ამ გაღატაკებულ ქვეყანაში, სადაც ადამიანები თვიდან-თვემდე ბანკების არაადეკვატური პროცენტების გადახდას ისედაც ვერ აუდიან, როდესაც ელემენტარული საკვებისა და წამლების ყიდვას ძლივს ახერხებენ, „ოცნების“ ხელისუფლებამ მორიგი „მამაძაღლური“ სქემა შემოაგდო,- ამის შესახებ მოძრაობა „ტრიბუნას“ ლიდერმა დავით ჭიჭინაძემ განაცხადა.
მისი თქმით, ხელისუფლებამ ერთი მხრივ ხელფასების მატება დააანონსა, მეორე მხრივ კი საპროცენტო განაკვეთი გაზარდა. ამასთანავე, ჭიჭინაძის შეფასებით, ეროვნული ბანკის პრეზიდენტი უპასუხისმგებლოა, როდესაც აცხადებს, რომ ინფლაცია თავისით შეწყდება.
„ვითომ ხელფასების მომატება გამოაცხადეს და გზაშივე დააწიეს მომატებული საპროცენტო განაკვეთი ანუ, ამ ვითომ მომატებულ ფულს, ისევ ბანკების მეშვეობით ამოიღებენ.
გამოდის, მდიდრები ისევ განაგრძობენ გამდიდრებას, რიგით ადამიანებს კი ორი გამოსავალი რჩებათ ამ კატასტროფულად გაძვირებულ ცხოვრებაში, ან ნაკლები ჭამონ, ან უხარისხო.
მოკლედ, უპასუხისმგებლოა ეროვნული ბანკის პრეზიდენტი, როდესაც აცხადებს, რომ ინფლაცია თურმე ოდესმე თავისით გაჩერდება!
სამარცხვინოა კობა გვენეტაძის განცხადებები, მითუმეტეს ფედერალური სარეზერვო სისტემის თავმჯდომარის, პაუელის განცხადების ერთი კვირის თავზე!
მაშინ, როდესაც იმ მთავარი ორგანოს წარმომადგენელი, რომელიც მთელ მსოფლიოს ფულით ამარაგებს, გვეუბნება, რომ 2022 წელს ინფლაცია კი არ გაჩერდება, პირიქით, გაიზრდება, რადგან საკმაოდ დიდი დისპროპორციაა შემოსავლებსა და გასავლებს შორის, რომ ყველაფერი გაძვირდება, რადგან დოლარშია კატასტროფული ინფლაცია. ჩვენი ეროვნული ბანკის პრეზიდენტი გვიცხადებს, რომ ინფლაცია ოდესმე გაჩერდება და თან თავისითო.
თუ პაუელის განცხადებას არ გაცნობია გვენეტაძე, მარტო მოხსნა არაა მისთვის საკმარისი!
ხოლო, თუ თავისით უნდა მოხდეს ყველაფერი, მაშინ საერთოდ რა საჭიროა ეროვნული ბანკი ან ეს მთავრობა, რომელიც იმის მაგივრად, რომ ქვეყნის გადარჩენის გეგმაზე მუშაობდეს, ისევ სააკაშვილს ებრძვის?!“ - განაცხადა დავით ჭიჭინაძემ.
bpn.ge