2022 წლის II კვარტალში საქართველოში უმუშევრობის დონე წინა წლის შესაბამის პერიოდთან შედარებით 4.0 პროცენტული პუნქტით შემცირდა და 18.1 პროცენტი შეადგინა, — აღნიშნულის შესახებ ინფორმაციას საქსტატი ავრცელებს.
2022 წლის მეორე კვარტალში წინა წლის შესაბამის პერიოდთან შედარებით დაქირავებულთა რიცხოვნობა გაიზარდა 36.2 ათასი კაცით (4.4%) და 867.9 ათასს მიაღწია, ხოლო თვითდასაქმებულთა რიცხოვნობა 19.4 ათასით გაიზარდა (5.1%) და 401.2 ათასი შეადგინა. ამავე პერიოდში უმუშევართა რაოდენობა შემცირდა 63.0 ათასით (18.3%) და 281.6 ათასი შეადგინა.
მიზეზებზე „კომერსანტთან“ ეკონომიკის დოქტორმა, ირაკლი მაკალათიამ ისაუბრა, მისი თქმით პირველ რიგში როდესაც საუბარია უმუშევრობის დონის შემცირებაზე, თუ ამას პოზიტიურად განვიხილავთ ის დასაქმების დონის ზრდაზე უნდა აისახოს. მისივე თქმით სწორი ინტერპრეტაციისთვის კვარტლების შედარება არ არის საკმარისი, რადგან მაჩვენებლები შესაძლოა სეზონური ხასიათის იყოს.
„პირველ რიგში როდესაც ვსაუბრობთ უმუშევრობის დონის შემცირებაზე, თუ ამას პოზიტიურად განვიხილავთ ის უნდა აისახოს დასაქმების დონის ზრდაზე. როდესაც კვარტლებით ვადარებთ ეს ზუსტ შედეგებს და სწორი ინტერპრეტაციის საშუალებას არ იძლევა. სწორი ინტერპრეტაციისთვის საჭიროა, რომ საშუალო წლის მაჩვენებლები შევადაროთ ერთმანეთს, იმიტომ რომ კვარტალური მაჩვენებლები შეიძლება სეზონური ხასიათის იყოს და ამიტომ გარკვეულ ცდომილებებს ან ცვლილებებს იწვევდეს. თუმცა მიზეზებს რაც შეეხება აქ უმუშევრობაზე როცა ვსაუბრობთ, თუ მას პოზიტიურად განვიხილავთ და ეს უმუშევრობის შემცირება ნიშნავს დასაქმების დონის ზრდას. დასაქმების მაჩვენებელს, რომ ვნახავთ ამ მეორე კვარტალში წინა წლის მეორე კვარტალთან შედარებით 2,1% -ით არის გაზრდილი და ეს ბევრს არაფერს არ ნიშნავს.
ახლა თვითონ დასაქმების დონის ზრდის გამომწვევ მიზეზებს თუ განვიხილავთ ერთ-ერთი ფაქტორი არის ის, რომ მთავრობამ დაიწყო სოციალურად დაუცველი ადამიანების დასაქმება და ამ პროგრამით 20 000 ადამიანი დასაქმდა. რამდენად მოხვდა ეს კვლევაში არ ვიცი, თუმცა დიდწილად შეგვიძლია ვივარაუდოთ, რომ ამ ადამიანების სამუშაო ძალაზე დამატებამ, მოგცა დასაქმების დონის ზრდა. თუ შევხედავთ ორ კატეგორიას, დაქირავებულებს და თვითდასაქმებულებს, ვნახავთ რომ დასაქმების დონის ზრდაში დაქირავებით დასაქმებულის ზრდა 31% -ით მონაწილეობდა და 35% - ით თვითდასაქმებულები, ანუ დასაქმების ზრდა 35%-ით თვითდასაქმებულების ხარჯზე მოდის და თვითდასაქმებულებს, რომ დაბალი შემოსავლები აქვთ და კეთილდღეობას ვერ ქმნიან ეს უკვე გავლილი თემაა.
გარდა იმისა, რომ უმუშევრობის შემცირების მცირე პროცენტული მაჩვენებელი გვაქვს, ამავე დროს უმუშევრობის შემცირებაზე იმოქმედა სამუშაო ძალის შემცირებამ, რადგან მეორე კვარტალში წინასთან შედარებით 15+ მოსახლეობის რაოდენობა შემცირდა და შესაბამისად გადაანგარიშების დროს შეფარდებამ მოგვცა ის, რომ უმუშევრობის დონე შემცირდა, და აქედან გამომდინარე არ არს პოზიტიური მაჩვენებელი“, - აღნიშნა ირაკლი მაკალათიამ.
2022 წლის II კვარტალში, წინა წლის შესაბამის პერიოდთან შედარებით, დასაქმების დონე გაზრდილია როგორც ქალებში, ასევე კაცებში შესაბამისად 1.6 და 2.9 პროცენტული პუნქტით.
“კომერსანტს“ „საქსტატში“ განუცხადეს, რომ კონკრეტული სფეროები და დარგები, თუ რის ხარჯზეც მოხდა ქვეყანაში უმუშევრობის მაჩვენებლის შემცირება და დასაქმების მაჩვენებლის ზრდა, „საქსტატის“ მიერ გამოქვეყნდება 2023 წლის მაისში.
თაკო კვაჭანტირაძე