2022 წელს მსოფლიოს ახალი დეფიციტი ელის - შპრიცებზე მოთხოვნა იზრდება, ხოლო მრეწველობა მას ვერ აკმაყოფილებს. სავარაუდოდ, მომავალ წელს გლობალური ჯანდაცვის სისტემას 2 მლრდ, შპრიცი დააკლდება, რაც კორონავირუსის საწინააღმდეგო მასობრივი ვაქცინაციის შედეგი იქნება. ამ დროისთვის მსოფლიოში გაკეთდა ვაქცინების 7,5 მლრდ დოზა, რაც 2-ჯერ მეტია, ვიდრე სტანდარტული აცრების მაჩვენებელი საშუალოდ წლის მანძილზე.

შედეგად, გამოყენებულ იქნა 2-ჯერ მეტი შპრიცი და ეს გლობალურ მარაგებს დიდ საფრთხეს უქმნის.

თუ შპრიცების წარმოება სასწრაფოდ არ გაიზრდება, ამან შესაძლოა აჟიოტაჟური შესყიდვები გამოიწვიოს, რაც საბოლოოდ, ყოველთვის დეფიციტის გაღრმავებით სრულდება.

გარდა იმისა, რომ ეს ვაქცინაციის პროგრამას, და შესაბამისად, პანდემიის დაძლევას შეაფერხებს, კორონავირუსის პირობებში სხვა დაავადებებიც არსად გამქრალა, და მათი ნაწილი ინექციებს მოითხოვს, შპრიცები კი არ იქნება.

საბაზო სცენარის მიხედვით, 2022 წელს, როდესაც უკვე გაკეთებულ ვაქცინებს ვადა გაუვა, ყველაფერი თავიდან დაიწყება და 7 მლრდ. ადამიანს აცრა ისევ დასჭირდება. ამავე დროს მსოფლიოს მრეწველობა წელიწადში 6 მლრდ. შპრიცს აწარმოებს, რაც აქამდე სრულიად საკმარისი იყო.

ჯანდაცვის მსოფლიო ორგანიზაციის მრჩევლის ლისა ხედმანის თქმით, თუ ვაქცინაცია როგორც მინიმუმ დღევანდელი ტემპებით გაგრძელდა, მსოფლიოს 2 მილიარდზე მეტი შპრიცი დააკლდება.

„მნიშვნელოვანი ან ხანგრძლივი დეფიციტი ნიშნავს ვაქცინაციის შეფერხებას, და პრობლემებს სხვა დაავადებების მკურნალობაში. ასევე არსებობს მაღალი რისკი, რომ მედიკოსები ერთსა და იგივე შპრიცებს რამდენიმეჯერ გამოიყენებენ. რაც ძალიან საშიშია, რადგანაც, უკვე მეცნიერულად დამტკიცებულია, რომ საფუძვლიანი სტერილიზებაც კი ზოგიერთ ბაქტერიას ვერ ანადგურებს“, - ამბობს ლისა ხედმანი.

შპრიცი - არ არის ერთადერთი სამედიცინო ინსტრუმენტი, რომელიც შესაძლოა დეფიციტური გახდეს. სპეციალისტების თქმით, დეფიციტი შესაძლოა შეეხოს სპეციალურ ქვიშასაც, რომლიდანაც შუშის ფლაკონები იწარმოება.

ბევრმა ალბათ არ იცის, რომ მსოფლიოში წყლის შემდეგ ყველაზე მოხმარებადი ნედლეული სწორედ ქვიშაა - ის შეუცვლელია შუშის, ბეტონის, ასფალტის, უამრავი საშენი მასალის და მიკროჩიპების წარმოებაშიც კი.

ფარმაცევტულ შუშას მსოფლიოში ძირითადად 3 მსხვილი კომპანია - Corning, Schott და Nipro Pharma Corporation აწარმოებს. ძირითადი მასალაა სპეციფიური წახნაგოვანი  ქვიშა, რომელიც ფლაკონების წარმოებისთვის შეუცვლელია.

ამ ნედლეულის მარაგები კი შეზღუდულია და კორონავირუსის საწინააღმდეგო ვაქცინაცია იმაზე მეტ ფლაკონს მოითხოვს, ვიდრე მსოფლიოში იწარმოება.

შპრიცებთან დაკავშირებული პრობლემის თავიდან არიდების ერთ-ერთი საშუალებაა ვაქცინური პლასტირები, რომლებიც ინექციას არ მოითხოვენ - სადღეისოდ ამ ტექნოლოგიაზე ამერიკელი და ავსტრალიელი მეცნიერები მუშაობენ და საკმაოდ კარგი შედეგებიც აქვთ.

თუმცა, ასეთი პლასტირების სერიულ წარმოებამდე ჯერ კიდევ შორსაა, შპრიცების დეფიციტი უკვე რამდენიმე თვეშია მოსალოდნელი.

ამ დროისთვის, პირველი ნიმუშები გამოუშვა ავსტრალიურმა კომპანია Vaxxas-მა, რომელიც ადამიანებზე ცდებს 2022 წლის აპრილში დაიწყებს.