„დაგვიანებული, მაგრამ სწორი და აუცილებელი“ - ასე აფასებს, რესტორატორთა ასოციაციის ვიცე-პრეზიდენტი საკოორდინაციო საბჭოს გადაწყვეტილებას ე.წ. მწვანე პასპორტების ამოქმედებასთან დაკავშირებით. როგორც ცნობილია, 1-ლი დეკემბრიდან არავაქცინირებულ მოქალაქეებს ობიექტების უმეტესობაში შესვლა აეკრძალებათ.
ბურჯანაძის თქმით, ეს ბიზნესისთვის თავიდან რთული იქნება, თუმცა გრძელვადიან პერსპექტივაში სხვა გზა არ არსებობს.
,,ეს არის დაგვიანებული, მაგრამ სწორი და აუცილებელი გადაწყვეტილება. ამ შემთხვევაში ასეა სჯობს - გვიან, ვიდრე უფრო გვიან. ეს იყო ცვლილება, რომელიც აუცილებლად უნდა შემოსულიყო, რადგან არ გვქონდეს მეტი დანაკარგი როგორც ადამიანური, ასევე ეკონომიკური კუთხით. იმ კოვიდ სტატისტიკას, რაც დღეს ქვეყანაშია ვერცერთი ქვეყანა ვერ გაუძლებს, ვერცერთი ჯანდაცვის სისტემა, ამიტომ ეს გადაწყვეტილება გარდაუვლად მისაღები იყო, რომ თავიდან არ დავდგეთ ჩაკეტვის წინაშე. ეს არ არის ჩვენი ნოუჰაუ, მთელი მსოფლიო ამ რეალობაშია და სხვა გზა, გარდა მწვანე ზონების არსებობისა, ვერავინ იპოვა.
თავიდან ალბათ, იქნება პრობლემა ბიზნესისთვის, მაგრამ დროში სხვა გზა არ არსებობს, ერთ წრეზე რომ არ ვიტრიალოთ. გრძელვადიან პერსპექტივაში კი, ბიზნესის გადარჩენის გზაც ესაა. კონსულტაციები ხელისუფლებასთან წინასწარ გვქონდა და იქაც, ბიზნესი არ იყო ერთგვაროვანი“, - განაცხადა შოთა ბურჯანაძემ ,,ბიზნესპრესნიუსთან“.
შეგახსენებთ, ე.წ. მწვანე პასპორტი 1-ელი დეკემბრიდან ამოქმედდება, - უწყებათშორისი საბჭოს ეს გადაწყვეტილება პრემიერ-მინისტრმა ირაკლი ღარიბაშვილმა გააჟღერა.
მისი თქმით, პირს „მწვანე სტატუსი აქვს“ თუ იგი ვაქცინირებულია სრულად, ჩატარებული აქვს 72-საათიანი ვალიდურობის PCR-ტესტი, 24-სათიანი ვალიდურობის ანტიგენ ტესტი, ან გადატანილი აქვს კორონავირუსი.
„მწვანე პასპორტის“ მოთხოვნა იმოქმედებს 18 წლის ასაკის ზემოთ მოქალაქეებისთვის, ასევე ტურისტებისთვის. 1-ელი დეკემბრიდან მოქალაქეები მხოლოდ და მხოლოდ „მწვანე პასპორტით“ შეძლებენ შესვლას სხვადასხვა ობიექტებში - კვების ობიექტებში, გასართობ ცენტრებში, კინოთეტრებში, ოპერაში, მუზეუმებში და ა.შ. დეტალური ჩამონათვალი იქნება გავრცელებული. აღნიშნული მოთხოვნა გავრცელდება მხოლოდ ობიექტების სტუმრებზე და არა იქ მომუშავე ადამიანებზე“, - განაცხადა ღარიბაშვილმა.
BPN.GE