის ბარიერის ფუნქციას დასაჯდომი ადგილების სპეციალური ფარებით გამოყოფა შეასრულებს. თუმცა მიუხედავად ყველაფრისა ავიაინდუსტრიის ადგენა ისეთი აღარასდროს იქნება, როგორიც აქამდე იყო.- ნათქვამია რეპორტაჟში.
CNN.com
მოამზადა მარიამ მორგოშიამ
ავიამიმოსვლა
