საპარლამენტო უმრავლესობის წევრმა, დავით მათიკაშვილმა, „ქრონიკასთან“, საქართველოს პრემიერ-მინისტრის, ირაკლი ღარიბაშვილის განცხადებაზე ისაუბრა და აღნიშნა, რომ სახელმწიფოს პოზიტიური ვალდებულებაა, მართოს ონლაინკაზინოებთან დაკავშირებული საკითხი.
„ამ საკითხთან დაკავშირებით, წლების განმავლობაში მიდის მსჯელობა და იყო გარკვეული ინიციატივებიც საქართველოს პარლამენტშიც. ეს საკითხი სახელმწიფოსთვის ძალიან მნიშვნელოვანია. ეს იძლევა მოცემულობას, რომ სწორედაც სახელმწიფო ჩაერიოს ამ საკითხში, რომელიც, ერთი შეხედვით, არის კერძო ბიზნესი და სახელმწიფოს მხრიდან, მასთან მიმართებით, ლოიალური დამოკიდებულება უნდა იყოს. პრინციპში, აქამდე, ეს ასეც იყო და გარკვეულწილად, ასეც გაგრძელდება უშუალოდ ბიზნესთან მიმართებით, მაგრამ რაც შეეხება ონლაინკაზინოს, მისი უარყოფითი და ნეგატიური როლი ჩვენს საზოგადოებაში სამწუხაროდ, ძალიან დიდია. ყველაფერს რომ თავი დავანებოთ, 1,5 მილიარდი ლარი გაედინება ყოველწლიურად საქართველოდან უცხოეთში, რადგან, როგორც წესი, ისინი უცხოეთიდან იმართებიან. ეს არის უცხოური კაზინოები. შესაბამისად, სახელმწიფოს აქვს პოზიტიური ვალდებულება, შესაბამისად მართოს პროცესი და ჩვენი, ეროვნული ეკონომიკის ხელშეწყობაზე ჰქონდეს აქცენტი. მეორე მხრივ, იმ ადამიანებს, რომლებიც, გარკვეულწილად, დამოკიდებულნი არიან ამ ძალიან მავნე ჩვევაზე და სამწუხაროდ, გარკვეულწილად, არასრულწლოვნებიც კი ახერხებენ რაღაც გზებით თამაშს, ეს ერთმნიშვნელოვნად ნეგატიური მოვლენაა. სწორედ ამ ნეგატიური მოვლენის წინააღმდეგ, ისე, რომ ბიზნესი რადიკალურად არ დაზარალდეს, მოხდეს რეგულაციებზე გადასვლა და საბოლოო ჯამში, ონლაინკაზინოების გაუქმება, როგორც ეს პრემიერმა ბრძანა. სწორედ ამ საკითხს ეხება ეს ინიციატივა და ის ნამდვილად სასარგებლო იქნება ჩვენი ქვეყნის როგორც ეკონომიკისთვის, ასევე იმ ადამიანებისთვის, რომლებიც ამ მძიმე მოცემულობაში არიან და ამას ვერ ანებებენ თავს“, - აღნიშნა დავით მათიკაშვილმა.
პრემიერის განცხადებით, პირველ ეტაპზე, ონლაინ კაზინოებისთვის გადასახადის გაზრდა, რეკლამის აკრძალვა, მომხმარებლების ასაკობრივი ზღვარის 25 წლამდე აწევა იგეგმება, მეორე ეტაპზე კი - საერთოდ აკრძალვა.
imedinews.ge