დაუსრულებელი მშენებლობების პრობლემის მოგვარებას მერია საგადასახადო შეღავათის დაწესებით ცდილობს. გარდა იმისა, რომ ამით ბიზნესი მოიგებს, დაზარალებული მობინადრეების საკითხიც საბოლოოდ მოგვარდება. ასე წარმოუდგენიათ კანონმდებლებს და დარგის სპეციალისტებს შედეგი, რაც დაუსრულებელ სამშენებლო ობიექტებზე კ2 კოეფიციენტის მოსაკრებელთან დაწესებულ შეღავათს უკავშირდება.
მიიღე ინფორმაცია უფრო სწრაფად „კომერსანტის“ Telegram-ზე.
როგორც ცნობილია, თბილისის მერია სამშენებლო კომპანიებს კ2 კოეფიციენტის მოსაკრებლის გადახდას ეტაპობრივად სთავაზობს. საუბარია 2019 წლამდე გაცემულ ნებართვებზე. დედაქალაქის მერმა კახა კალაძემ განაცხადა, რომ შესაბამისი საკანონმდებლო ინიციატივა უკვე მომზადებულია.
დაწესებული შეღავათით ისარგებლებს სავარაუდოდ ,,ივერონი“, რომლის ერთ-ერთი პროექტის გაგრძელება პანდემიის გამო შეფერხდა. როგორც კომპანიის დირექტორი არჩილ ჯაყელი ,,კომერსანტთან“ ამბობს, მერიის შეთავაზება მშენებლობის დასრულების შესაძლებლობას მისცემს.
,,როგორც ვიცი, სექტორი ითხოვდა მსგავს შეღავათს და მერიამ გაითვალისწინა. შექმნილ სიტუაციაში ეს ლოგიკური გადაწყვეტილებაა. ისედაც პრობლემა შეექმნათ კომპანიებს, ვერ ჩააბარეს ობიექტები. სამშენებლო ამნისტიასთან ერთად კ2 მოსაკრებლის გადავადება იქნება იდეალური გადაწყვეტილება, რითაც ძველი პრობლემაც მოგვარდება და უშუალოდ პანდემიიდან გამომდინარე შექმნილი მდგომარეობაც გამოსწორდება. ჩათვალეთ, რომ მომავალ წელს შეიძლება მივიღოთ რადიკალურად სხვა სიტუაცია, 50%-ზე მეტი ჩაბარებული ობიექტი! ჩვენს შემთხვევაში პრობლემა ერთ-ერთ ობიექტზე კოვიდ-19-ის გამო შეიქმნა. თუკი უნდა გადამეხადა 30 000 ლარი (მოსაკრებლის თანხა), ამ შეღავათით, პირობითად, 1500 ლარობით უფრო მარტივად გადავიხდი, მით უმეტეს, ამის გარდა სხვა ვალდებულებაც რჩება და ელემენტარული ხელშეწყობა მნიშვნელოვანია, რომ ახალ პროექტებზე დავიწყოთ ფიქრი. პანდემიამ, შემდეგ უკვე ომმა ვითარება დაამძიმა, სფეროს სტიმულირება სჭირდება, რომ მალე გამოვიდეს მდგომარეობიდან. მცირე წახალისებაც კი ბიზნესს ათმაგად წაადგება“, - ამბობს არჩილ ჯაყელი ,,კომერსანტთან“.
თბილისის მუნიციპალიტეტის არქიტექტურის სამსახურის ინფორმაციით, 10 წლის განმავლობაში - 2009 - 2019 წლებში დაახლოებით 4000 შენობაზეა გაყიდული კ2 კოეფიციენტი.
გარდა იმისა, რომ ამით ბიზნესი მოიგებს, დაზარალებული მობინადრეების საკითხიც საბოლოოდ მოგვარდება. ასე წარმოუდგენიათ კანონმდებლებს და დარგის სპეციალისტებს შედეგი, რაც დაუსრულებელ სამშენებლო ობიექტებზე კ2 კოეფიციენტის მოსაკრებელთან დაწესებულ შეღავათს უკავშირდება. ლაპარაკია დაახლოებით 180 ოჯახზე ანუ პრობლემა ეხება 10 ათასამდე ადამიანს, რომელიც 10 წელზე მეტია, რაც ბინას ელოდება.
მარი ჩიტაია