ბრილიანტზე მოთხოვნის ზრდა, რომელიც პანდემიის საწყის ეტაპზე დაიწყო განელების ნიშანს არ აჩვენებს. ახლა ყველაზე პატარა და იაფ ქვებზეც კი მოთხოვნა დიდია.
დაბალი კლასის ბრილიანტები ბოლო ათწლეულის განმავლობაში რთული ბიზნესი იყო. ჭარბი მიწოდება ფიქსირდებოდა იაფი ბრილიანტების ბაზარზე. ისინი, როგორც წესი, მცირე ზომის და დეფექტურია. მათზე მცირე მოთხოვნა კი ფასს დაბლა ინარჩუნებდა.
თუმცა, უკანასკნელი სამი თვის განმავლობაში დაბალი კლასის ბრილიანტებზე მოთხოვნა მნიშვნელოვნად გაიზარდა აშშ-ს მომხმარებლებში, რომლებიც მსოფლიოს ბრილიანტის სამკაულების ნახევარს ყიდულობენ. ამავდროულად, ერთ-ერთი ყველაზე დიდი საბადოს დახურვა მიწოდებაზე გაზრდილ წნეხს უზრუნველყოფს.
შედეგად, დაუმუშავებელი ბრილიანტის ბაზარზე დაბალი კლასის ქვების ღირებულება დრამატულად გაზრდილია. მიუხედავად იმისა, რომ ზრდა მაღაზიების თაროებზე ავტომატურად არ აისახება, იაფი ბრილიანტის სამკაულების ფასი შესაძლოა მომხმარებლამდე მალე მივიდეს. უფრო სავარაუდოა, რომ საცალო მოვაჭრეები ხარჯების შესამცირებლად მომხმარებლებს სამკაულებში უფრო პატარა და მეტად დეფექტურ ბრილიანტს შესთავაზებენ.
De Beers-მა მიმდინარე კვირაში სიტუაციას დაუმუშავებელი ალმასის ფასების თითქმის 10%-იანი ზრდით უპასუხა, რაც ბოლო წლების განმავლობაში ფასის ერთ-ერთი ყველაზე აგრესიული ზრდაა. ყველაზე დიდი ზრდა ფიქსირდება ყველაზე იაფ საქონელში. ეს ეხება ქვებს, რომლებიც მაღაზიებში $200 დოლარზე ნაკლებად ფასობს. ზოგიერთ კატეგორიაში ფასი თითქმის 20%-ით არის გაზრდილი.
ბრილიანტის ინდუსტრია პანდემიის ერთ-ერთი მოულოდნელი გამარჯვებული აღმოჩნდა. ბრილიანტის სამკაულებზე მომხმარებელთა მოთხოვნა მკვეთრად გაიზარდა გასულ წელს, თუმცა მიწოდება შეზღუდული დარჩა. პანდემიის გამო სახლში დარჩენილმა მომხმარებლებმა, რომლებსაც ბევრ სხვა ფუფუნებაზე ხელი აღარ მიუწვდებოდათ, ბრილიანტების შესყიდვა მთელი პანდემიის განმავლობაში განაგრძეს.
წყარო: Bloomberg, "ბიზნეს ფორმულა"