აშშ-ის და რუსეთის პრეზიდენტების მოლაპარაკებების შემდეგ დასავლეთმა თავისი შესაძლებლობები კიევის მხარდაჭერის კუთხით შედარებით მკვეთრად განსაზღვრა - ევროპელები და ამერიკელები მოსკოვს „საშინელი შედეგებით“ ემუქრებიან, თუმცა, შეიარაღებულ დახმარებას არ გეგმავენ.
ამავე დროს, არაოფიციალურად დასავლეთი უკრაინაზეც გარკვეულ ზეწოლას ახორციელებს, რის გამოც ქვეყნის პრეზიდენტმა ვოლოდიმირ ზელენსკიმ დასავლელი პარტნიორების პასიურობით უკმაყოფილება გამოხატა და დონბასზე რეფერენდუმის ჩატარება არ გამორიცხა.
11-12 დეკემბერს ლივერპულში დიდი შვიდეულის ქვეყნების საგარეო საქმეთა მინისტრების შეხვედრის ფარგლებში, თეთრი სახლის ერთ-ერთმა მაღალჩინოსანმა შეატყობინა Bloomberg-ს, რომ ამერიკა ევროპელ მოკავშირეებთან ამ საკითხზე ერთიანი პოზიციის ჩამოყალიბებას ცდილობს.
„თუ რუსეთმა უკრაინის წინააღმდეგ ომი დაიწყო, პასუხი ძალიან მკვეთრი უნდა იყოს, და მოსკოვის მიმართ სანქციები ერთიანი ძალისხმევით უნდა იყოს მიღებული“, - ციტირებს წყაროს სააგენტო.
შეხვედრის მასპინძელმა, ბრიტანეთის საგარეო საქმეთა მინისტრმა ლიზ ტრასმაც განაცხადა, რომ ზომები რუსეთის წინააღმდეგ ძალიან მტკივნეული იქნება, თუმცა, სამხედრო ჩარევის სცენარი არ უხსენებია.
ეს საკითხი მან აშშ-ის სახელმწიფო მდივანთან ენტონი ბლინკენთან განიხილა, თუმცა, აქაც, ისევე, როგორც სამიტის დროს გაკეთებულ ყველა განცხადებაში, საუბარი მხოლოდ ეკონომიკურ, და არა ძალისმიერ ზომებზეა.
უკრაინის მხარდაჭერის ფარგლები ჯო ბაიდენმა განსაზღვრა - მისი თქმით, აგრესიას რუსეთისთვის დამანგრეველი შედეგები ექნება, თუმცა, „შტატების მიერ ძალის ცალმხრივი გამოყენების საკითხი არ განიხილება“.
ამერიკის პრეზიდენტის თქმით, აგრესიის პასუხად შესაძლებელი იქნება ნატოს დამატებითი კონტინგენტის გაგზავნა უნგრეთში, ლატვიაში, ლიეტუვაში, პოლონეთში, რუმინეთში, სლოვაკეთში, ჩეხეთში და ესტონეთში. თუმცა, მისი თქმით, ამერიკული ჯარების უკრაინაში განთავსების საკითხი „არასდროს განიხილებოდა“.
უკვე გადაიდგა პირველი ნაბიჯი, რომელიც ვაშინგტონის პოზიციას ასახავს - ტელეარხ NBC-ს ინფორმაციით, ვაშინგტონმა უკრაინისთვის 200 მლნ. დოლარის მოცულობის დახმარება შეაჩერა - პრეზიდენტმა ეს გადაწყვეტილება „ესკალაციის თავიდან აცილების მიზნით“ მიიღო.
რუსულ-უკრაინული ურთიერთობების დიპლომატიურ არხებში დაბრუნებას ევროპელი პოლიტიკოსებიც ცდილობენ. საფრანგეთის პრეზიდენტი ტელეფონით გაესაუბრა უკრაინელ კოლეგას და მას ნორმანდიულ ფორმატში (უკრაინა, რუსეთი, გერმანია, საფრანგეთი) მოლაპარაკებების განახლებისკენ მოუწოდა.
უახლოეს დღეებში უკრაინის ირგვლივ შექმნილ სიტუაციას მაკრონი გერმანიის ახალ კანცლერთან ოლაფ შოლცთან, შემდეგ კი ვლადიმერ პუტინთან განიხილავს. უკრაინელი ექსპერტის მიხაილ პორგებინსკის თქმით, დასავლეთის მხრიდან აქცენტის გაკეთება მხოლოდ ეკონომიკურ ზომებზე და მოლაპარაკებებზე კიევის დაყოლიების მცდელობები შემთხვევითი არაა.
„ჯო ბაიდენს არ სურს ჩაიყენოს თავი უხერხულ მდგომარეობაში და კიდევ ერთხელ დაანახოს მთელს მსოფლიოს, რომ მოკავშირის დაცვა არ შეუძლია, როგორც ეს ერთხელ უკვე ავღანეთში იყო. ამიტომაც ის ომის თავიდან აცილებს ცდილობს და წინსწრებით თამაშობს. ასევე პუტინიც ცდილობს თავიდან აირიდოს ომი უკრაინაში, რომელიც მას კოლოსალურ პრობლემებს შეუქმნის, თუმცა, ეს სახის შენარჩუნებით უნდა გააკეთოს. ასე რომ ომი დონბასზე არავის სჭირდება და ამ საქმეში ბაიდენი და პუტინი ერთ ნავში აღმოჩნდნენ“, - მიიჩნევს ექსპერტი.
.
kommersant.ru