თბილისის ცენტრალურ უბანში, კოსტავას ქუჩაზე, მრავალფუნქციური კომპლექსში შენდება. ყოფილი „დანიური სახლის“ შენობის ნაცვლად, ტერიტორიაზე სავაჭრო საოფისე სივრცე აშენდება. მჭიდროდ ჩამოყალიბებულ ურბანულ გარემოში პროექტით განსაზღვრულია 6–სართულიანი შენობის მშენებლობა, რომლის მაქსიმალური სიმაღლე 29 მეტრი იქნება. პროექტს შპს „გიზა კაპიტალი“ ახორციელებს.
არქიტექტურის სამსახურმა მშენებლობის ნებართვა გასული წლის თებერვალში გასცა. მანამდე, 2020 წელს, შპს „გიზა კაპიტალმა“ ტერიტორიაზე არსებული შენობის დემონტაჟი მოითხოვა.
განმარტებითი ბარათიდან ირკვევა, რომ შენობის -1, 0 და +1 სართულზე კომერციული ფართები იქნება განთავსებული, ხოლო მე-2, მე-3, მე-4 და მე- 5 სართულზე საოფისე ფართები.
დოკუმენტში წერია, რომ შენობის ექსტერიერი გადაწყვეტილია მინის დაკიდებული რომბისებური ფასადის სისტემით, ხოლო თვითონ მოცულობაც და მისი გეომეტრიაც დინამიურია და კიდევ უფრო ხაზს უსვამს ამგვარ ექსტერიერის არქიტექტურულ გადაწყვეტას. შენობის უკანა ფასადი კი ამავე რომბისებური ფორმის ალუმინის პანელებით არის მოპირკეთებული.
შპს „გიზა კაპიტალი“ მეწარმეთა და არასამეწარმეო იურიდიული პირების რეესტრში 2012 წელს დარეგისტრირდა. კომპანიის დირექტორი და წილის 50%–ის მფლობელი გიორგი თავდიშვილია, ხოლო დანარჩენ 50% ნანა აროშიძეს ეკუთვნის.
აღსანიშნავია, რომ გარდა ცენტრალური უბნისა, გიორგი თავდიშვილს მშენებლობები დედაქალაქის სხვადასხვა უბანში აქვს. ბიზნესმენი ძველ თბილისში, კრწანისის რაიონში 75–ნომრიან სასტუმროს აშენებს. ასევე სასტუმრო კომპლექსს აშენებს ჭილაძის ქუჩაზე. პროექტი მოიცავს ორი ბლოკისგან შემდგარ სასტუმროებს „holiday inn express“-სა და „ameri plaza“-ს.
„საერთაშორისო გამჭვირვალობა - საქართველოს” ვებსაიტის www.companyinfo.ge-ის მიხედვით გიორგი თავდიშვილი ბიზნეს საქმიანობის სია საკმაოდ ვრცელია:
შპს ჯი-თი გრუპ - 33%;
შპს ევროპროდუქტი - აღმასრულებელი დირექტორი;
შპს ოლდ სითი გრუპი - დირექტორი - 25%;
შპს ჯი თი ჯი კაპიტალი - დირექტორი - 34%;
შპს ამერი პლაზა ჰორეკა ჯგუფი - დირექტორი;
შპს ამერი დეველოპმენტი - დირექტორი 20%;
შპს ზეკარი - დირექტორი - 100%;
შპს ამერი - დირექტორი - 100%;
შპს ვესტინვესტი - 33.33%;
შპს იმპექს-ჯორჯია - 50%;
შპს გიზა კაპიტალი დირექტორი - 50%.
საერთაშორისო გამჭვირვალეობა-საქართველოს მიერ შექმნილი სატენდერო მონიტორის ინფორმაციით, მის ერთ-ერთ კომპანიას შპს „ჯი-თი გრუპ“-ს დღემდე 148 260 594 ლარის 160 ტენდერი აქვს მოგებული. კომპანიას სახელმწიფო უწყებებთან 722 გამარტივებული შესყიდვის ხელშეკრულება აქვს გაფორმებული, რომელთა საერთო ღირებულება 2 951 832 ლარია.
ბიზნეს პარტნიორებს „ქართული ოცნება — დემოკრატიული საქართველოსთვის“ 120 000 ლარი აქვთ შეწირული, ხოლო სალომე ზურაბიშვილისთვის — 60 000 ლარი.
შპს ჯი თი ჯი კაპიტალი სახელმწიფო შესყიდვებში მონაწილეობას არ იღებს. თუმცა ამ კომპანიასაც ქართული ოცნება-დემოკრატიული საქართველოსთვის 120,000 ლარი აქვს შეწირული, ხოლო სალომე ზურაბიშვილისთვის 60 000 ლარი.
შემოწირულებით გიორგი თავდიშვილთან დაკავშირებული კიდევ ერთი კომპანია გამოირჩევა. „ამერი დეველოპმენტის“ მეწილეებმა ქართული ოცნება-დემოკრატიული საქართველოს - 180 000 ლარი შესწირეს, ხოლო პარტია „საქართველო არ იყიდება“-ს — 120 000 ლარი.
შპს „ვესტინვესტი“ - ამ კომპანიასთან დაკავშირებული პირებმა „ქართული ოცნება — დემოკრატიული საქართველოს“ 60 000 ლარი, ხოლო სალომე ზურაბიშვილს 25 000 ლარი შესწირეს.
ბიზნესმენთან დაკავშირებულმა კიდევ ერთმა კომპანიამ შპს „ევროპროდუქტმა“ 19 სახელმწიფო გამარტივებული შესყიდვიდან 336 914 ლარი მიიღო.
მრავალფუნქციური კომპლექსის პროექტის განმახორციელებელი „გიზა კაპიტალი“ ტენდერებში მონაწილეობას არ იღებს, თუმცა კომპანიის ერთ-ერთ მეწილეს პარტია „საქართველო არ იყიდება“-თვის 60 000 ლარი აქვს შეწირული.
ბაჩო ადამია