1-ლი იანვრიდან უცხოურ ვალუტაში აღებული იპოთეკური სესხების მაქსიმალური დასაშვები ხანგრძლივობა 15 წლის ნაცვლად 10 წლით განისაზღვრება. თუმცა აღნიშნული გადაწყვეტილება სამშენებლო კომპანიების შიდა განვადებებს არ შეეხებათ.

ეკონომისტი, აკაკი ცომაია ამბობს, რომ დაკრედიტებას მხოლოდ მსხვილი სამშენებლო კომპანიები შეძლებენ, რომელთა კაპიტალიზაციაც ბაზარზე ისედაც მაღალია.

,,სებ-ის ამოცანა აბსოლუტურად გასაგებია. მათ სურთ, გაძვირებული რეფინანსირებული სესხების პირობებში, არ გაიზარდოს ქვეყანაში დოლარში სესხების რაოდენობა. რაც უფრო მეტია ლარში გაცემული სესხი, მით მეტი გავლენის მოხდენა შეუძლია ეკონომიკაზე ეროვნულ ბანკს. თითოეული ადამიანი რა გადაწყვეტილებას მიიღებს ამ კონკრეტულ საკითხთან დაკავშირებით, პროგნოზს ვერავინ გააკეთებს. ვის ურჩევნია 10 წლით სესხი ლარში, ან 15 წლით დოლარში, ეს ყველა ინდივიდის პიროვნული გადაწყვეტაა.

15-წლიანი სესხის შემთხვევაში მომხმარებელს უწევს მეტის გადახდა, მაგრამ შედარებით მცირდება ყოველთვიური გადასახდელი თანხა. აქ კიდევ ბევრი ცვლადი ფაქტორია, რაც გადაწყვეტილებას განაპირობებს. ინფლაცია, ლარის კურსი და ა.შ. ეს ეკონომიკაზე არანაირ გავლენას არ მოახდენს, მხოლოდ პირად არჩევანზე და მშენებლობის სექტორზე. მცირე სამშენებლო კომპანიები ისედაც ბანკის მეშვეობით აკეთებდნენ ამ ყველაფერს. კომპანიებს კი, რომლებსაც ძალიან დიდი ფინანსური რესურსი აქვთ და თავად შეუძლიათ დააკრედიტონ საკუთარი მომხმარებლები, ამ ცვლილებით ექნებათ სარგებელი. შედეგად, გამოდის, რომ დაკრედიტებას მხოლოდ მსხვილი კომპანიები შეძლებენ“, - განაცხადა ცომაიამ ,,ბიზნესპრესნიუსთან“.

ცნობისათვის, საქართველოს ეროვნული ბანკის გადაწყვეტილებით, უცხოურ ვალუტაში აღებული იპოთეკური სესხების მაქსიმალური დასაშვები ხანგრძლივობა 15 წლის ნაცვლად 10 წლით განისაზღვრა. აღნიშნული გადაწყვეტილება ეროვნული ბანკის ფინანსური სტაბილურობის კომიტეტმა 8 დეკემბერს მიიღო. ცვლილება 2022 წლის იანვრიდან შევა ძალაში.

bpn.ge