საქართველოში რეგისტრირებული კომპანიებისთვის ევროკავშირის საჯარო შესყიდვების ბაზარი გაიხსნა, რაც იმას ნიშნავს, რომ ქართული კომპანიები EU-ს წევრი სახელმწიფოების მიერ გამოცხადებულ ტენდერებში შეძლებენ მონაწილეობას.
ევროკავშირის მასშტაბით ყოველწლიურად 250,000-მდე სუბიექტი (მთავრობა, სამინისტრო, სააგენტო და კომპანია) დაახლოებით, 2 ტრილიონი ევროს მოცულობის საქონლის, მომსახურებისა და სერვისის შესყიდვას ახორციელებს. ევროკომისიის ცნობით, უმსხვილეს შემსყიდველებს შორის არიან: გერმანია, საფრანგეთი, იტალია, ნიდერლანდები და ესპანეთი.
ეკონომიკის დოქტორი ირაკლი მაკალათია „კომერსანტთან“ ამბობს, რომ მხოლოდ ბაზრის გახსნა საკმარისი არ არის, რადგან ქართულ კომპანიებს ერთი მთავარი პრობლემა აქვთ — ფინანსებზე ხელმიუწვდომლობა, რაც მათ ხელს უშლით ხარისხიანი პროდუქციის შექმნაში.
„მარტო გახსნა არაფერია თუ ქართულმა კომპანიებმა შესაბამისი სტანდარტები ვერ დააკმაყოფილეს. ცხადია ასეთი ხელშეკრულებები პოზიტიურად მოქმედებს და გარკვეული მიმართულებით ექსპორტის ზრდას იწვევს, მაგრამ ჩვენ არ გვაქვს შესაძლებლობა ისეთი ხარისხის პროდუქცია ვაწარმოოთ რაც მისაღები იქნება ევროპისთვის.
მთავარი პრობლემა, რომელიც ჩვენთან ეკონომიკისთვისაც და ბიზნესისთვისაც არის ესაა ფინანსებზე ხელმიუწვდომობა. დაბალი ფინანსების პირობებში ვერ ვახერხებთ მაღალი ხარისხის პროდუქციის წარმოებას, სწორედ ამიტომ ვერ გაგვაქვს ის ევროკავშირის ბაზრებზე და ისეთი ბაზრები გვრჩება ასათვისებლად, სადაც დაბალხარისხიან პროდუქციაზეა მოთხოვნა, მაგალითად რუსეთი. ვაჭრობის ხელშეკრულებებმა ბოლომდე ვერ იმუშავა, რადგან ფინანსებზე ხელმიუწვდომლობა კონკურენტუნარიანი პროდუქციის შექმნის შესაძლებლობას არ აძლევს ქართულ კომპანიებს.
საერთაშორისო ბაზრები ბევრი კომპანიისთვის საინტერესოა და შესაბამისად დაინტერესება იქნება, მაგრამ მაშინ როდესაც დიდი კომპანიები წლებია რუსეთთან თანამშრომლობენ, შესაძლოა თავი არც შეიწუხონ იმისთვის, რომ ევროკავშირის ბაზრებზე გადაეწყონ. რა თქმა უნდა საბოლოო ჯამში, ეს სიახლე კარგია, ცვლილება იქნება, მაგრამ არა იმდენად რისი მოლოდინიც შეიქმნა“, — აღნიშნა ირაკლი მაკალათიამ.
აღსანიშნავია, რომ ვაჭრობის საკითხებზე ასოცირების კომიტეტმა 2021 წლის 8 ოქტომბერს მიიღო გადაწყვეტილება, რომლითაც ევროკომისიის მიერ დადებითად შეფასდა საქართველოს მიერ ასოცირების შეთანხმებით ნაკისრი პირველი ეტაპის ვალდებულებების წარმატებით შესრულება საჯარო შესყიდვების სფეროში. საჯარო შესყიდვებში მონაწილეობის საკითხი საქართველო-ევროკავშირის სავაჭრო შეთანხმებებით იყო გათვალისწინებული, თუმცა აქამდე ქვეყანას სამართლებრივად ჰქონდა შეზღუდული ტენდერებში მონაწილეობის უფლება.