ომის 11 თვის განმავლობაში რუსულმა აგრესიამ უკრაინის გარემოს 1.7 ტრილიონი გრივნას ზიანი მიაყენა. ამის შესახებ უკრაინის გარემოს დაცვის სახელმწიფო ინსპექციაში განაცხადეს.

აღნიშნულია, რომ ასეთი მაჩვენებლები გამოითვლება იმ მეთოდების შესაბამისად, რომლებიც განსაზღვრავს მიწის, წყლის რესურსების და ატმოსფერული ჰაერისთვის მიყენებული ზიანის ოდენობას.

ნიადაგის დაბინძურებისა და მიწის დანაგვიანების ზიანის საერთო რაოდენობა 688 მილიარდ გრივნაზე მეტია. ჰაერის დაბინძურებისთვის ზარალის ჯამური ოდენობა 998 მილიარდ გრივნას შეადგენს. წყლის რესურსების დაბინძურების ზარალმა 56 მილიონ გრივნას გადააჭარბა.

ამასთან, უკრაინის ტერიტორიულმა ორგანოებმა დააფიქსირეს და გამოთვალეს ოკუპანტების მიერ მიყენებული ზარალის რაოდენობრივი მაჩვენებელიც:

280,904 მ2 - საშიში ნივთიერებებით დაბინძურებული ნიადაგები; 12,277,512 მ2 - მიწები სავსეა დანგრეული ობიექტების და საბრძოლო მასალის ნარჩენებით; დაბომბვისას დაიწვა 686 816 ტონა ნავთობპროდუქტი, რამაც ჰაერი საშიში ნივთიერებებით დააბინძურა; 33132 ჰექტარი ტყეები და სხვა ნარგავები, რომლებიც რაკეტებისა და ჭურვების აფეთქების შედეგად დაიწვა, ყველაზე ოპტიმისტური გათვლებით, მათი ნაწილის აღდგენას ათწლეულები დაჭირდება, ნაწილი კი სამუდამოდ განადგურდა; 1 063 947 მ2 - განადგურებული ობიექტები, მათ შორის კრიტიკული ინფრასტრუქტურა, მათმა ნარჩენებმა გარემოს ზიანი მიაყენა; 1597 ტონა დამაბინძურებლების მასა, რომელიც წყლის ობიექტებში მოხვდა; 2,903,513 კგ - უცხო საგნების, მასალების, ნარჩენების ან/და სხვა ნივთიერებების მასა, რომლებიც წყლის ობიექტებში აღმოჩნდა; 410,150,000,000 მ3 - ნებართვის გარეშე ამოღებული/გამოყენებული წყლის მოცულობა;

უკრაინული მედიის ინფორმაციით, რუსეთის შეიარაღებული აგრესიით უკრაინული გარემოსთვის მიყენებული ზიანი უკვე 46 მილიარდ დოლარს აღემატება - უკრაინა ამ ზარალის კომპენსაციას რუსეთის ფედერაციისგან მოითხოვს.