თალიბებმა გაააქტიურეს დიპლომატიური ძალისხმევა ამერიკულ ბანკებში ავღანეთის აქტივების და ფინანსური დახმარების მიღების კუთხით. ეს ძალიან აქტუალური საკითხია, რადგანაც ავღანეთი ჰუმანიტარული კატასტროფის ზღვარზე იმყოფება.
ამერიკა და მისი მოკავშირეები ავღანეთის ახალ ხელისუფლებას კონკრეტულ პოლიტიკურ პირობებს უყენებენ.
თალიბების მთავარი მხარდამჭერები არიან რუსეთი და ჩინეთი, რომლებიც საკითხის დეპოლიტიზებას მოითხოვენ. ვლადიმერ პუტინმა განაცხადა, რომ ავღანური ფული დასავლურ ბანკებში ჰუმანიტარული საკითხების გადაწყვეტას, მაგალითად, წამლების ან სამედიცინო აღჭურვილობის შეძენას სასწრაფოდ უნდა მოხმარდეს.
ამ საკითხთან დაკავშირებით დიპლომატიური აქტიურობის ცენტრი ყატარის დედაქალაქი დოჰა გახდა. სწორედ იქ შედგა თალიბების შეხვედრა ევროკავშირის და ბრიტანეთის მაღალი დონის დიპლომატებთან.
ავღანეთის საგარეო საქმეთა სამინისტროს პრეს-მდივანმა აბდულ კახარ ბალხის თქმით, მხარეებმა ქვეყანაში შექმნილი ჰუმანიტარული მდგომარეობა, ასევე ჯანდაცვის და უსაფრთხოების საკითხები განიხილეს.
„თალიბანის დელეგაციამ ევროპელ დიპლომატებს პოლიტიკური და ჰუმანიტარული საკითხების გაყოფისკენ მოუწოდა. მნიშვნელოვანია წინ სიარული თანამშრომლობის და არა ზეწოლის გზით, “ - განაცხადა მან.
ევროკავშირის დიპლომატიური უწყების ინფორმაციით კი, „დიალოგი ევროკავშირის მიერ ავღანეთის ახალი ხელისუფლების აღიარებას არ გულისხმობს და ის მხოლოდ ევროპის და ავღანელი ხალხის ოპერატიული ურთიერთქმედების ნაწილია“.
ბრიუსელი თანახმაა ფული ქაბულს გადასცეს, ოღონდ კონკრეტული პირობების შესრულების შემთხვევაში, მათ შორისაა, ამნისტია იმ ავღანელებისთვის, რომლებიც წინა ხელისუფლებასთან თანამშრომლობდნენ, ინკლუზიური მთავრობის შექმნა, გოგონებისთვის განათლებასთან წვდომის უზრუნველყოფ, და ავღანეთში ტერორისტული ორგანიზაციების მოქმედების აღკვეთა.
ვაშინგტონმა აღვანეთიდან ჯარები გაიყვანა, მაგრამ ისლამისტებზე ზეწოლის ძლიერი ინსტრუმენტი შეინარჩუნა. ჯერ კიდევ 15 აგვისტოს ბაიდენის ადმინისტრაციამ ავღანეთის მთავრობის რეზერვები ამერიკულ ბანკებში გაყინა. ზუსტი თანხა არ დასახელდა, თუმცა, საუბარია მილიარდებზე.
თალიბები ამ თანხების მათთვის გადაცემას მოითხოვენ და შესაბამისი მიმართვა კონგრესს დიდი ხნის წინ გაუგზავნეს.
აშშ-ი ს წარმომადგენელმა ავღანეთის საკითხებში ტომას უესტმა განაცხადა, რომ თალიბებს ფულის სწრაფი დაბრუნების იმედი არ უნდა ჰქონდეთ, რადგანაც თავად დაარღვიეს ნაკისრი ვალდებულებები.
„აშშ-ს ოფიციალურმა პირებმა თალიბები არაერთხელ გააფრთხილეს, რომ ძალაუფლების სამხედრო გზით დაუფლების შემთხვევაში, ფინანსური დახმარება საერთაშორისო თანამეგობრობისგან შეწყდებოდა. ამჟამინდელი კონტაქტები ვაშინგტონს და ქაბულს შორის თალიბების ხელისუფლების აღიარებას არ ნიშნავს და მათ სახსრებთან წვდომის მისაღებად დიდი ძალისხმევა დასჭირდებათ. ჩვენი პოზიცია ნათელი და გამჭვირვალეა - თალიბების ლეგიტიმურობა დამოკიდებულია ისეთ საკითხებზე, როგორცაა: ბრძოლა ტერორიზმთან, ინკლუზიური მთავრობის შექმნა, უმცირესობების უფლებების პატივისცემა და გოგონებისთვის განათლებასთან წვდომა,“ - განაცხადა უესტმა.
რუსეთთან ერთად, თალიბებს მხარდაჭერას ჩინეთიც უცხადებს.
„ცალმხრივი სანქციები და ავღანეთის აქტივების გაყინვა ქვეყანაში ჰუმანიტარულ კრიზისს აღრმავებს, ამიტომაც, ყველა დაბლოკილი აქტივები ნამდვილ მფლობელებს უნდა დაუბრუნდეს,“ - განაცხადა ჩინეთის საგარეო საქმეთა სამინისტროს ოფიციალურმა წარმომადგენელმა ჩჟაო ლიცზიანმა.
ავტორი: თენგიზ აბლოთია
წყარო: kommersant.ru
თალიბანი
