ყაზახეთში მიმდინარე მოვლენებთან დაკავშირებით პირველ კომენტარს აკეთებს უმსხვილესი ფინტექ-კომპანიის Kaspi.kz-ის CEO მიხეილ ლომთაძე. წარმოშობით ქართველი ბიზნესმენი საკუთარ მომხმარებლებს მიმართავს და ამბობს, რომ მისი გუნდი თავდაუზოგავად მუშაობს, რომ მათი სერვისები მაქსიმალურად ხელმისაწვდომი იყოს. საქართველოს ერთ-ერთი უმდიდრესი მოქალაქე იმ მნიშვნელოვან კითხვებს სცემს პასუხებს რომელიც Kaspi.kz-ის მომხმარებლებს აქვთ. ბიზნესმენი დარწმუნებულია, რომ მდგომარეობა მალე დასტაბილურდება და ყაზახეთი ცხოვრების ჩვეულ რიტმს დაუბრუნდება. „კომერსანტი“ მიხეილ ლომთაძეის მიმართვას უცვლელად გთავაზობთ:
„ჩვენო ძვირფასო მომხმარებლებო,
კომპანია კასპი თავდაუზოგავად მუშაობს იმისთვის, რომ ჩვენი სერვისები მაქსიმალურად ხელმისაწვდომი იყოს. დარწმუნებულები ვართ და იმედი გვაქვს, რომ სიტუაცია მალე დასტაბილურდება და ყველა ცხოვრების ჩვეულ რიტმს დავუბრუნდებით. გთხოვთ, გაუფრთხილდით საკუთარ თავებს და ახლობლებს.
გულწრფელად ვწუხვარ, რომ თქვენ შეიძლება არ გქონდეთ ჩვენი ყველა სერვისით სარგებლობის შესაძლებლობა. საგანგებო მდგომარეობის გამოცხადების გამო რიგ რეგიონებში ინტერნეტ კავშირი გამორთულია.
ნება მომეცით ვუპასუხო 5 მნიშვნელოვან შეკითხვას:
1. რატომ ვერ ვხსნი მობილურ აპლიკაციას.
მობილური აპლიკაცია მუშაობას. გარკვეული რეგიონის მაცხოვრებლები ვერ ხნიან აპლიკაციას ინტერნეტ კავშირის გამორთვის გამო. როგორც კი კავშირი აღდგება, ჩვენი ყველა სერვისთ სარგებლობას თქვენ შეუზღუდავად შეძლებთ.
2.რატომ არ მუშაობენ ბანკომატები და რატომ არ შემიძლია ფულის გამოტანა?
ბანკომატები არ მუშაობენ იქ, სადაც არ არის კავშირი. ასევ, გასაგები მიზეზების გამო გართულებულია ინკასაცია. თანამშრომლების უსაფრთხოება ჩვენთვის მთავარი პრიორიტეტია. ამ სიტუაციაშიც, ჩვენი გუნდი ცდილობს, სადაც შესაძლებელია ბანკომატებმა იქ გამართულად იმუშაონ.
3. რატომ არ მუშაობენ ფილიალები?
ეროვნული ბანკის განცხადებით და რეგულაციით, ყველა ბანკის მუშაობა დროებით გაჩერებულია. ეს გადაწყვეტილება მიიღეს ფინანსური ორგანიზაციების თანამშრომლების უსაფრთხოების გამო.
ჩვენი რამდენიმე ფილიალი დაარბიეს. ფილიალები დავხურეთ, თანხა იქ არ ყოფილა. მაროდიორებმა ჩაამსხვრიეს ვიტრინები და დაამტვრიეს ტექნიკა, მაგრამ ამას ძალიან სწრაფად აღვადგენთ. მთავარი არის ის, რომ არც ერთი თანამშრომელი და მომხმარებელი არ დაზარალებულა.
4. შექმნილი მდგომარეობის გამო სესხის თანხა ვერ შემაქვს, დამერიცხება თუ არა ჯარიმა?
შეგიძლიათ არ იდარდოთ. ჩვენ მდგომარეობის დასტაბილურებამდე შევაჩერეთ ჯარიმის დარიცხვა. ახლა ყველაზე მთავარი არის მშვიდობა და უსაფრთხოება.
5. რა დაემართება ჩემს ფულს და ანაბარს?
მეანაბრეებს ფული უსაფრთხოდაა შენახული. ეს ჩვენთვის ყოველთვის იყო ერთ-ერთი მთავარი პრიორიტეტი. ჩვენ მომხმარებლებს იმედებს არასდროს ვუცრუებთ.
დარწმუნებული ვარ რომ მდგომარეობა მალე დასტაბილურდება. ჩვენი გუნდი მუშაობს 24 საათის განმავლობაში. ჩვენ ყოველთვის ვიცავთ ჩვენი მომხმარებლების ინტერესებს.
ჩვენ თქვენთან ვართ!
მშვიდობის სურვილით, თქვენი მიხეილი“, - განაცხადა ქართველმა ბიზნესმენმა.
ყაზახეთში მიმდინარე მოვლენების ფონზე ლონდონის საფონდო ბირჟაზე კაპიტალიზაციით უმსხვილესი ფინტექ-კომპანიის Kaspi.kz აქციები ჩამოიშალა. ამის შესახებ ინფორმაციას ყაზახეთის მინორიტარულ აქციონერთა ასოციაცია ავრცელებს. მათი ინფორმაციით, ყველაზე მეტი შემოსავალი Kaspi.kz-მა დაკარგა - 5 იანვრის ვაჭრობის შედეგად კომპანიის დანაკარგმა 30% შეადგინა.
ამასთან, ყაზახეთში განვითარებული მოვლენების ფონზე, Forbes-ის მილიარდერების სიაში ბიძინა ივანიშვილმა 46 წლის ქართველ ბიზნესმენს მიხეილ ლომთაძეს კვლავ გადაუსწრო. მიხეილ ლომთაძემ საქართველოს უმდიდრესი მოქალაქის სტატუსი დაკარგა. გამოცემა წარმოშობით ქართველი ბიზნესმენის ქონებას $ 3,1 მილიარდად აფასებს. ბოლო მონაცემებით მან $ 2.1 მილიარდი დაკარგა და უმდიდრეს ადამიანთა სიაში 1036-ე ადგილზე გადაინაცვლა.
მასშტაბური პროტესტი ყაზახეთში საწვავის ფასების მატების გამო დაიწყო, რომელიც პოლიციასთან დაპირისპირებაში გადაიზარდა. სამართალდამცველებმა დემონსტრანტების წინააღმდეგ ცრემლსადენი გაზი და სპეციალური შუშხუნები გამოიყენეს, თუმცა პროტესტი არ შეწყდა. მასობრივი საპროტესტო აქციების ფონზე მთავრობა გადადგა. გადაწყვეტილება ქვეყნის პრეზიდენტმა, ყასიმ-ჟომართ თოყაევმა მიიღო.
ბაჩო ადამია