საქართველოს მთავრობამ ახალი დოკუმენტი „ხედვა 2030 საქართველოს განვითარების სტრატეგია“ გამოაქვეყნა, რომელშიც მთავრობის მიზნეებსა და გეგმებზეა საუბარი. ერთ-ერთი მიმართულება, საპორტო ინფრასტრუქტურის განვითარებაა, სადაც საუბარია ანაკლიის ღრმაწყლოვანი პორტის მშენებლობასა და ფოთის პორტის გაფართოებაზე, თუმცა მხოლოდ ერთხელ და ზოგადად.

„საქართველოს ტრანსპორტისა და ლოგისტიკის სექტორის კონკურენტუნარიანობის ამაღლებისათვის მნიშვნელოვანია ქვეყნის სატრანსპორტო ინფრასტრუქტურის სწრაფი განვითარება, რაც გულისხმობს ეროვნული ჩქაროსნული ავტომაგისტრალის მზარდ სისტემას, ახალ სარკინიგზო მარშრუტებს, საერთაშორისო აეროპორტებსა და გაფართოებულ საზღვაო ნავსადგურებს/ტერმინალებს, მათ შორის, ფოთის საპორტო ინფრასტრუქტურის გაფართოებისა და ანაკლიის ღრმაწყლოვანი საპორტო ინფრასტრუქტურის პროექტების რეალიზებას“,  - ნათქვამია დოკუმენტში.

რამდენიმე დღის წინ ეკონომიკის მინისტრმა ლევან დავითაშვილმა აღნიშნა, რომ ანაკლიის ღრმაწყლოვანი პორტის განვითარებით არაბეთის გაერთიანებული საამიროების, „აბუ დაბის პორტების“ კორპორაცია დაინტერესდა. მინისტრის მოადგილე გენადი არველაძემ კი ანაკლიის პროექტით იაპონური კომპანიები დაინტერესებაზე ისაუბრა. 

2023 წლის სახელმწიფო ბიუჯეტის თანახმად კი ანაკლიის ღრმაწყლოვანი ნავსადგურის განვითარებისთვის 2.850 მლნ ლარია გათვალისწინებული, რაც მიმდინარე წლის მაჩვენებელს 1.3 მლნ ლარით აჭარბებს. აღნიშნული თანხიდან 8 დასაქმებულის შრომის ანაზღაურებაზე მომავალ წელს 151.8 ათასი ლარით მეტი დაიხარჯება, ვიდრე წელს იყო და 330 ათასი ლარი გახდება.

გაშვებულ შესაძლებლობად აღიქვამს ანაკლიის პორტის საკითხს „ანაკლია სითის“ ყოფილი ხელმძღვანელი ქეთი ბოჭორიშვილი და ამბობს, რომ იაპონური მხარის მხრიდან პროექტის მიმართ ინტერესი პროექტის დასაწყისშივე იყო, სხვა ნაბიჯები კი რასაც სახელმწიფო დგამს არასაკმარისია.

„დღეს უკვე ყველამ დაინახა ამ პორტის საჭიროება, რადგან რა მარშრუტზეც დღეს საქართველო არის ეს ძალიან მნიშვნელოვანია მსოფლიოსთვის, ცენტრალური აზიისთვის და ევროპისთვის, მათი სურვილია არსებობდეს რუსეთის ალტერნატიული გზა რეგიონში. ეს არ ნიშნავს, რომ ყველა ტვირთი ჩვენი გავლით წამოვა, მაგრამ არის როგორც ეკონომიურად მომგებიანი ასევე უსაფრთხოების მხრივ სასარგებლო საკითხები, ამიტომ ამ პროექტისთვის ყველაფერი უნდა გაკეთდეს და მხოლოდ სიტყვები არასაკმარისია. რუსეთ-უკრაინის ომის გამო ჩრდილოეთის გზები ჩამოვიდა სამხრეთით, სადაც შუა დერეფანი საქართველოა, ამიტომ ახლა ანაკლიის პორტის არსებობა ქვეყნის ეკონომიკისთვის გარდამტეხი იქნებოდა.

თუმცა, დღეს პროექტის ირგვლის არასახარბიელო გარემოა ანუ ის სასამართლო პროცესი, რაც ყოფილ ინვესტორ კომპანიას სახელმწიფოსთან აქვს და ასევე პროექტის შელახული რეპუტაცია“, — აღნიშნა ქეთი ბოჭორიშვილმა.

2017 წლის 24 დეკემბერს ანაკლიაში პორტის მშენებლობის დაწყება მაშინდელმა პრემიერ-მინისტრმა გიორგი კვირიკაშვილმა და „ანაკლიის განვითარების კონსორციუმის“ დამფუძნებელმა მამუკა ხაზარაძემ საზეიმო ვითარებაში განაცხადეს. 2020 წლის 9 იანვარს კი საქართველოს მთავრობამ ვალდებულებების შეუსრულებლობის გამო „ანაკლიის განვითარების კონსორციუმს“, რომელსაც ანაკლიის პორტი უნდა აეშენებინა, ხელშეკრულება გაუწყვიტა.