„დაუყოვნებლივ მისაღებია კანონი, რომელიც მოსახლეობას დაავალდებულებს თავის საკუთრებას მოუაროს“, - ამის შესახებ დეველოპერული კომპანია „არსის“ ერთ-ერთმა დამფუძნებელმა ირაკლი როსტომაშვილმა განაცხადა. ბიზნესმენი ამბობს, რომ დღეს საცხოვრებელი ფონდის 90 % კერძო საკუთრებაა. მისი თქმით, ეს არის ინდივიდუალური საცხოვრებელი სახლები ან ე.წ. კორპუსები, რომელიც რამდენიმე ოჯახის კერძო საკუთრებაა და ისინი ვალდებულნი არიან თავიანთ  კერძო საკუთრებას გაუწიონ საექსპლუატაციო მომსახურება.

„დღევანდელი კანონმდებლობით გადაწყვეტილია, რომ ყველა შენობაში უნდა იყოს სახანძრო სიგნალიზაცია, თბილისის მაღლივი შენობების თითქმის 90 %-ში არის ლიფტები - ამ ყველა დანადგარს სჭირდება სწორი მოვლა, მუდმივად გამართულ მდგომარეობაში ყოფნა. ყველას გვინახავს ლიფტში დამონტაჟებული ყულაბები, თუ ლიფტი დაზიანდა მოგროვებული თანხით მიდიან ელიავას ბაზრობაზე, პოულობენ მექანიკოს და კუსტარულად ხდება სამუშაოების ჩატარება. ეს არის წარმოუდგენელი და ყოველგვარ საზღვრებს სცილდება.  

მეორე ეტაპი არის საერთო სარგებლობის ფართები, როგორიც არის სახურავები, სადარბაზოები, გამწვანებული ტერიტორია, სანიაღვრე მეურნეობა. კანონი უნდა არეგულირებდეს თუ ვინ უვლის და აწესრიგებდეს ამ ტერიტორიას. არ შეიძლება გამუდმებით გვესმოდეს - დავრეკეთ მერიაში, ყურადღება არავინ მოგვაქცია, წყალი ჩამოდის, კედელი სველდება. ევროპულ ქალაქებში არც ერთ მოსახლეს აზრად არ მოუვა მიმართოს გამგეობას იმისთვის, რომ მის სახლზე ბათქაშია დაზიანებული. ყველა ვალდებულია თავის ქონებას მოუაროს. უძრავ ქონებას ძალიან დიდი პლუსი აქვს, ყოველი დახარჯული ერთი ლარი ათმაგ ეფექტს იძლევა. მოწესრიგებული სადარბაზო, გარემო და ინფრასტრუქტურა 10-15%-ით ზრდის უძრავი ქონები ღირებულებას.

მაგალითად, დედაქალაქის ცენტრში, ჭავჭავაძის გამზირზე 5 სართულიანი შენობის საწვიმარ ღარში ხეა ამოსული. ცხადია, რომ ეს ხე 1 ღამეში არ ამოსულა, ალბათ 2-3 წლის განმავლობაში იზრდებოდა. წარმოიდგინეთ, ამ დროის განმავლობაში ამისთვის ყურადღება არავის მიუქცევია. ხე ფესვებს გაიდგამს შენობის კედლებში, აიყრება ბათქაში, შევა წყალი და შენობა დასველდება. მთელ მსოფლიოში სეზონურად პრევენციული ღონისძიება ტარდება, მაგალითად, გაზაფხულის დადგომის პერიოდში ხდება სანიაღვრეების შემოწმება. იმ მომენტში ვიღაცას, რომ შეემჩნია 10 სანტიმეტრიანი ნერგი, მარტივად შეიძლებოდა ამ საკითხის მოგვარება და დანახარჯი საერთოდ არაფერი იქნებოდა. ახლა შეიძლება 1 000 ლარი არ იყოს საკმარისი ამწის მისაყვანად. ეს არავითარ შემთხვევაში არ უნდა დააფინანსოს ბიუჯეტმა.

ყველამ უნდა გაითავისოს რომ ბიუჯეტი არის საერთო ფული, რომლითაც უნდა კეთდებოდეს აეროპორტები, ავტობანები, ხიდები, გვირაბები და არა რომელიმე კორპუსის სახურავის გადახურვა. ამ ნაბიჯების გადადგმა შეიძლება არაპოპულარულია, მაგრამ სხვა გზა არაა. ჩვენი აზრით, დაუყოვნებლივ მისაღებია კანონი, რომელიც მოსახლეობას დაავალდებულებს თავის საკუთრებას მოუაროს“, - ამბობს ირაკლი როსტომაშვილმა.

ბაჩო ადამია