დაფნის მიმდინარე სეზონს მეწარმეები წარმატებულად მიიჩნევენ. როგორც აღმოჩნდა, პანდემიურ პერიოდში დაფნა უცხოურ ბაზრებზე ერთ-ერთი მოთხოვნადი პროდუქტია. შესაბამისად, წარმოების ტემპიც გააქტიურდა. ერთ-ერთი მსხვილი გადამამუშავებელი ქარხნის, შპს ,,ლაურუსის“ დირექტორის ივანე ჯალაღონიას ინფორმაციით, პროდუქციის ექსპორტი ძირითადად რუსეთსა და ჩინეთში იგეგმება. რაც შეეხება წარმოებას, ჯალაღონიას ინფორმაციით, შარშანდელ მაჩვენებელს 50%-ით გადააჭარბა.
რაც შეეხება პანდემიური პერიოდის ნეგატიურ გავლენას, დასაქმებას უკავშირდება, რადგან ინფიცირების შემთხვევების გამო შეიძლება თანამშრომელი მოულოდნელად გამოეთიშოს სამუშაო პროცესს. თუმცა, ივანე ჯალაღონიას თქმით, ამას წარმოებისთვის ხელი არ შეუშლია.
,,ნორმალური სამუშაო გარემოა, ინფიცირების შემთხვევების მიუხედავად, წარმოება არ გაგვიჩერებია. ამ ეტაპზეც 2 თანამშრომელი დაინფიცირდა, ვეხმარებით მათ საკვებით და სხვა საშუალებებით, რის საჭიროებაც აქვთ. რაც შეეხება წარმოების მასშტაბს, წლევანდელი სეზონი ერთ-ერთი წარმატებულია. პროდუქტი ძირითადად რუსეთსა და ჩინეთში გაგვაქვს. წარმოება 50%-ით გავზარდეთ. ჯამში 300 ტონაზე მეტი დაფნის შესყიდვა მოვახერხეთ. აქედან 207 ტონა რუსეთში, კერძოდ, ნოვოსიბირსკის ოლქში გადაიგზავნება, მინიმუმ 100 ტონა ჩინეთში გავა. ჩინელ პარტნიორებთან ახალი ხელშეკრულება გავაფორმეთ და ექსპორტს შეუფერხებლად ვაგრძელებთ“, - ამბობს ჯალაღონია ,,კომერსანტთან“.
რაც შეეხება ფასს, მეწარმეების ინფორმაციით, ჩინეთში 1 კგ. ქართული დაფნა 2,4 დოლარად იყიდება. გაცილებით მეტი ღირს ის რუსეთში, სადაც დაფნის საშუალო ფასი 3-3,50 დოლარის ფარგლებშია.
ადგილზე 1 კგ. დაფნის ფასი 5 ლარია.
აღსანიშნავია, რომ შპს „ლაურუსი“ 2013 წელს შეღავათიანი აგროკრედიტების პროგრამის ფარგლებში 130 000 აშშ დოლარით დაფინანსდა. ქარხანა სამეგრელოში, სენაკის რაიონში მდებარეობს.
ამჟამად ,,ლაურუსში“ 130 ადამიანია დასაქმებული.
შეგახსენებთ, რომ დაფნის კულტურა დიდი ხნის განმავლობაში მივიწყებული იყო. თუმცა, ბოლო წლების განმავლობაში ხალხი ტრადიციას უბრუნდება და მასიურად იწყებს მის მოშენებას, რითაც ქართული დაფნა, ფაქტობრივად, ახალ სიცოცხლეს იძენს.
აღსანიშნავია, რომ დაფნის მიმართ მზარდ მოთხოვნას მისი სასარგებლო თვისებები განაპირობებს. დაფნის ფოთოლი სამკურნალოდ უძველესი დროიდან გამოიყენება. ის ეფექტური სამკურნალო მცენარეა მაღალი არტერიული წნევის დროს, ხსნის სპაზმებს, ამშვიდებს ნერვულ სისტემას, შველის გაცივებისას, აუმჯობესებს საჭმლის მონელების პროცესს, კანის მდგომარეობას, გამოდევნის სახსრებიდან მარილებს. დაფნა ამცირებს ორგანიზმში შაქრის დონეს, აქვეითებს მადას და ხსნის ტკივილს სახსრებში, ასევე ხსნის ტკივილს დაჟეჟილობის, ნაღრძობის, დამბლისა და დაჭიმულობისას; კარგი საშუალებაა ჭრილობის სწრაფად შეხორცებისთვის.
დაფნის ფოთლის შემადგენლობაშია: ვიტამინები - A, C, B, PP, სელენი, მანგანუმი, მაგნიუმი, ფოსფორი, კალიუმი, კალციუმი, სპილენძი და სხვა.
ასევე, ის შეიცავს საკვებ ბოჭკოებს, ორგანულ მჟავებსა და ეთერზეთებს.
მარი ჩიტაია