პრაიდის საწინააღმდეგო აქციის წევრები „თბილისი პრაიდის“ ოფისში აივნიდან შევიდნენ,  LGBT+ დროშა დახიეს და საქართველოს დროშა გადმოფინეს.

„პრაიდის“ წევრების თქმით, ამ დროს ოფისში არავინ იმყოფებოდა და ყველა უსაფრთხოდაა.

დაშავებული მედიის 10-ზე მეტი წარმომადგებენლი, ჩამსხვრეულია შუშები - ასე მიმიდნარეობს ძალადობრივი ჯგუფის წევრების აქცია თბილისი პრაიდის წინააღმდეგ. შსს არ ავრცელებს ინფორმაციას, დააკავა თუ არა ვინმე. უწყება თბილისი პრაიდს მოუწოდებს, უარი თქვან საჯარო სივრცეში მარშის გამართვაზე.

საზოგადოებისთვის ცნობილია, რომ დღეს თბილისში, რუსთაველის გამზირზე მიმდინარე აქციის გარდა, სხვადასხვა დროს და სხვადასხვა ლოკაციაზე გარკვეული ჯგუფების მიერ რამდენიმე მასშტაბური შეკრება-მანიფესტაცია არის დაანონსებული, მათ შორის, იგეგმება თბილისი პრაიდის კვირეულის ფარგლებში დასკვნითი ღონისძიების ჩატარება.

მაღალი საზოგადოებრივი ინტერესიდან გამომდინარე, განვმარტავთ, რომ თბილისი პრაიდის დასკვნითი ღონისძიების ჩატარება, ღონისძიებაში ჩართული პირების უსაფრთხოებისთვის რისკების შემცველია. აღნიშნული რისკების შესახებ, შინაგან საქმეთა სამინისტროს წარმომადგენლების მხრიდან, არაერთხელ განემარტათ ღონისძიების ორგანიზატორებს.

კიდევ ერთხელ საჯაროდ მოვუწოდებთ თბილისი პრაიდის მონაწილეებს, რუსთაველის გამზირზე, მოწინააღმდეგე ჯგუფების მიერ დაგეგმილი აქციების მასშტაბურობიდან გამომდინარე, უარი თქვან ღია, საჯარო სივრცეში მარშის გამართვაზე, — წერია შსს–ს განცხადებაში.

მარშის ჩატარება მიზანშეუწონლად მიაჩნია ქვეყნის პრემიერსაც.  ირაკლი ღარიბაშვილი აცხადებს, რომ ღევანდელი აქცია სამოქალაქო დაპირისპირების საფრთხეს მოიცავს, მოსახლეობის უმრავლესობისთვის მარში მიუღებელია და შესაბამისად, იგი მიიჩნევს, რომ აქცია რუსთაველის გამზირზე არ უნდა ჩატარდეს. იგი მიიჩნევს, რომ თბილისი პრაიდის ღირსების მარშის უკან დგას რადიკალური ოპოზიცია სააკაშვილის მეთაურობით.

“მე ასევე მინდა აღვნიშნო, რომ სამწუხაროდ დღევანდელი აქციის ორგანიზატორების უკან დგანან ისევ რევანშისტული, რადიკალური ჯგუფები, კერძოდ, რადიკალური ოპოზიცია სააკაშვილის მეთაურობით. ისინი არიან ჩართულები, აბსოლუტურად, სრული პასუხისმგებლობით ვაცხადებ ამას, რომ ისინი უკეთებენ ორგანიზებას აღნიშნულ მარშს და ამ აქციებს და სწორედ მათი მიზანია დღეს, ჩვენს ქვეყანაში სამოქალაქო არეულობის და ქაოსის შემოტანა. რაც, რა თქმა უნდა, არ განხორციელდება, ჩვენ არ დავუშვებთ”, — თქვა ირაკლი ღარიბაშვილმა.

პრემიერ-მინისტრი ასევე ირწმუნება, რომ ქვეყანაში ლგბტქ+ ადამიანების უფლებები არ ირღვევა, და თავად ასეთი ღონისძიებებია დისკრიმინაციული, რამდენადაც ღარიბაშვილის აზრით, ზედმეტად ხდება აპელირება მათ განსხვავებულობაზე.

თბილისი პრაიდის ერთ-ერთი დამფუძნებელი და ღირსების მარშის ორგანიზატორი გიორგი თაბაგარი, პრემიერმინისტრ ირაკლი ღარიბაშვილის განცხადებას უპასუხისმგებლო უწოდა.

„ნაცობა დაგვაბრალა ღარიბაშვილმა. ყოვლად უპასუხისმგებლო პრემიერ–მინისტრი გვყავს. ზუსტად ისეთივე ბნელი, როგორც ეს ველური ხალხი, კარვებს რომ გლეჯენ ახლა“, - წერს გიორგი თაბაგარი.

პრაიდის კვირეული საქართველოში 1-5 ივლისს იმართება. კვირეულის ფარგლებში სულ 3 ღონისძიება დაიგეგმა. 1 ივლისს გაიმართა დოკუმენტური ფილმის კინოჩვენება, 3 ივლისს - პრაიდ ფესტივალი, კვირეულის მთავარი აქტივობის, ღირსების მარშის ჩატარება კი 5 ივლისსაა დაგეგმილი.