ფარმაცევტული კომპანიების ასოციაცია საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის მინისტრის განცხდებას გამოეხმაურა ფარმაცევტულ ბაზარზე რიგი მედიკამენტების დეფიციტის არსებობასთან დაკავშირებით.

მათი თქმით, არაკეთილსინდისიერი სუბიექტები ბაზარზე ყოველთვის იარსებებენ. თუმცა, დაუშვებელია ფარმაცევტული ბაზრის ყველა მონაწილე იქნეს დადანაშაულებული არაკეთილსინდისიერ ქმედებაში. ასოციაცია მიიჩნევს, რომ კატეგორიულად დაუშვებელია, როდესაც ასეთ განცხადებას საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის მინისტრი საჯაროდ აკეთებს.

„ფარმაცევტული კომპანიების ასოციაცია და მასში გაერთიანებული წევრები სრული პასუხისმგებლობით ვაცხადებთ, რომ რიგ მედიკამენტებზე დროებით შექმნილი დეფიციტი დაკავშირებულია მწარმოებლიების მხრიდან  მოწოდების და აგრეთვე ლოჯისტიკასთან დაკავშირებულ შეფერხებასთან. ასოციაციის წევრებისათვის, რომელიც ბაზრის 80%-ს შეადგენს, მიუღებელია და ემიჯნებიან ბიზნესის არაეთიკურ წარმოებას, მითუმეტეს პაციენტების ხარჯზე ზემოგებების დაწესებით.

ფარმაცევტული კომპანიების უმრავლესობა ძალ-ღონეს არ იშურებს რათა აფთიაქები და მათ მიერ გაწეული მომსახურეობა შეესაბამებოდეს საერთაშორისო სტანდარტებს და მომხმარებლებს მიეწოდოს  ხარისხიანი, უსაფრთხო და ეფექტიანი ფარმაცევტული პროდუქტი. დაგვეთანხმებით, რომ ამ მხრივ საქართველოს ფარმაცევტული ბაზარი ერთ-ერთი მოწინავეა. ფარმაცევტული კომპანიებისთვის ყოველთვის პრიორიტეტული იყო მომხარებლის ინტერესები. აღნიშნული პრინციპის დაცვას ემსახურება ბაზარზე არსებული ძლიერი კონკურენცია, რაც კიდევ უფრო ხელს უწყობს ფარმაცევტული დარგის განვითარებას.

რა თქმა უნდა ბაზარზე ყოველთვის იარსებებს არაკეთილსინდისიერი სუბიექტები, რომლებსაც სხვა ღირებულებები გააჩნიათ და შექმნილ გარემოებას მხოლოდ თავისი ინტერესებისთვის იყენებენ. თუმცა, დაუშვებელია ფარმაცევტული ბაზრის ყველა მონაწილე იქნეს დადანაშაულებული ისეთი ქმედების ჩადენაში, რომელიც ძირეულად ეწინააღმდეგება მათ პრინციპებს. კატეგორიულად დაუშვებელია, როდესაც ასეთ განცხადებას საჯაროდ აკეთებს საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის მინისტრი.

კიდევ ერთხელ ვაცხადებთ, რომ ჩვენი ასოციაციის წევრები სრულიად ემიჯნებიან მსგავს ქმედებას და აგრძელებენ ქვეყნის მოსახლეობის მაქსიმალურად მაღალი ხარისხის მედიკამენტებით უზრუნველყოფას და კვალიფიციური, მაღალი ხარისხის მომსახურეობის გაწევას“, - ნათქვამია ფარმაცევტული კომპანიების ასოციაციის განცხადებაში.

შეგახსენებთ, რომ 28 დეკემბერს ჯანდაცვის მინისტრმა განაცხადა, რომ არის შემთხვევები, როცა ფარმაცევტული კომპანიები მედიკამენტების დეფიციტს ხელოვნურად ქმნიან და მსგავსი შემთხვევები კანონით დარეგულირდება.

„სამწუხაროდ, ნამდვილად იყო ასეთი ფაქტები, ეს გამომდინარეობდა რამდენიმე ხნის წინ იმ ვირუსებიდან რაც ბავშვებში იყო გავრცელებული. ამ ყველაფერს მომდევნო წლიდან კანონი დაარეგულირებს, ჩვენ გავაკეთეთ ჩანაწერი კანონში, რომ ნებისმიერი საბითუმო მოვაჭრე ვალდებულია ონლაინ გაგვიხნას ბაზები და ნებისმიერ დროს რეგულირების სააგენტო ხედავს როგორც ნაშთებს, ასევე ფასებს. ეს ერთი მხრივ, დაგვეხმარება იმაში, რომ კომპანიებმა რეფერენტულ ფასზე მაღალ ფასად არ გაყიდონ მედიკამენტი და რეაგირების შესაძლელობასაც მოგვცემს, იმისთვის რომ ხელოვნურად დეფიციტის შექმნა ვერ შეძლონ. იმპორტიდან დაწყებული მთელ ციკლს გავაკონტროკლებთ,“ – განმარტა ჯანდაცვის მინისტრმა.

მისივე განმარტებით, კომპანიები ფასის ზრდის მიზნით, დახლზე კონკრეტული მედიკამენტის განთავსებისგან თავს იკავებდნენ.

„სამწუხაროდ, ფაქტებიც იყო რომ აფთიაქები ხელოვნურად იღებდნენ დახლებიდან მედიკამენტებს, „ნუროფენი“ იყო მაგალითად ასეთი. ხედავდნენ, რომ მოთხოვნა მაღალი იყო და ამას აკეთებდნენ იმისთვის რომ მერე უკვე ოთხჯერ და ხუთჯერ ძვირად გაყიდულიყო. სამწუხაროდ, ასეთი არაკეთილსინდისიერი მიდგომა არსებობს, ამას მარკეტინგს ვერ დავარქმევ,“ – განმარტა ჯანდაცვის მინისტრმა.