კომპანია „საირმე მინერალ ვოთერსის“ თანამშრომლებმა კომპანიის შენობასთან, სრულმასშტაბიანი გაფიცვა დაიწყეს. მოთხოვნების ჩამონათვალი 10 პუნქტს მოიცავს, რომელთა შორისაა ხელფასების 30%-იან ზრდა, საქსტატის მონაცემების შესაბამისად ხელფასების ყოველწლიურ ინდექსაცია, საპენსიო გადასახადის დამსაქმებლის მიერ დაფარვა, ღირსეული და უსაფრთხო შრომით პირობები და სხვა.
„საირმის“ დირექტორის მოადგილე ლევან კასრაძე „კომერსანტთან“ ამბობს, რომ უშუალოდ წარმოებაში დასაქმებულთა ხელფასი რეგიონში საშუალოზე მაღალია და კომპანია კანონით განსაზღვრულ საპენსიო გადასახადსაც იხდის.
„პროფკავშირების მიერ ორგანიზებულ აქციაში მონაწილეობას მხოლოდ თანამშრომელთა ნაწილი იღებს. მეორე ნაწილი განაგრძობს მუშაობას და წარმოების პროცესი უწყვეტ რეჟიმში მიმდინარეობს, სასურველი იქნება, რომ გაფიცულმა თანამშრომლებმა მომუშავე თანამშრომლებს მუშაობის პროცესში ხელი არ შეუშალონ. საუბარია იმაზე, რომ მედიაციის პროცესი დამთავრდა, თუმცა პროცესი მიმდინარეობს და კომპანია აქტიურად იყო ჩართული მოლაპარაკების პროცესში გაფიცვამდეც და ახლაც. მედიაციის პროცესის დროს მოთხოვნებში ცვლილებები ხდებოდა და მათი რაოდენობა იზრდებოდა, ჩვენ დაგვჭირდა გონივრული ვადა, რომ ჩვენი შეთავაზებები მიგვეწოდებინა. მედიაციის პროცესი 16 თებერვლის ჩათვლით გრძელდება.
უშუალოდ წარმოებაში დასაქმებულთა ხელფასი რეგიონში საშუალოზე მაღალია. წინა წელს რამდენჯერმე მოხდა ხელფასების გაზრდა, იმაზე მეტად ვიდრე ინფლაციის მაჩვენებელი იყო. რაც შეეხება მათ მოთხოვნებს საპენსიო ფონდში შენატანთან დაკავშირებით, კომპანია კანონით განსაზღვრულ საპენსიო გადასახადს იხდის. სხვა მოთხოვნებთან დაკავშირებით, ჩვენგან შეთავაზებები გაგზავნილია და ჯერჯერობით პასუხი არ მიგვიღია, მზად ვართ კონსტრუქციული დიალოგისთვის. ვრცელდება სხვა დეზინფორმაციებიც, რაზეც არ მსურს კომენტარის გაკეთება, ახლა მთავარია მოხდეს შეთანხმება. ჩვენთან დასაქმებულია 62 ადამიანი და როგორც ჩემთვის არის ცნობილი 27 მათგანია გაფიცული“, — ამბობს ლევან კასრაძე.
საწარმოს თანამშრომლების გაფიცვას აგრარული მეურნეობის, ვაჭრობის და მრეწველობის პროფკავშირი „ლაბორი“ შეუერთდა. პროფკავშირის თავმჯდომარის, გიორგი დიასამიძის თქმით, გაფიცვა იქამდე გაგრძელდება, ვიდრე მოთხოვნები არ დაკმაყოფილდება.